លោក នឹម ឈុន្នី ជាគ្រូបង្វឹកផ្នែកសមាធិដ៏មានប្រជាប្រិយភាពម្នាក់នៅកម្ពុជា។ កាលពីប្រាំពីរឆ្នាំមុន ក្មួយស្រីរបស់លោកមិនអាចដើរបានដូចធម្មតា ហើយមិនទទួលបានការព្យាបាលដែលមានប្រសិទ្ធភាពនោះទេ។ ក្រោយមកនាងត្រូវបានបញ្ជូនទៅមន្ទីរពេទ្យកុមារអង្គរនៅខេត្តសៀមរាប។ បន្ទាប់ពីទទួលបានការព្យាបាលនៅទីនោះ ក្មួយស្រីរបស់លោកបានជាសះស្បើយ និងអាចដើរបានធម្មតា3ដូចកុមារដទៃទៀត។
ការណ៍នេះហើយជាកត្តាជំរុញចិត្តលោកឲ្យសម្រេចធ្វើការរត់ដើម្បីរៃអង្គាសប្រាក់សប្បុរសធម៌ជូនមន្ទីរពេទ្យកុមារអង្គរ ដើម្បី «ស្នាមញញឹមជាមួយនឹងកុមារ និងឪពុកម្តាយកុមារដទៃទៀត»។
លោក នឹម ឈុន្នី ដែលជាសហស្ថាបនិកក្រុមហ៊ុនបណ្តុះបណ្តាល Vipassa នឹងចាប់ផ្តើមការរត់ពីទីក្រុងភ្នំពេញទៅកាន់ទីរួមខេត្តសៀមរាបក្នុងរយៈពេល១០ថ្ងៃ ចាប់ពីថ្ងៃទី១៥ ដល់ថ្ងៃទី២៥ ខែធ្នូ ខាងមុខនេះ។ លោកបានប្រាប់ VOA ថា ការរត់នេះនឹងជារឿងលំបាកមួយ ប៉ុន្តែជាមួយនឹងការប្តេជ្ញាចិត្ត លោករំពឹងថា នឹងសម្រេចវាបាន។
លោក នឹម ឈុន្នី បានថ្លែងយ៉ាងដូច្នេះថា៖ «អញ្ចឹងខ្ញុំក៏សម្រេចចិត្តថា រត់តែម្តង ពីព្រោះវាជាការងារលំបាកមួយ។ ហើយមួយទៀត ខ្ញុំគិតថា ក្នុងនាមជាមនុស្ស ទោះបីជាកិច្ចការលំបាកយ៉ាងណាក៏ដោយឲ្យតែយើងចង់ធ្វើមែនទែន យើងមានសក្តានុពលក្នុងការធ្វើវា»។
គ្រូបង្វឹកផ្នែកសមាធិដែលមានវ័យ ៣៨ឆ្នាំ និងមានស្រុកកំណើតមកពីខេត្តកំពង់ចាមបាននិយាយថា លោក នឹម ឈុន្នី សង្ឃឹមថា លោកនឹងអាចរៃអង្គាសប្រាក់ពីសកម្មភាពរត់ដើម្បីសប្បុរសធម៌បានចំនួនមួយសែនដុល្លារអាមេរិក។ លោកបានបន្តថា ទឹកប្រាក់សប្បុរសធម៌ដែលបានពីការរត់នេះនឹងអាចជួយព្យាបាលកុមាររាប់ពាន់នាក់នៅកម្ពុជា។
លោក នឹម ឈុន្នី បានថ្លែងទៀតថា៖ «គោលបំណងគឺរៃអង្គាសថវិកាចំនួនមួយសែនដុល្លារ។ ហើយបើតាមការជជែកពិភាក្សាជាមួយពេទ្យទៅ មន្ទីរពេទ្យកុមារអង្គរព្យាបាលក្មេងមួយថ្ងៃពី៤០០ទៅ៥០០នាក់។ ពួកគាត់អាចចំណាយពី១០ទៅ១៥ដុល្លារ[ក្នុងការព្យាបាលកុមារម្នាក់]។ ដូច្នេះមួយសែនដុល្លារហ្នឹង ខ្ញុំគិតថា អាចជួយក្មេងបានដល់ទៅរាប់ពាន់នាក់»។
អ្នកស្រី ស៊ិន កេតអារុណ ប្រធានការិយាល័យទំនាក់ទំនងសាធារណៈរបស់មន្ទីរពេទ្យកុមារអង្គរ បានប្រាប់ VOA ថា គម្រោងថវិកាប្រចាំឆ្នាំរបស់មន្ទីរពេទ្យកុមារអង្គរមានប្រមាណពី៦ទៅ៦លាន៥សែនដុល្លារអាមេរិក។ អ្នកស្រីបានលើកឡើងថា បច្ចុប្បន្ន មន្ទីរពេទ្យនេះទទួលបានប្រាក់ជំនួយពីបរទេសចំនួន៨៥% និងទទួលបានពីរដ្ឋាភិបាលកម្ពុជាចំនួន៥%។ ចំណែកឯថវិកាចំនួន១០%ដែលនៅសេសសល់ មន្ទីរពេទ្យត្រូវប្រឹងប្រែងស្វែងរកថវិកាដោយខ្លួនឯងតាមរយៈការរៃអង្គាស។
អ្នកស្រី ស៊ិន កេតអារុណ បានមានប្រសាសន៍ថា៖ «អញ្ចឹងអ្វីដែលថាជា កង្វះខាតរបស់មន្ទីរពេទ្យកុមារអង្គរគឺ យើងត្រូវការថវិកាដើម្បីឲ្យមន្ទីរពេទ្យមាននិរន្តភាពតែម្តង»។
អ្នកស្រី ស៊ិន កេតអារុណ បានលើកឡើងទៀតថា អ្នកស្រីស្គាល់លោក នឹម ឈុន្នី ជាង៦ឆ្នាំមកហើយ តាមរយៈវគ្គបង្រៀន«ភាពជាអ្នកដឹកនាំ»។ នៅពេលនោះអ្នកស្រីបានណែនាំឲ្យលោក នឹម ឈុន្នី ក្លាយជាសមាជិកក្រុមប្រឹក្សាផ្នែកទំនាក់ទំនងសាធារណៈរបស់មន្ទីរពេទ្យកុមារអង្គរ។ អ្នកស្រីសង្ឃឹមថា សកម្មភាពរៃអង្គាសប្រាក់សប្បុរសធម៌នឹងមានដំណើរការទៅដោយរលូន ក្រោមការតាំងចិត្ត និងប្តេជ្ញាចិត្តរបស់លោក នឹម ឈុន្នី។
លោក នឹម ឈុន្នី បានលើកឡើងថា ការរត់ដើម្បីរៃអង្គាសប្រាក់សប្បុរសធម៌នេះជាសកម្មភាពសប្បុរសធម៌ដែលលោកមានគំនិតផ្តួចផ្តើមដោយខ្លួនឯងជាលើកដំបូង ដោយមានការលើកទឹកចិត្តពីមិត្តភក្តិនិងអ្នកស្គាល់គ្នា។ លោកសង្ឃឹមថា សកម្មភាពសប្បុរសធម៌នេះជាមធ្យោបាយមួយដែលអាចជំរុញឬទាក់ទាញសប្បុរសជនឲ្យចូលរួមចំណែកផ្តល់ការបរិច្ចាគផ្សេងៗ។
លោកបានថ្លែងយ៉ាងដូច្នេះថា៖ «ខ្ញុំជឿថា ជាការជំរុញលើកទឹកចិត្តដល់បងប្អូនប្រជាពលរដ្ឋដែលចង់ជួយអ្នកដទៃ ឬចង់ជួយមន្ទីរពេទ្យផ្សេងៗនៅក្នុងព្រះរាជាណាចក្រកម្ពុជា ពីព្រោះខ្ញុំជឿថា វាជាចរន្តមួយដែលធ្វើឲ្យគាត់ងាយស្រួលក្នុងការយកប្រាក់ទៅឧបត្ថម្ភតាមមន្ទីរពេទ្យផ្សេងៗ»។
លោក មាស សំណាង ដែលជាជើងឯកខាងប្រណាំងកង់មួយរូប ប្រាប់ VOAថា លោកស្គាល់លោក នឹម ឈុន្នី អស់រយៈពេលជាង១៥ឆ្នាំមកហើយ។ លោក មាស សំណាង គាំទ្រសកម្មភាពរៃអង្គាសប្រាក់សប្បុរសធម៌ ដែលលោក នឹម ឈុន្នី បានផ្តួចផ្តើមឡើង។
លោក មាស សំណាង បានថ្លែងថា៖ «ខ្ញុំគិតថា គំនិតរបស់គាត់គឺល្អមែនទែន។ គាត់យកបេះដូងរបស់គាត់ហ្នឹងទៅរកលុយដើម្បីជួយក្មេងមានជំងឺផ្សេងៗ។ ដូចពេទ្យនៅស្រុកខ្មែរយើង ភាគច្រើនគាត់អស់លុយច្រើន។ អញ្ចឹងគាត់យកបេះដូងគាត់ហ្នឹងរៃអង្គាសប្រាក់តាមមិត្តភក្តិ ឬអ្នកនៅជុំវិញពិភពលោកហ្នឹង ដើម្បីទៅបរិច្ចាគឲ្យមន្ទីរពេទ្យកុមារអង្គរ»។
ជើងឯកខាងប្រណាំងកង់ លោក មាស សំណាង នឹងរួមដំណើរជាមួយលោក នឹម ឈុន្នី នៅក្នុងការរត់រៃអង្គាសប្រាក់សប្បុរសធម៌នេះ ដោយលោកនឹងជិះនាំផ្លូវខាងមុខ។
លោក មាស សំណាង ក៏បានអំពាវនាវឲ្យមានការចូលរួមចំណែកពីសាធារណជនក្នុងសកម្មភាពសប្បុរសធម៌នេះដើម្បីបុព្វហេតុកុមារកម្ពុជាផងដែរ៕
