អ្នកសារព័ត៌មានខ្មែរចាស់វស្សាមួយរូបនិងជាអតីតអ្នកសារព័ត៌មាន The Cambodia Daily បានលាចាកលោកដោយបន្សល់ទុកនូវស្នាដៃ និងកិច្ចខិតខំប្រឹងប្រែងជាច្រើនសម្រាប់អ្នកសារព័ត៌មានជំនាន់ក្រោយ។
លោក សាំង សុឥន្ទរិទ្ធ វ័យ៥៥ឆ្នាំ បានប្រកបអាជីពជាអ្នកសារព័ត៌មានអស់រយៈពេលជាង ២០ឆ្នាំហើយលោកបានសរសេររបាយការណ៍ជាច្រើនពាក់ព័ន្ធនឹងបញ្ហាអភិបាលកិច្ច និងអំពើពុករលួយក្នុងសង្គមកម្ពុជា។ បន្ថែមពីនេះទៀត លោកសុឥន្ទរិទ្ធជាសមាជិកស្ថាបនិកមួយរូបនៃក្លឹបអ្នកកាសែតកម្ពុជា ដែលជាអង្គការក្រៅរដ្ឋាភិបាលមានគោលដៅការពារផលប្រយោជន៍របស់អ្នកសារព័ត៌មាន និងលើកកម្ពស់គុណភាពនៃការធ្វើរបាយការណ៍ព័ត៌មាននៅកម្ពុជា។ លោកសុឥន្ទរិទ្ធបានទទួលមរណភាព ដោយសារជំងឺខូចក្រលៀនកាលពីថ្ងៃសៅរ៍ ក្រោយប្រឈមនឹងជំងឺទឹកនោមផ្អែមអស់ជាង១០ឆ្នាំមកនេះ។
លោក សាំង សិលា កូនប្រុសច្បងរបស់លោក សាំង សុឥន្ទរិទ្ធ បានប្រាប់ VOA ថា ឪពុករបស់លោកជាអ្នកស្រឡាញ់សង្គមជាតិមួយហើយតែងតែប្រឹងប្រែងដើម្បីជួយសង្គមតាមលទ្ធភាពដែលខ្លួនអាចធ្វើបាន។
«ខ្ញុំសរសើរគាត់ថា គាត់មានមនសិការស្នេហាសង្គមជាតិគាត់ខ្លាំងណាស់បង។ គាត់សុខចិត្តអត់មានអីសោះក៏បានដែរឲ្យតែឃើញសង្គមគាត់ អ្នកក្មេងៗនៅស្រុកកំណើតគាត់មានចំណេះចេះដឹង។ គាត់ថា បើគាត់ជួយអត់បានច្រើន ក៏គាត់ជួយបណ្តុះពីក្មេងៗឲ្យស្រឡាញ់ប្រទេសខ្លួនឯងដែរ។ ប៉ាគាត់តែងប្រាប់ខ្ញុំថា ធ្វើអីក៏ដោយ កុំច្រាបាច់កគេ ដើម្បីតែសប្បាយខ្លួនឯង»។
ក្រៅពីអាជីពជាអ្នកសារព័ត៌មាន លោក សាំង សុឥន្ទរិទ្ធ ក៏បានធ្វើជាគ្រូបង្រៀនភាសាអង់គ្លេស កុំព្យូទ័រ ដោយឥតគិតថ្លៃ និងជាអ្នកជួយជ្រោមជ្រែងសាងសង់សាលារៀនខ្នាតតូចមួយដល់កុមារក្រីក្រនៅក្នុងស្រុកកណ្តាលស្ទឹង ខេត្តកណ្តាល ជាទីដែលលោកធ្លាប់រស់នៅក្នុងរបបពលពត។
លោក សាំង សុឥន្ទរិទ្ធ គឺជាក្មេងកំព្រាមួយរូបក្រោយរបបខ្មែរក្រហម ហើយលោកបានតស៊ូរៀនសូត្រក្រោមការជួយឧបត្ថម្ភរបស់ព្រះសង្ឃ។ លោកបានទទួលអាហារូបករណ៍ទៅសិក្សានៅសហភាពសូវៀតនៅចុងទសវត្សរ៍១៩៨០ មុនពេលចូលបម្រើការជាអ្នកសារព័ត៌មាននៅអំឡុងទសវត្សរ៍១៩៩០។
នៅក្នុងរបាយការណ៍ព័ត៌មានមួយរបស់ទីភ្នាក់ងារព័ត៌មាន BBC ពីការកាត់ទោសមេដឹកនាំខ្មែរក្រហមក្នុងឆ្នាំ២០១០ លោក សុឥន្ទរិទ្ធ ដែលបាត់បង់ឪពុកម្តាយបង្កើតក្នុងរបបប្រល័យពូជសាសន៍ខ្មែរក្រហមបានប្រាប់ BBC ថា៖
«ការដាក់ទោសទៅលើអ្នកប្រព្រឹត្តខុសគឺលែងសំខាន់ទៀតហើយ ពីព្រោះថា អ្នកដែលនៅរស់មួយចំនួនបានស្លាប់ទៅហើយ។ ៣០សិបឆ្នាំ គឺយូរអង្វែងណាស់នៅក្នុងការរង់ចាំយុត្តិធម៌។ ខ្ញុំមិនខ្វល់ខ្វាយពីការដាក់ទោសនោះទេ។ អ្វីដែលខ្ញុំខ្វល់ខ្វាយនោះគឺការពិតទៅវិញទេ»។
លោកបានបន្ថែមថា៖
«ខ្ញុំចង់សួរទៅមេដឹកនាំជាន់ខ្ពស់នៃរបបខ្មែរក្រហមថា ហេតុអ្វីបានជាពួកគេសម្លាប់មនុស្សជាច្រើនដូច្នេះ ហេតុអ្វីបានជាពួកគេបំផ្លាញប្រព័ន្ធគ្រប់គ្រងប្រទេស នរណាបញ្ជាពួកគេ ហេតុអ្វីបានជាពួកគេសម្លាប់ជាតិខ្លួនឯង ហេតុអ្វីបានជាពួកគេចាត់ទុកប្រទេសជាតិជាសត្រូវរបស់ខ្លួន។ ខ្ញុំចង់បានចម្លើយទៅលើសំណួរទាំងនេះ»។
មុនពេលលោកទទួលមរណភាព លោក សាំង សុឥន្ទរិទ្ធបានប្រឈមនឹងជំងឺទឹកនោមផ្អែម ហើយលោកត្រូវធ្វើការលាងឈាមជាប្រចាំនៅក្នុងរយៈពេលបីឆ្នាំកន្លងមកនេះ។ ដោយសារតែគ្រួសារលោកខ្សត់ខ្សោយផ្នែកធនធាន លោកសុឥន្ទរិទ្ធបានទទួលជំនួយពីសំណាក់សមាជិករួមការងារ អ្នកកាសែតក្នុងស្រុក និងក្រៅស្រុក មន្រ្តីក្នុងជួររដ្ឋាភិបាល និងលោកនាយករដ្ឋមន្រ្តី ហ៊ុន សែនផងដែរ៕
