ជនសង្ស័យថាជាមេក្លោងគ្រឿងញៀន២នាក់ត្រូវបានចាប់ខ្លួន ក្នុងយុទ្ធនាការបង្ក្រាបគ្រឿងញៀនទ្រង់ទ្រាយធំជាង៥០គីឡូក្រាមជាលើកទី១ ដែលមានតម្លៃប្រមាណជា៧០ម៉ឺនដុល្លារ នៅរាជធានីភ្នំពេញ។ នេះបើតាមការឲ្យដឹងពីមន្រ្តីអាជ្ញាធរប្រយុទ្ធប្រឆាំងគ្រឿងញៀន។
លោក មាស វិរិទ្ធ អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀនប្រាប់ VOAនៅថ្ងៃអាទិត្យ ថា ការបង្រ្កាបបានគ្រឿងញៀនចំនួនជាង៥០គីឡូក្រាមនេះ គឺជាចំនួនដ៏ច្រើនបំផុតដែលសមត្ថកិច្ចចាប់បានក្នុងពេលកន្លងមក។ លោកបន្ថែមថា បើតាមការប៉ាន់ស្មានរបស់អាជ្ញាធរ គ្រឿងញៀនជាង៥០គីឡូក្រាមនេះ មានតម្លៃប្រហែលជាជាងកន្លះលានដុល្លារសហរដ្ឋអាមេរិក។
លោកមានប្រសាសន៍ថា៖
«បើគិតជាតម្លៃតាមទីផ្សារនៅកន្លែងផលិតនៅតំបន់ត្រីកោណ ប្រហែលជាជាងកន្លះលាន ប្រហែលជា៧០ម៉ឺនដុល្លារ»។
ក្នុងសន្និសីទសារព័ត៌មាន បង្ហាញលទ្ធផលបឋមនៃការបង្ក្រាបករណីជួញដូរគ្រឿងញៀនឆ្លងដែនជាង៥០គីឡូក្រាម កាលពីថ្ងៃសៅរ៍កន្លងទៅ មន្រ្តីមានសមត្ថកិច្ចថ្លែងថា កាលពីដើមសប្តាហ៍កន្លងទៅក្រសួងមហាផ្ទៃបានបើកការស៊ើបអង្កេតទ្រង់ទ្រាយធំមួយជាបន្ទាន់បន្ទាប់ពីរកឃើញគ្រឿងញៀនជាង៥០គីឡូក្រាមនៅក្នុងផ្ទះមួយកន្លែងស្ថិតក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។ កងកម្លាំងសមត្ថកិច្ចជំនាញក៏បានបើកការស៊ើបអង្កេតជាបន្តបន្ទាប់ រហូតឈានដល់ការឃាត់ខ្លួនម្ចាស់សណ្ឋាគាររតនៈសម្បត្តិ ក្នុងខេត្តរតនគិរី ឈ្មោះ ស៊ី ឡាឡយ ជាជនជាតិខ្មែរដើមកំណើតជនជាតិភាគតិចឡាវ កាលពីរសៀលថ្ងៃទី១៨ ខែឧសភា ដោយសង្ស័យថាជាមេខ្លោងជួញដូរគ្រឿងញៀន។
ឧត្តមសេនីយ៍ឯក ម៉ក់ ជីតូ បញ្ជាក់ក្នុងសន្និសីទសារព័ត៌មានកាលពីថ្ងៃសៅរ៍ថា គ្រឿងញៀនភាគច្រើនហូរចូលមកពីប្រទេសឡាវ ហើយកម្ពុជាជាប្រទេសដែលរងគ្រោះដោយគ្រឿងញៀន ដោយសារបរទេសយកធ្វើជាទីតាំងដើម្បីឆ្លងកាត់ និងចែកចាយបន្តទៅកាន់ប្រទេសជិតខាង។ ទោះជាយ៉ាងណាលោកថា សមត្ថកិច្ចកំពុងបន្តតាមដានដើម្បីស្វែងរកអ្នកដែលពាក់ព័ន្ធបន្ថែម។
លោក ម៉ក់ ជីតូ អគ្គស្នងការរងនគរបាលជាតិថ្លែងថា៖
«មានអាជ្ញាធរជាតិប្រយុទ្ធប្រឆាំងគ្រឿងញៀន អគ្គស្នងការនគរបាលជាតិ មេបញ្ជាការកងរាជអាវុធហត្ថលើផ្ទៃប្រទេសមានព្រះរាជអាជ្ញា និងអគ្គនាយករងនៃអគ្គនាយកដ្ឋានកិច្ចការអយ្យការព្រហ្មទណ្ឌ មានខាងនាយកមន្ទីរពិសោធន៍របស់អាជ្ញាធរប្រឆាំងគ្រឿងញៀន នាយកមន្រ្តីពិសោធន៍ក្រសួងសុខាភិបាល ដើម្បីគាត់រៀបចំពិនិត្យឲ្យច្បាស់។ ទី១តើសារធាតុហ្នឹងជាសារធាតុអី?ទី២ កំណត់ឲ្យដឹងថាតើមានសុទ្ធប៉ុន្មានភាគរយ? ព្រោះច្បាប់របស់យើង ការផ្តន្ទាទោសជនល្មើសពាក់ព័ន្ធគ្រឿងញៀន គឺផ្អែកលើបរិមាណនិងភាពសុទ្ធ។ អញ្ចឹងយើងវាយតម្លៃច្បាស់បញ្ជូនទៅតុលាការ បញ្ជូនទៅព្រះរាជអាជ្ញាដើម្បកាត់ទោសឲ្យបានត្រឹមត្រូវ»។
ឧត្តមសេនីយ៍ឯក ម៉ក់ ជីតូ លើកឡើងថា ការចាប់បានគ្រឿងញៀនជាង៥០គីឡូក្រាមដែលមានដូចជា មេតំហ្វេតាមីន ហេរ៉ូអ៊ីន និងប្រភេទថ្នាំគ្រាប់ជាច្រើនម៉ឺនគ្រាប់ដែលចាប់បាននេះ ជាករណីរក្សាទុក និងជួញដូរឆ្លងដែនដែលមានការចាត់តាំង។ លោកបន្ថែមថា ក្នុងករណីបង្រ្កាបគ្រឿងញៀនទ្រង់ទ្រាយធំនៅបីទីតាំងនេះ សមត្ថកិច្ចចាប់បានជនសង្ស័យជាមេក្លោងចំនួន២នាក់ ដែលនឹងបញ្ជូនទៅតុលាការដើម្បីផ្តន្ទាទោសតាមច្បាប់។
លោក ម៉ក់ ជីតូ បន្ថែមថា ក្រសួងមហាផ្ទៃបានសម្រេចបង្កើតក្រុមការងារចំពោះកិច្ចដែលមានការចូលរួមពីក្រុមជំនាញដើម្បីវិភាគពីសារធាតុដែលចាប់បាន ក្នុងការកំណត់ពីចំនួនគ្រឿងញៀនសុទ្ធដើម្បីឲ្យតុលាការកាត់ទោសឲ្យបានត្រឹមត្រូវ។
មាត្រា៤០ នៃច្បាប់ស្តីពីការត្រួតពិនិត្យគ្រឿងញៀន ចែងថាត្រូវផ្តន្ទាទោសដាក់ពន្ធនាគារពី២០ ទៅ៣០ឆ្នាំ ឬអស់មួយជីវិត ក្នុងករណីរក្សាទុកដឹកជញ្ជូនឬជួញដូរដោយខុសច្បាប់ នូវសារធាតុញៀនប្រភេទហេរ៉ូអ៊ីន មានបរិមាណសុទ្ធចាប់ពី៨០ក្រាមឡើងទៅ និងមេតំហ្វេតាមីនបរិមាណសុទ្ធចាប់ពី២៤០ក្រាមឡើងទៅ។
លោក យ៉ង់ គឹមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍និងសន្តិភាពបានសាទរចំពោះការបង្ក្រាបគ្រឿងញៀនទ្រង់ទ្រាយធំរបស់អាជ្ញាធរនេះ។ ទោះជាយ៉ាងណាលោកថា ចំនួនគ្រឿងញៀនដ៏ច្រើនបែបនេះបង្ហាញថា កម្ពុជាកំពុងប្រឈមនឹងបញ្ហាដែលជះឥទ្ធិពលដោយសារគ្រឿងញៀន ដែលលោកថា រដ្ឋាភិបាលត្រូវប្តេជ្ញាបង្ក្រាប និងទប់ស្កាត់ឲ្យមានប្រសិទ្ធភាព។
លោកមានប្រសាសន៍ថា៖
«បើសិនជាអាជ្ញាធរបង្រ្កាបបានកាន់តែច្រើនបានទ្រង់ទ្រាយធំបញ្ហាគ្រឿងញៀននៅក្នុងប្រទេសកម្ពុជាប្រហែលអាចនឹងជាថយចុះ។ ហើយជាឱកាសមួយច្រើនសម្រាប់ការអភិវឌ្ឍសង្គម អាចកាត់បន្ថយបងធំ ហើយជាមួយគ្នានោះទៀតសោត ឪពុកម្តាយទាំងអស់លែងសូវបារម្ភពីរឿងកូនធ្លាក់ចូលទៅក្នុងអន្ទាក់គ្រឿងញៀន។ ប៉ុន្តែអាជ្ញាធរត្រូវតែប្រឹងប្រែងធ្វើឲ្យបានខ្លាំងក្លាទៅទៀត ពីព្រោះថា៥០គីឡូនេះមិនទាន់អស់ទេ គឺនៅសល់ច្រើនទៀត ដែលត្រូវបន្តបង្រ្កាបឲ្យកាន់តែសកម្មថែមទៀត»។
បើតាមរបាយការណ៍របស់អគ្គស្នងការនគរបាលជាតិ រយៈពេលជាង៤ខែនៃការដាក់ចេញយុទ្ធនាការបង្រ្កាបគ្រឿងញៀន គិតពីខែមករាដល់ថ្ងៃទី២០ ខែឧសភាកម្លាំងសមត្ថកិច្ចបង្ក្រាបគ្រឿងញៀនបានចំនួន៣,៥៦២ករណីឃាត់ខ្លួនមនុស្សជាង៨ពាន់នាក់ និងដកហូតថ្នាំញៀនបានជាង ១០០គីឡូក្រាម៕
