ស្ថានបេសកកម្មអចិន្រ្តៃយ៍កម្ពុជានៅទីក្រុងហ្សឺណែវនៃប្រទេសស្វីសបានចាត់ទុកការព្រួយបារម្ភរបស់អ្នករាយការណ៍ពិសេសអង្គការសហប្រជាជាតិ គឺជាការ«បង្អាក់បេសកកម្ម»ក្នុងការជួយសង្រ្គោះជីវិតរបស់ពលរដ្ឋកម្ពុជាពីជំងឺកូវីដ១៩។ នេះបើយោងតាមសេចក្តីថ្លែងការណ៍មួយចេញផ្សាយកាលពីថ្ងៃអង្គារ ជាការឆ្លើយតបនឹងការព្រួយបារម្ភរបស់អ្នកជំនាញសិទ្ធិមនុស្ស៤នាក់របស់អង្គការសហប្រជាជាតិ(អ.ស.ប.) ខណៈកម្ពុជាកំពុងប្រើប្រាស់វិធានការតឹងរ៉ឹងប្រឆាំងនឹងជំងឺកូវីដ១៩ ដែលកំពុងឆ្លងក្នុងប្រទេសយ៉ាងធ្ងន់ធ្ងរ។
កាលពីថ្ងៃច័ន្ទ ក្រុមអ្នកជំនាញខាងសិទ្ធិមនុស្សអ.ស.ប. បានចេញសេចក្តីថ្លែងការណ៍មួយ ដោយបង្ហាញកង្វល់យ៉ាងខ្លាំងអំពីវិធានការរបស់រដ្ឋាភិបាលកម្ពុជាប្រឆាំងនឹងជំងឺកូវីដ១៩ដ៏តឹងរ៉ឹង ពីព្រោះវាបានប៉ះពាល់សិទ្ធិមនុស្សជាមូលដ្ឋានរួមទាំង«សេរីភាពដើរហើរ» «សិទ្ធិជួបប្រជុំដោយសន្តិវិធី» និង«សិទ្ធិការងារ»។
ក្រុមអ្នកជំនាញសិទ្ធិមនុស្សអ.ស.ប ទាំងនោះ គឺមានលោកស្រី Rhona Smith អ្នករាយការណ៍ពិសេសស្តីពីស្ថានភាពសិទ្ធិមនុស្សនៅកម្ពុជា និងអ្នកជំនាញ៣នាក់ទៀត ដែលជាអ្នករាយការណ៍ពិសេសស្តីពីសិទ្ធិជួបជុំដោយសន្តិវិធីនិងសិទ្ធិសមាគម អ្នករាយការណ៍ពិសេសស្តីពីសិទ្ធិឯកជន និងអ្នករាយការណ៍ពិសេសស្តីពីសិទ្ធិជនគ្រប់រូបក្នុងការទទួលបានកម្រិតជីវភាពរស់នៅខ្ពស់បំផុតផ្នែកសុខភាពផ្លូវកាយ និងសុខភាពផ្លូវចិត្ត។
ពួកគេបាននិយាយនៅក្នុងសេចក្តីថ្លែងការណ៍មួយថា៖ «ការរឹតត្បិតលើសេរីភាព និងសិទ្ធិជាមូលដ្ឋានដោយផ្អែកលើសុខភាពសាធារណៈមិនត្រូវរំលោភសិទ្ធិសេរីភាពដែលបានធានាដោយច្បាប់សិទ្ធិមនុស្សអន្តរជាតិឡើយ»។
ពួកគេបន្ថែមថា៖ «យើងមានកង្វល់ថាវិធានការរដ្ឋបាលនិងវិធានការព្រហ្មទណ្ឌរួមទាំងការដាក់ពន្ធនាគាររយៈពេលវែងហួសហេតុនិងការពិន័យជាប្រាក់ដែលមានចែងក្នុងច្បាប់នេះ ទំនងជាមិនមានសមាមាត្រនិងមិនចាំបាច់ឡើយ។ វិធានការដែលបានចាត់ឡើងសំដៅប្រយុទ្ធប្រឆាំងនឹងការឆ្លងរាលដាល រួមទាំងទោសទណ្ឌដែលអាចមាន គួរតែធ្វើក្នុងករណីចាំបាច់ ហើយមិនត្រូវប្រើប្រាស់ហួសហេតុឡើយ»។
ជាការឆ្លើយតប តំណាងរដ្ឋាភិបាលកម្ពុជាបានសេចក្តីថ្លែងការណ៍មួយនៅថ្ងៃអង្គារ ដោយការពារថាការប្រយុទ្ធប្រឆាំងរបស់កម្ពុជាទៅនឹងការរាតត្បាតជំងឺកូវីដ១៩ «គោរពតាមគោលការណ៍នីត្យានុកូលភាព ភាពចាំបាច់និងសមាមាត្រ»។
តំណាងរដ្ឋាភិបាលក៏បានបង្ហាញ«ការខកចិត្តយ៉ាងខ្លាំង»ចំពោះការព្រួយបារម្ភរបស់អ្នករាយការណ៍ពិសេស ដោយថាអ្នកជំនាញសិទ្ធិមនុស្សទាំងនោះ«បានមើលរំលងនូវទិដ្ឋភាពជារួមទាំងមូលនៃការប្រយុទ្ធប្រឆាំងរបស់កម្ពុជាទៅនឹងមេរោគកូវីដ១៩»។
សេចក្តីថ្លែងការណ៍ឲ្យដឹងថា៖« អ្នកជំនាញខាងលើដែលមិនមែនជាបុគ្គលិករបស់អង្គការសហប្រជាជាតិ ប៉ុន្តែបម្រើការងារក្នុងសមត្ថភាពផ្ទាល់ខ្លួន តែងតែមានអារម្មណ៍ថា អ្វីៗគួរធ្វើទៅតាមរបៀបផ្សេង ដោយផ្អែកលើទស្សនៈផ្ទាល់ខ្លួនរបស់ពួកគាត់»។
តំណាងរដ្ឋាភិបាលបញ្ជាក់ថា៖ «អ្នករាយការណ៍ពិសេសត្រូវទទួលស្គាល់នូវអាទិភាពនិងបំពេញតួនាទីរបស់ខ្លួនដោយទំនួលខុសត្រូវ តាមរយៈការជួយបំពេញបន្ថែមនៅកន្លែងផ្ទាល់ ជាជាងការបង្អាក់ដល់បេសកកម្មសង្គ្រោះជីវិតនិងទប់ស្កាត់ការឆ្លងរីករាលដាលនៃជំងឺដ៏កាចសាហាវនេះក្នុងសហគមន៍»។
តំណាងរដ្ឋាភិបាល ក៏បានបញ្ជាក់ក្នុងសេចក្តីថ្លែងការណ៍បន្ថែមថារដ្ឋាភិបាលតែងតែទទួលខុសត្រូវទាំងស្រុង ចំពោះរាល់ការសម្រេចចិត្តរបស់ខ្លួន ដោយផ្អែកលើការវាយតម្លៃអំពីហានិភ័យ ជាមួយវិធាននិងលក្ខណៈវិនិច្ឆ័យច្បាស់លាស់។
សេចក្តីថ្លែងការណ៍បញ្ជាក់ថា៖ «ការសម្តែងក្តីព្រួយបារម្ភទៅលើច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ១៩ គឺជាបុរេវិនិច្ឆ័យ និងជាការបំផ្លើស។ ច្បាប់នេះពុំមានគោលបំណងដាក់ទោសទណ្ឌទៅលើបុគ្គលណាម្នាក់នោះទេ ប៉ុន្តែ ផ្ទុយទៅវិញ គឺដើម្បីលើកទឹកចិត្តឲ្យមានការចូលរួមប្រកបដោយទំនួលខុសត្រូវខ្ពស់ពីពលរដ្ឋគ្រប់រូប ក្នុងកិច្ចប្រឹងប្រែង ដើម្បីធានាសុខភាពសាធារណៈនិងជីវិតដ៏មានតម្លៃរបស់បុគ្គលគ្រប់រូប»។
លោក ស៊ឹង សែនករុណា អ្នកនាំពាក្យសមាគមសិទ្ធិមនុស្សអាដហុក មានប្រសាសន៍ថា អ្នកជំនាញអង្គការសហប្រជាជាតិជាធម្មតាមើលឃើញពីការខ្វះខាតលើការគោរពសិទ្ធិមនុស្សក្នុងបញ្ហាជំងឺកូវីដ១៩ ទៅតាមគោលការណ៍គោរពសិទ្ធិមនុស្សអន្តរជាតិ។
លោកបញ្ជាក់ថា៖ «ការលើកឡើងទាំងអស់ ការរិះគន់ពាក់ព័ន្ធបញ្ហាសិទ្ធិមនុស្សទាំងអស់នេះ ក៏ដើម្បីឲ្យរដ្ឋាភិបាលមានការគិតគូទៅលើការគោរពសិទ្ធិរបស់ពលរដ្ឋខ្លួនដែរ»។
លោកបន្តថាការរិះគន់នៅពេលកម្ពុជាកំពុងប្រឈមជំងឺកូវីដ១៩ គឺដើម្បីធានាឲ្យមានការអនុវត្តត្រឹមត្រូវ។
លោកបន្ថែមថា៖ «ពីព្រោះគេខ្លាចមានការអនុវត្តរបស់រដ្ឋាភិបាលហ្នឹង វាកាន់តែប្រាសចាកពីការគោរពសិទ្ធិមនុស្ស ពីព្រោះស្ថានភាពបែបហ្នឹងហើយដែលUNហ្នឹង គេរឹតតែពិនិត្យទៅទៀត ពីព្រោះវាអាចធ្វើឲ្យមានការដោះស្រាយបញ្ហាទាំងអស់ហ្នឹង វាមិនសមស្របទៅលើការគោរពសិទ្ធិរបស់ប្រជាពលរដ្ឋរបស់ខ្លួនឯង»។
ក្រុមអ្នកជំនាញសិទ្ធិមនុស្សអ.ស.ប. មិនស្តីបន្ទោសទាំងស្រុងលើវិធានការរបស់រដ្ឋាភិបាលកម្ពុជាទេ ពោលគឺពួកគេទទួលស្គាល់កិច្ចខិតខំប្រឹងប្រែងរបស់រដ្ឋាភិបាលក្នុងការគ្រប់គ្រងការឆ្លងរាតត្បាតជំងឺកូវីដ១៩។
យ៉ាងណាក្តី ក្រុមអ្នកជំនាញទាំងនោះក៏បានបង្ហាញការខកចិត្តអំពីការបង្ហាញព័ត៌មានផ្ទាល់ខ្លួនរបស់អ្នកដែលធ្វើតេស្តឃើញមានជំងឺកូវីដ១៩ ដែលក្នុងនោះរួមមានឈ្មោះ ភេទ អាយុ មុខរបរ កន្លែងធ្វើការ និងអាសយដ្ឋានផងដែរ ដោយថាការលាតត្រដាងទិន្នន័យទាំងនោះ គឺជាការបំពានធ្ងន់ធ្ងរលើសិទ្ធិឯកជនដែលអាចនាំឲ្យមានការរើសអើងនិងការមាក់ងាយ។
ប៉ុន្តែរដ្ឋាភិបាលលើកឡើងថាការបង្ហាញអត្តសញ្ញាណ គឺធ្វើឡើងក្នុងគោលបំណងជំរុញនិងលើកទឹកចិត្តឲ្យមានការតាមរុករក ការធ្វើតេស្តនិងធ្វើចត្តាទ្បីស័ក ឲ្យបានលឿននិងទាន់ពេលវេលា ចំពោះបុគ្គលពាក់ព័ន្ធ៕
