ភ្ជាប់​ទៅ​គេហទំព័រ​ទាក់ទង

លោក​ Carter​ ថ្លែង​ថា​ មិន​មាន​ផែនការ​ដាក់​រាយ​ប្រព័ន្ធ​កាំជ្រួច​ធុន​ទំនើប​នៅ​កូរ៉េ​ខាង​ត្បូង​ទេ


រដ្ឋមន្រ្តី​ការពារ​ប្រទេស​ស.រ.អា​ Ashton​ Carter​ ថ្លែង​ថា​ មិន​មាន​ផែនការ​ដាក់​រាយ​ប្រព័ន្ធ​កាំជ្រួច​ធុន​ទំនើប​នៅ​កូរ៉េ​ខាង​ត្បូង​ទេ។

លោក​រដ្ឋមន្រ្តី​ការពារ​ប្រទេស​ស.រ.អា​ Ashton​ Carter​ បាន​អញ្ជើញ​ទៅ​ដល់​ប្រទេស​ កូរ៉េ​ខាង​ត្បូង​កាល​ពី​ថ្ងៃ​ព្រហស្បតិ៍​នៅ​ក្នុង​ទស្សនកិច្ច​មួយ​ ដោយ​បាន​ថ្លែង​ថា​កង​យោធា​ស.រ.អា​កំពុង​ប្រុង​ប្រៀប​ដាក់​រាយ​គ្រឿង​អាវុធ​ថ្មី​នៅ​ក្នុង​តំបន់​ រួម​មាន​យន្តហោះ​ទម្លាក់​គ្រាប់​បែក​ stealth​ និង​នាវា​ចម្បាំង​ប្រភេទ​ខុសៗ​គ្នា​ តែ​មិន​ទាន់​រៀបចំ​ខ្លួន​ដើម្បី​ពិភាក្សា​អំពី​ការ​ដាក់រាយ​ប្រព័ន្ធ​ការពារ​មួយ​ដោយ​កាំជ្រួច​ធុន​ទំនើបៗ​ទេ។​

លោក​ Carter​ ថ្លែង​ថា​ «យើង​កំពុង​ធ្វើ​វិនិយោគ​ក្នុង​សមត្ថភាព​ទំនើបៗ​ ដើម្បី​ធ្វើ​ឲ្យ​ប្រាកដ​ថា​ ការ​វិនិយោគ​កំពូល​ថ្មីៗ​របស់​យើង​ត្រូវ​តាក់​តែង​ឲ្យ​ស្រប​តាម​បរិយាកាស​សន្តិសុខ​ដ៏​ស្វាហាប់​ក្នុង​តំបន់​ ហើយ​អាច​ដើរ​តួនាទី​មួយ​បាន​ក្នុង​ការ​ការពារ​សន្តិសុខ​នៅ​ទី​នេះ‍»។​

នៅ​ក្រោយ​កិច្ច​ប្រជុំ​ជា​មួយ​សមភាគី​កូរ៉េ​ខាង​ត្បូង​របស់​លោក​ លោក​ Carter​ បាន​ប្រាប់​សន្និសីទ​កាសែត​មួយ​នៅ​ថ្ងៃ​សុក្រ​នេះ​ថា​ ការ​ដាក់​រាយ​ប្រព័ន្ធ​កាំជ្រួច​ការពារ​តំបន់​អាកាស​ខ្ពស់​ដែល​ហៅ​ថា​ Terminal​ High​ Altitude​ មិន​បាន​ដាក់​ក្នុង​របៀប​វារៈ​ទេ​ ហើយ​រដ្ឋាភិបាល​ក្រុង​វ៉ាស៊ីនតោន​មិន​ទាន់​បាន​ចូល​ដល់​ចំណុច​មួយ​ ដែល​ខ្លួន​អាច​ពិភាក្សា​អំពី​ការ​ដាក់រាយ​ប្រព័ន្ធ​នេះ​ជា​មួយ​ប្រទេស​ណា​មួយ​ក្នុង​ពិភពលោក​នៅ​ឡើយ​ទេ។​

លោក​រដ្ឋមន្រ្តី​ការពារ​ប្រទេស​ កូរ៉េ​ខាង​ត្បូង​ Han Min-koo​ បាន​ប្រាប់​អ្នក​រាយការណ៍​ព័ត៌មាន​ថា​ ប្រទេស​ កូរ៉េ​ខាង​ជើង​ហាក់​ដូច​ជា​មិន​ឃើញ​ប្រុង​ប្រៀប​ដើម្បី​បាញ់​រ៉ូកែត​វង់​ប្រតិបត្តិការ​វែង​ ឬ​ក៏​ធ្វើ​ការ​សាកល្បង​នុយក្លេអ៊ែរ​ណា​មួយ​ទៀត​នៅ​ពេល​ឆាប់ៗ​នេះ​ទេ។​

លោក​ថ្លែង​ថា​ បច្ចុប្បន្ន​នេះ​ យើង​មិន​ឃើញ​សញ្ញា​ណា​មួយ​ដែល​បង្ហាញ​ថា​ កូរ៉េ​ខាង​ជើង​នឹង​ធ្វើ​ការ​សាកល្បង​នុយក្លេអ៊ែរ​ ឬ​ការ​បាញ់​កាំជ្រួច​បន្ថែម​ណា​ទៀត​ នៅ​ក្នុង​អនាគត​ដ៏​ខ្លី​ខាង​មុខ​នេះ​ទេ។​ នេះ​ជា​អ្វី​ដែល​យើង​មិន​អាច​បញ្ជាក់​បាន​ឡើយ‍»៕

XS
SM
MD
LG