ក្រសួងសុខាភិបាលបានឲ្យដឹងថាមនុស្ស១៧៧នាក់ទៀតបានឆ្លងជំងឺកូវីដ១៩ ក្នុងព្រឹត្តិការណ៍២០កុម្ភៈ ខណៈរដ្ឋាភិបាលអំពាវនាវឲ្យពលរដ្ឋស្នាក់នៅផ្ទះក្នុងពេលបុណ្យចូលឆ្នាំខ្មែរដែលចាប់ផ្តើមនៅថ្ងៃពុធ ទី១៤ ខែមេសានេះ។
នៅក្នុងសេចក្តីប្រកាសព័ត៌មានមួយចេញផ្សាយនៅថ្ងៃពុធនេះ ក្រសួងសុខាភិបាលឲ្យដឹងថាមនុស្ស១៧៧នាក់បានឆ្លងជំងឺកូវីដ១៩ ដែលនាំឲ្យករណីឆ្លងសរុបក្នុងព្រឹត្តិការណ៍២០កុម្ភៈ មានចំនួន៤.៣៣៧នាក់។ ក្នុងចំណោមអ្នកឆ្លងដែលប្រកាសនៅថ្ងៃនេះ ភាគច្រើននៅភ្នំពេញ គឺមានចំនួន១៤៩នាក់។
ក្រសួងសុខាភិបាលឲ្យដឹងទៀតថាករណីស្លាប់សរុបក្នុងប្រទេសកម្ពុជា ដោយសារជំងឺកូវីដ១៩ បានកើនឡើងដល់យ៉ាងតិច៣៥នាក់។ នៅរសៀលថ្ងៃពុធនេះ ក្រសួងបានប្រកាសថាបុរសម្នាក់អាយុ៥៨ឆ្នាំ រស់នៅក្នុងភូមិបន្ទាយរកា ឃុំក្រាំងដីវ៉ាយ ស្រុកភ្នំស្រួច ខេត្តកំពង់ស្ពឺ បានស្លាប់កាលពីព្រឹកថ្ងៃទី១៣ ខែមេសា ពេលចូលមកដល់មន្ទីរពេទ្យបង្អែកខេត្ត ដោយមានអាការៈហត់ដង្ហក់ពិបាកដកដង្ហើម។ ដោយសង្ស័យរោគសញ្ញាកូវីដ១៩ បុរសម្នាក់នោះត្រូវបានយកសំណាកធ្វើតេស្ត ហើយលទ្ធផលបញ្ជាក់ថាមានវិជ្ជមានជំងឺនេះ។
ក្រសួងបញ្ជាក់ថាអ្នកកំពុងសម្រាកព្យាបាលជំងឺកូវីដ១៩ មានចំនួន២.៥៤៤នាក់។ ក្រសួងមិនទាន់បានបញ្ជាក់ថាតើអ្នកជំងឺកូវីដ១៩ប៉ុន្មាននាក់ ដែលកំពុងសម្រាកនៅផ្ទះ ហើយមិនទាន់ត្រូវបានបញ្ជូនមកសម្រាកព្យាបាលនៅកន្លែងដែលរៀបចំដោយរដ្ឋាភិបាល ដោយសារខ្វះកន្លែងសម្រាកព្យាបាល។
រដ្ឋាភិបាលក៏បានរៀបចំអគារមួយចំនួននៅកោះពេជ្រ ជាមណ្ឌលព្យាបាលជំងឺកូវីដ១៩ កម្រិតស្រាល ដែលមានប្រមាណ១.៨០០គ្រែ។ នេះបើតាមហ្វេសប៊ុករបស់លោក ហ៊ុន ម៉ាណែត កូនប្រុសរបស់លោកនាយករដ្ឋមន្រ្តី ហ៊ុន សែន ដែលទទួលបន្ទុករៀបចំមណ្ឌលសម្រាកព្យាបាល៕
