ការស្រាវជ្រាវមួយបានធ្វើឡើងបន្ទាប់ពីមានការលិចកប៉ាល់ដែលមានបុគ្គលិក៤៣នាក់ដឹកគោចំនួនជិត៦០០០ក្បាលនៅក្នុងឈូងសមុទ្រភាគនីរតីនៃប្រទេសជប៉ុន។នេះជាការបញ្ជាក់ឲ្យដឹងពីឆ្មាំសមុទ្រនិងមន្ត្រីយោធាជើងទឹកជប៉ុន។
មន្ត្រីឆ្នាំសមុទ្របាននិយាយថាខ្លួនបានទទួលព័ត៌មានតាមរយ:ការហៅទូរស័ព្ទសុំជំនួយកាលពីថ្ងៃពុធពីកប៉ាល់ដឹកទំនិញឈ្មោះ Gulf Livestock 1 នៅពេលកប៉ាល់នេះមកដល់ភាគខាងលិចកោះAmami-Oshima របស់ជប៉ុនក្នុងសមុទ្រចិនខាងកើតនោះហើយក៏បានជួបនឹងព្យុះទីហ្វុងMaysakដែលបានវាយបក់បោកកាត់តំបន់នោះដោយមានខ្យល់ខ្លាំងនិងរលកសមុទ្រខ្ពស់ៗ។
យន្តហោះឃ្លាំមើលនៃក្រុមយោធាជើងទឹកបានប្រទះឃើញអ្នករស់រានមានជីវិតម្នាក់ក្នុងទឹកកាលពីយប់ថ្ងៃពុធហើយឆ្នាំសមុទ្របានជួយសង្គ្រោះលោក Sareno Edvarodo អាយុ៤៥ឆ្នាំជានាយកបុគ្គលិកកប៉ាល់។
ជនរួចជីវិតនេះបានប្រាប់ក្រុមមន្ត្រីថាលោកបានពាក់អាវពោងសង្គ្រោះជីវិតហើយលោតចូលទៅក្នុងទឹកនៅពេលកប៉ាល់ក្រឡាប់លិចក្រោយពេលម៉ាស៊ីនមួយបានខូចនៅពេលមានព្យុះ។
កប៉ាល់នេះដឹកគោចេញពីប្រទេសនូវែលសេឡង់ទៅកាន់ប្រទេសចិនកាលពីថ្ងៃទី១៤ ខែសីហាដោយមានក្រុមនាវិក៣៩នាក់មកពីប្រទេសហ្វីលីពីនពីររូបមកពីនូវែលសេឡង់និង ពីររូបទៀតមកពីប្រទេសអូស្ត្រាលី៕
