ប្រទេសចិននិយាយថា សេដ្ឋកិច្ចរបស់ខ្លួនបានកើនឡើង៧,៤ភាគរយនៅក្នុងឆ្នាំ២០១៤ ដែលជាអត្រាមួយខ្ពស់ដែលប្រទេសឯទៀតគួរតែច្រណែន។ ក៏ប៉ុន្តែ ចិនមិនដូចប្រទេសឯទៀតៗទេ។ ប្រទេសនេះបានក្លាយជាប្រទេសដែលមានរោងចក្រច្រើនជាងគេនៅលើពិភពលោក ហើយជាប្រទេសធំទីពីរផ្នែកសេដ្ឋកិច្ចផងដែរ។ ក្រុមអ្នកវិភាគនិយាយថា តួលេខទាបនេះ គឺជាសញ្ញាមួយដែលបង្ហាញថាអ្វីដែលរដ្ឋាភិបាលចិនហៅថា«ស្ថានភាពធម្មតាថ្មី»នោះ បានមកដល់ហើយ។
ការិយាល័យស្ថិតិជាតិរបស់ចិននិយាយថា នៅក្នុងឆ្នាំ២០១៤ សេដ្ឋកិច្ចរបស់ចិនបានកើន ៧,៤ភាគរយ ដែលធ្លាក់ចុះពី៧,៧ភាគរយកាលពីឆ្នាំ២០១៣។
នេះជាល្បឿនដ៏យឺតបំផុតនៃកំណើតដែលកើតមាននៅប្រទេសចិន គិតចាប់តាំងពីឆ្នាំ១៩៩០ គឺនៅពេលដែលសេដ្ឋកិច្ចនៃប្រទេសនេះព្យាយាមងើបចេញពីទម្ងន់នៃការដាក់ទណ្ឌកម្ម ក្រោយមានការបង្រ្កាបយ៉ាងឃោរឃៅទៅលើពួកបាតុករគាំទ្រលទ្ធិប្រជាធិបតេយ្យនៅទីលានទៀនអានមែន (Tiananmen )។
ប្រធាននៃក្រុមអ្នកសេដ្ឋសាស្រ្តរបស់ក្រុមហ៊ុនវិនិយោគទុន AMP Capital ដែលមានមូលដ្ឋាននៅទីក្រុងស៊ីដនី (Sydney) លោក Shane Oliver មានប្រសាសន៍ថា មនុស្សជាច្រើនបាននិយាយអំពីការធ្លាក់ចុះខ្លាំងនៃសេដ្ឋកិច្ចក្នុងប្រទេសចិនក្នុងប៉ុន្មានឆ្នាំកន្លងទៅនេះ។ ក៏ប៉ុន្តែ សេដ្ឋកិច្ចចិនហាក់ដូចជាត្រូវបានគ្រប់គ្រងដ៏ល្អប្រសើរ។
លោកមានប្រសាសន៍ថា៖ «វាជាអត្រាលូតលាស់យឺតបំផុតមួយក្នុងរយៈពេលជាច្រើនឆ្នាំកន្លងមកហើយគិតចាប់ពីឆ្នាំ១៩៩០ ក៏ប៉ុន្តែ វាជាការធ្លាក់ចុះមួយដែលរដ្ឋាភិបាលពិតជាបានគ្រប់គ្រងយ៉ាងល្អប្រសើរ។ វាមិនមែនដោយសារតែការធ្លាក់ចុះនៃកំណើននៅពេលដែលសេដ្ឋកិច្ចបែកខ្ញែកគ្នានោះទេ។ វាជាការធ្លាក់ចុះដែលត្រូវបានគ្រប់គ្រង ហើយខ្ញុំគិតថាវាជាសញ្ញាវិជ្ជមានមួយ។»
សេដ្ឋកិច្ចចិន បានចាប់ផ្តើមធ្លាក់ចុះក្នុងប៉ុន្មានឆ្នាំថ្មីៗនេះ គឺធ្លាក់ពីកំណើនពីរខ្ទង់ ដោយសារតែអាជ្ញាធរបានបង្វែរទិសដៅសេដ្ឋកិច្ចចិនពីការពឹងពាក់ទាំងស្រុងលើការនាំចេញ ទៅរកគំរូសេដ្ឋកិច្ចមួយដែលជំរុញដោយការប្រើប្រាស់ក្នុងស្រុក។
នៅក្រោយពេលមានបាតុកម្មនៅទីលាន ទៀនអានមែន ប្រទេសចិនបានផ្តោតការយកចិត្តទុកដាក់លើកំណើនសេដ្ឋកិច្ច ដើម្បីធានាឲ្យមានស្ថិរភាពនិងរក្សាការគ្រង់គ្រង់ដោយឯកបក្ស។ ក៏ប៉ុន្តែ នៅពេលដែលសេដ្ឋកិច្ចរបស់ខ្លួនធ្លាក់ចុះ មានការព្រួយបារម្ភថា ភាពអត់ការងារធ្វើអាចកើនឡើងហើយអាចនាំភាពចលាចលមកជាមួយផង។
នាយកការិយាល័យស្ថិតិជាតិចិន លោក Ma Jiantang មានប្រសាសន៍ថា ចំណុចខ្ពស់បំផុតមួយនៃសេដ្ឋកិច្ចរបស់ចិនកាលពីឆ្នាំមុនគឺកំណើននៃវិស័យសេវាកម្ម។ លោកបន្ថែមថា ឥឡូវនេះ វិស័យសេវាកម្មមានស្ទើរតែពាក់កណ្តាលនៃសេដ្ឋកិច្ចរបស់ចិន។
លោក Ma មានប្រសាសន៍ថា សេដ្ឋកិច្ចរបស់ចិនមានការជឿនលឿនទៅមុខយ៉ាងថិតថេរ នៅឆ្នាំ២០១៤ ហើយបានបន្តស្ថិរភាពនោះក្រោមរូបភាពមួយដែលពួកមន្រ្តីហៅថា «ស្ថានភាពធម្មតាថ្មី»នៃកំណើនយឺត។
លោក Ma មានប្រសាសន៍ថា បរិបទសេដ្ឋកិច្ចក្នុងស្រុកនិងនៅលើឆាកអន្តរជាតិនៅតែមានភាពស្មុគ្រស្មាញ ហើយក្តីសង្ឃឹមនៃកំណើនសេដ្ឋកិច្ចនាពេលអនាគត នៅតែមានបញ្ញាប្រឈម និងជួបការពិបាក។
ប្រទេសចិនកំពុងតែព្យាយាមងើបពីស្ថានភាពមួយដែលស្ថិតក្រោមទម្ងន់ដ៏ធ្ងន់នៃបំណុលរបស់រដ្ឋាភិបាលក្នុងស្រុកនិងបំណុលសាជីវកម្ម។ ហើយខណៈដែលយុទ្ធនាការប្រឆាំងអំពើពុករលួយត្រូវបានស្វាគមន៍ អ្នកវិភាគខ្លះបានយល់ឃើញថា យុទ្ធនាការនេះបានបង្អាក់ការប្រើប្រាស់។
កាលពីថ្ងៃអង្គារ មូលនិធិរូបិយវត្ថុអន្តរជាតិ បានកែសម្រួលការព្យាករណ៍របស់ខ្លួនសម្រាប់កំណើនសេដ្ឋកិច្ចចិននៅឆ្នាំ២០១៥ និងឆ្នាំ២០១៦ ដោយនិយាយថា ខ្លួនរំពឹងថាការរីកនៃសេដ្ឋកិច្ចប្រទេសនេះនឹងធ្លាក់ចុះក្រោម ៧ភាគរយក្នុងឆ្នាំនេះ ហើយបន្តធ្លាក់ទៅដល់៦,៣ភាគរយនៅឆ្នាំ២០១៦៕
ប្រែសម្រួលដោយ នៀម ឆេង
