កាលពីថ្ងៃច័ន្ទ លោករដ្ឋមន្ត្រីការពារប្រទេសស.រ.អា. Ash Carter បានមានប្រសាសន៍ថា ស.រ.អា.មិនបំណងចង់វិលត្រឡប់ទៅកាន់សង្គ្រាមត្រជាក់ទេ ហើយក៏គ្មានបំណងចង់ឱ្យមានជម្លោះថ្មីមួយជាមួយប្រទេសរុស្ស៊ីផងដែរ។ លោកបន្តថាការដាក់ទណ្ឌកម្មសេដ្ឋកិច្ចប្រឆាំងនឹងរុស្សីកំពុងមានឥទ្ធិពលក្នុងការទប់ទល់នឹង «ការឈ្លានពាន» របស់រុស្សីនៅក្នុងប្រទេសអ៊ុយក្រែន។
លោកបានមានប្រសាសន៍ដូច្នេះនៅក្នុងវេទិកាមួយនៅក្នុងក្រុងបែរឡាំង (Berlin) ដែលនៅទីនោះលោកក៏បានជួបជាមួយលោកស្រីរដ្ឋមន្ត្រីការពារប្រទេសអាល្លឺម៉ង់ Ursula von der Leyen។ រដ្ឋមន្ត្រីទាំងពីរនាក់បានកំណត់ថា នឹងធ្វើដំណើរនៅល្ងាចថ្ងៃច័ន្ទទៅកាន់ក្រុង Muenster ដើម្បីជួបជាមួយសមភាគីរបស់ពួកគេពីប្រទេសន័រវែស (Norway) និងប្រទេសហូឡង់ (Netherland)។
លោក Carter បានមានប្រសាសន៍ថា ទោះបីណាពួកបស្ចឹមប្រទេសមិនចង់ធ្វើជាសត្រូវជាមួយប្រទេសរុស្សីក៏ដោយ ក៏ពួកបស្ចឹមប្រទេសនឹងការពារខ្លួនឯងប្រសិនបើមានការចាំបាច់។
លោក Carter បានមានប្រសាសន៍ថា «ប្រទេសអ៊ុយក្រែនគ្រាន់តែជាផ្នែកមួយនៃកង្វល់ដ៏ធំរបស់យើងនៅពេលនេះអំពីប្រទេសរុស្សី។ ជាការឆ្លើយតបយើងមានវិធីដោះស្រាយបែបយុទ្ធសាស្ត្រមួយដែលខ្លាំង ក៏ប៉ុន្តែមានតុល្យភាព។ វាគឺជារបៀបដោះស្រាយមួយដែលស្វះស្វែងធ្វើឱ្យប្រាកដប្រជាថា ប្រទេសរុស្សីមិនអាចបង្ខិតបង្ខំនរណាម្នាក់ឱ្យវិលត្រឡប់ទៅអតីតកាលវិញដោយយើងស្វាគមន៍ និងលើកទឹកចិត្តរុស្សីឱ្យគិតពីអនាគតវិញ»៕
