អង្គការសប្បុរសធម៌មួយបានព្រមានថា ទារកជនជាតិរ៉ូហ៊ីងយ៉ាង ដែលកើតនៅក្នុងជំរំជនភៀសខ្លួននិងកន្លែងរស់នៅបណ្តោះអាសន្នក្នុងឆ្នាំនេះ «ចាប់តាំងពីថ្ងៃទីមួយដែលពួកគេបានកើតមកនឹងមានការប្រថុយប្រថានខ្លាំងឡើងៗថានឹងមានជំងឺ មានការខ្វះខាតអាហារូបត្ថម្ភហើយនឹងស្លាប់នៅមុនមានអាយុ៥ឆ្នាំ»។
អ្នកស្រី Rachael Cummings ទីប្រឹក្សាខាងសុខាភិបាលនៃអង្គការសង្គ្រោះកុមារ (Save the Children) បាននិយាយនៅថ្ងៃសុក្រនេះថា «ជំរំទាំងនេះគ្មានអនាម័យទេហើយជាកន្លែងនាំឱ្យមានជំងឺនានាដូចជារាករូស, កញ្ជ្រិលនិងជំងឺអាសន្នរោគជាដើមដែលនាំឱ្យពួកទារកទើបកើតអាចរងគ្រោះបានដោយងាយ។ នេះមិនមែនជាកន្លែងសម្រាប់ឱ្យក្មេងម្នាក់កើតទេ»។ អ្នកស្រី Cummings បានថ្លែងថាស្ថានភាពនៃការរស់នៅរបស់ពួកកុមារទាំងនេះជាការធ្វើឱ្យឈឺចាប់ក្នុងចិត្ត។
អង្គការសប្បុរសធម៌នេះបាននិយាយថា គេរំពឹងថាពួកទារករ៉ូហ៊ីងយ៉ា ជាង៤ម៉ឺន៨ពាន់នាក់នឹងកើតក្នុងប្រទេសបង់ក្លាដែស ក្នុងឆ្នាំនេះ។
កាលពីខែមុន ការស្ទង់ប្រមាណមួយដោយអង្គការ UNICEF បានលាតត្រដាងឱ្យដឹងថា ចំនួន២៥ភាគរយនៃក្រុមកុមារអាយុតិចជាង៥ឆ្នាំនៅក្នុងជំរំនានាក្នុងតំបន់ Cox's Bazar នៃប្រទេសបង់ក្លាដែស មានបញ្ហាខ្វះខាតអាហារូបត្ថម្ភធ្ងន់ធ្ងរហើយចំនួនជិតពាក់កណ្តាលនៃក្រុមកុមារទាំងនេះមានជំងឺខ្វះឈាមក្រហម។ចំនួន៤០ភាគរយនៃពួកក្មេងទាំងនេះមានជំងឺរាករូសនិង៦០ភាគរយមានជំងឺរលាកបំពង់ដកដង្ហើមយ៉ាងធ្ងន់ធ្ងរ។
អ្នកស្រី Cummings បាននិយាយថា សេចក្តីត្រូវការនៅក្នុងជំរំទាំងនេះមានច្រើនលើសលប់៕
