កាលពីថ្ងៃសុក្រ លោក Ben Carson អតីតបេក្ខជនប្រធានាធិបតីស.រ.អា.ខាងគណបក្សសាធារណរដ្ឋ បានគាំទ្រលោក Donald Trump បេក្ខជននាំមុខគេខាងគណបក្សសាធារណរដ្ឋ។
នៅក្នុងសន្និសីទកាសែតមួយនៅក្នុងរដ្ឋ Florida លោក Carson ដែលជាវេជ្ជបណ្ឌិតវះកាត់សរសៃប្រសាទចូលនិវត្តន៍បាននិយាយថា លោកបាននិយាយជាមួយលោក Trump ហើយយល់ថា «មានការត្រូវគ្នាទាំងខាងទស្សនវិជ្ជា និងខាងជំនឿសាសនាច្រើនជាងការខ្ញុំបានគិតពីពេលមុន»។
លោក Trump បានណែនាំខ្លួនទៅលោក Carson ដោយបានពណ៌នាលោកថាជា «បុគ្គលពិសេស» ម្នាក់និងជា «មិត្ត» ម្នាក់។
បុរសទាំងពីរនាក់នេះបាននិយាយថា អស់លោកបានធ្វើចលនាហួសពីការរិះគន់គ្នាទៅវិញទៅមកនៅក្នុងការឃោសនាបោះឆ្នោត។ លោក Carson បានថ្លែងថា «យើងត្រូវគ្នាវិញហើយ។ នោះជារឿងនយោបាយ»។
នៅពេលនេះលោក Trump បានទទួលការគាំទ្រពីអតីតអ្នកប្រជែងពីរនាក់។លោក Chris Christie អតីតអភិបាលរដ្ឋ New Jersey បានគាំទ្រលោក Trump កាលពីខែមុន។
លោក Carson បានបញ្ឈប់ការឃោសនាបោះឆ្នោតរបស់លោកកាលពីដើមខែមីនានៅក្រោយលោកបានទទួលលទ្ធផលនាំឱ្យស្រងាកចិត្តនៅក្នុងការប្រកួតប្រជែងដើម្បីទទួលការតែងតាំងជាបេក្ខជនប្រធានាធិបតីខាងគណបក្សសាធារណរដ្ឋ។
ការគាំទ្ររបស់់លោក Carson ដល់លោក Trump ធ្វើឡើងនៅមុនការបោះឆ្នោតបឋមក្នុងរដ្ឋ Florida នៅថ្ងៃអង្គារក្រោយ។ រដ្ឋនេះជារង្វាន់ធំមួយក្នុងបណ្តារង្វាន់ធំៗនៅក្នុងការប្រកួតប្រជែងដើម្បីតំណែងប្រធានាធិបតីស.រ.អា.នៅឆ្នាំ២០១៦។បេក្ខជនណាម្នាក់ដែលមានសន្លឹកឆ្នោតគាំទ្រច្រើននឹងទទួលប្រតិភូទាំងអស់របស់រដ្ឋនេះដែលជាការចាំបាច់សម្រាប់ទទួលការតែងតាំងពីគណបក្សសាធារណរដ្ឋ។ ការស្ទង់មតិបញ្ជាក់ថាលោក Trump នាំមុខគេនៅក្នុងរដ្ឋ Florida ខាងគណបក្សសាធារណរដ្ឋ៕
