ក្រសួងសុខាភិបាលកម្ពុជាអំពាវនាវឲ្យប្រជាពលរដ្ឋប្រុងប្រយ័ត្ននឹងជំងឺគ្រុនឈីក(Chikungunya) ដែលមានអាការៈស្រដៀងនឹងគ្រុនឈាមដែរ ខណៈករណីជំងឺនេះបានកើនឡើងដល់ទៅប្រមាណ៦ពាន់ករណីនៅទូទាំងប្រទេស។ នេះបើតាមសេចក្តីប្រកាសព័ត៌មានរបស់ក្រសួងសុខាភិបាលចុះថ្ងៃទី២៧ខែកញ្ញាឆ្នាំ២០២០។
ក្រសួងសុខាភិបាលបញ្ជាក់ថា យោងតាមប្រព័ន្ធតាមដានជំងឺគ្រុនឈាមថ្នាក់ជាតិជំងឺគ្រុនឈីក មានករណីសង្ស័យចំនួន៥៩៩៨គិតត្រឹមថ្ងៃទី២៧ ខែកញ្ញាឆ្នាំ២០២០ ដែលកើតឡើងនៅក្នុង២១រាជធានីខេត្ត ហើយក្នុងនោះជាង៨០ភាគរយកើតនៅខេត្តសៀមរាប តាកែវ និងព្រះវិហារ។ ក្រសួងឲ្យដឹងទៀតថា ក្នុងចំណោមអ្នកឈឺគ្រុនឈីកនេះ មាន៥៤ភាគរយជាមនុស្សពេញវ័យ ៣១ភាគរយជាកុមារអាយុ៥ឆ្នាំឡើង និង១៥ភាគរយជាកុមារអាយុក្រោម៥ឆ្នាំ។
ក្រសួងសុខាភិបាលឲ្យដឹងថារោគសញ្ញានៃជំងឺគ្រុនឈីកនេះកើតមានឡើងក្នុងរង្វង់២ទៅ៣ថ្ងៃ ក្រោយមូលខ្លាញីខាំ ដោយមានអាការៈក្តៅខ្លួនលើសពី៣៨អង្សារសេ ឈឺក្បាល ឈឺខ្លួនប្រាណ សន្លាក់ដៃជើង និងមានចេញកន្ទួលក្រហមនៅលើដងខ្លួន ជាពិសេសនៅតាមចំហៀងខ្លួន។
ក្រសួងសុខាភិបាលបញ្ជាក់ថា៖ «អាការៈបែបនេះអាចនឹងមានស្រដៀងគ្នាទៅនឹងរោគសញ្ញាគ្រុនឈាមដែរ ។ សូមបងប្អូនដែលមានបញ្ហាសុខភាព ត្រូវប្រញាប់ទៅស្វែងរកការព្យាបាលនៅតាមមន្ទីរពេទ្យរដ្ឋ ដែលនៅជិតលោកអ្នក ហើយចៀសវាងការប្រើប្រាស់ថ្នាំដោយខ្លួនឯង ដែលអាចធ្វើឲ្យស្ថានភាពជំងឺកាន់តែធ្ងន់ធ្ងរ ពិបាកព្យាបាល ឈានទៅរកការស្លាប់»។
ប្រធានកម្មវិធីជាតិប្រយុទ្ធនឹងជំងឺគ្រុនឈាមនៃមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រ លោក លាង ឬទ្ធា ប្រាប់វីអូអេនៅថ្ងៃច័ន្ទនេះថា ៖«អ្នកណាដែលសង្ស័យ (ថាមានជំងឺនេះ) ត្រូវមកមន្ទីរពេទ្យរដ្ឋជាបន្ទាន់ កុំឲ្យនៅផ្ទះមូសខាំហើយទៅចម្លងគេទៀត»។
កាលពីឆ្នាំមុន មិនមានករណីជំងឺឈីកនេះទេ ដោយសារជំងឺនេះវាកើតឡើងរៀងរាល់១០ឆ្នាំម្តង។ លោកបន្តថាមិនមានករណីស្លាប់ទេរហូតមកដល់ពេលនេះ ហើយក្នុងចំណោមករណីសរុប៦ពាន់ ប្រមាណ៩៦ភាគរយបានព្យាបាលជាហើយ។
លោក លាង ឬទ្ធា បន្តថា គ្រុនឈីកនេះជាជំងឺឆ្លងដែលចម្លងពីមូសដែកគោលញី ដូច្នេះលោកថា ប្រជាពលរដ្ឋត្រូវប្រុងប្រយ័ត្នកុំឲ្យមូសខាំ ហើយប្រសិនបើមានមានជំងឺនេះ ត្រូវទៅព្យាបាលនៅមន្ទីរពេទ្យ។
គ្រុនឈីកកើតឡើងដំបូងបំផុតនៅឆ្នាំ១៩៥២ នៅប្រទេសតង់ហ្សានីនៃទ្វីបអាហ្វ្រិក។ជំងឺនេះធ្លាប់ត្រូវបានរកឃើញជាដំបូងនៅកម្ពុជា ដោយវិទ្យាស្ថានប៉ាស្ទ័រកម្ពុជានៅឆ្នាំ១៩៦១ និងនៅឆ្នាំ២០១១។នេះបើតាមក្រសួងសុខាភិបាលកម្ពុជា៕
