សហផលិតករខ្សែភាពយន្តរឿង«សត្រូវរបស់ប្រជាជន»និងជាអ្នកកាសែតជើងចាស់របស់កម្ពុជាគឺលោកថេត សម្បត្តិត្រូវបានមជ្ឈមណ្ឌលអន្តរជាតិសម្រាប់អ្នកសារព័ត៌មាន (ICFJ) ផ្តល់រង្វាន់ដែលទទួលស្គាល់ថា ជាអ្នកកាសែតឆ្នើមក្នុងការងារសម្រាប់ឆ្នាំ២០១១នេះ។
រង្វាន់ដែលមានឈ្មោះថា អ្នកកាសែតឆ្នើមថ្នាក់អន្តរជាតិសម្រាប់ឆ្នាំ២០១១ ឬ2011 Knight International Journalism Award ត្រូវបានផ្តល់ដើម្បីជាការទទួលស្គាល់ចំពោះការខិតខំប្រឹងប្រែងរបស់លោកថេត សម្បត្តិក្នុងការផលិតខ្សែភាពយន្តឯកសាររឿង«សត្រូវរបស់ប្រជាជន» ដែលជាខ្សែភាពយន្តរៀបរាប់ពីក្បាលម៉ាស៊ីនកាប់សម្លាប់ក្នុងរបបខ្មែរក្រហម និងមានបទសម្ភាសន៍ដ៏កម្រជាមួយនួន ជា មេមនោគមវិជ្ជាខ្មែរក្រហម។
ថ្លែងប្រាប់វីអូអេសំឡេងសហរដ្ឋអាមេរិកនៅឯពិធីប្រគល់រង្វាន់នៅឯអគាររ៉ូណាល់រីហ្កេននិងមជ្ឈមណ្ឌលពាណិជ្ជកម្មអន្តរជាតិក្នុងរដ្ឋធានីវ៉ាស៊ីនតោន កាលពីយប់ថ្ងៃអង្គារ លោកថេត សម្បត្តិបានបញ្ជាក់ថា៖
«ខ្ញុំមានចិត្តសប្បាយរីករាយ ក្រោយពីបានទទួលរង្វាន់នេះពី International Center for Journalists (មជ្ឈមណ្ឌលអន្តរជាតិសម្រាប់អ្នកសារព័ត៌មាន) ព្រោះនេះជាកិត្តិយសមួយសម្រាប់ខ្ញុំដែលបានទទួលរង្វាន់នេះ ហើយក្នុងរង្វាន់នេះ យើងមានតែគ្នាបីនាក់ទេ ពីកម្ពុជាគឺមានខ្ញុំម្នាក់និងពីខាងម៉ិកស៊ិកូគឺមានពីរនាក់»។
ក្រោយពីបានចេញផ្សាយជាលើកដំបូងកាលពីឆ្នាំ២០១០ក្នុងមហោស្រពភាពយន្តក្រុងសាន់ដានក្នុងរដ្ឋយូតា និងទទួលបានពានរង្វាន់ World Cinema Special Jury Prize for Documentary ភាពយន្តឯកសារនេះបន្តទទួលបានជោគជ័យជាបន្តបន្ទាប់ ដោយទទួលបានរង្វាន់សិទ្ធិមនុស្សរបស់អង្គការ Human Rights Watch ហើយក៏ជាប់បានជាជម្រើសចុងក្រោយក្នុងការប្រកួតពានរង្វាន់អូស្កាជាដើម។
លោករ៉ប់ លឹមគិន សហផលិតករជាតិអង់គ្លេសដែលមានវត្តមាននៅក្នុងពិធីប្រគល់រង្វាន់នោះដែរបានបញ្ជាក់ថា៖
«គាត់សមនឹងទទួលបានរង្វាន់នេះណាស់។ នេះគឺជាកិត្តិយសដ៏សម្បើមណាស់ដែលគេប្រគល់រង្វាន់នេះដល់គាត់។ នេះគឺជាការទទួលស្គាល់យ៉ាងពិតប្រាកដដល់ការងារសារព័ត៌មាន ការស្រាវជ្រាវ និងការស៊ើបអង្កេតដ៏អស្ចារ្យរយៈពេល១០ឆ្នាំរបស់គាត់។ វាជាការអស្ចារ្យណាស់ដែលគាត់ទទួលបានរង្វាន់នេះ នៅយប់នេះ ហើយបានឃើញទស្សនិកជនទះដៃអបអរសាទរគាត់។ នេះជាការគោរពដល់ការងាររបស់គាត់ ក្រោយពីរយៈពេលជាច្រើនឆ្នាំដែលគាត់ធ្វើការដោយខ្លួនឯង ហើយតស៊ូដោយមិនដឹងថា តើគាត់អាចបញ្ចប់ភារៈកិច្ចនោះឬទេ»។
ជ័យលាភីពីរនាក់ទៀតដែលទទួលរង្វាន់ដូចលោកថេត សម្បត្តិដែរគឺនាង Rocío Idalia Gallegos Rodríguez និងនាង Sandra Rodríguez Nieto ជាអ្នកកាសែតបែបស៊ើបអង្កេតមកពីប្រទេស Mexico ដែលរាយការណ៍ជាច្រើនអំពីសកម្មភាពជួញដូរគ្រឿងញៀនខុសច្បាប់។ សម្រាប់ឆ្នាំនេះក៏មានរង្វាន់បន្ថែមដល់លោកស្រី គ្រីស្ទីណា អាម៉ាន់ព័រ អតីតអ្នកសារព័ត៌មានរបស់ទូរទស្សន៍ស៊ីអឹនអឹន ហើយពេលឥឡូវនេះកំពុងបម្រើការនៅទូរទស្សន៍ ABC។ លោកស្រីអាម៉ាន់ព័រទទួលបានពានរង្វាន់ចំពោះឧត្តមភាពក្នុងវិស័យសារព័ត៌មាន។
លោកស្រី Joyce Barnathan ប្រធានមជ្ឈមណ្ឌលអន្តរជាតិសម្រាប់អ្នកសារព័ត៌មាន បានបញ្ជាក់ក្នុងសេចក្តីប្រកាសព័ត៌មានថា៖
«អ្នកកាសែតដ៏ឆ្នើមទាំងនេះហ៊ានប្រាប់រឿងរ៉ាវដែលមានមនុស្សតែពីរបីនាក់ទេដែលមានសេចក្តីក្លាហានយកមកនិយាយ ហើយពួកគេយើងមានការយល់ដឹងដ៏មានសារៈសំខាន់អំពីរឿងរ៉ាវខ្លោចផ្សាដែលពលរដ្ឋជួបប្រទះនៅម៉ិកស៊ិកកូនិងកម្ពុជា»។
អ្នកដែលដាក់បេក្ខភាពអ្នកកាសែតដើម្បីទទួលការតែងតាំងនេះគឺជាអ្នកកាសែតដែលមានបទពិសោធន៍ជាយូរឆ្នាំ និងអ្នកដែលទទួលបានការឧបត្ថម្ភពីមជ្ឈមណ្ឌលអន្តរជាតិសម្រាប់អ្នកកាសែត។
លោកថេត សម្បត្តិបានផ្តែផ្តាំដល់អ្នកកាសែតកម្ពុជាដទៃទៀតថា៖
«ការស្រាវជ្រាវរបស់ខ្ញុំគ្រាន់តែមួយផ្នែកតូចទេអំពីរបបខ្មែរក្រហម ដូច្នេះនៅច្រើនណាស់។ អញ្ចឹងប្រសិនបើជាអ្នកកាសែតខ្មែរយើងជួយចុះស្រាវជ្រាវអំពីរបបខ្មែរក្រហមគឺនៅសល់ច្រើនណាស់។ អញ្ចឹងអាចធ្វើឱ្យរឿងពិតភាគច្រើនក្នុងរបបខ្មែរក្រហមកាន់តែបង្ហាញឡើង ព្រោះខ្ញុំធ្វើនេះគ្រាន់តែផ្នែកតូចមួយទេ មិនបានទូទាំងប្រទេសទេ។ ដូច្នេះនៅសល់ច្រើនណាស់។ ប្រសិនបើមានឱកាស សូមឱ្យបងប្អូនជាអ្នកកាសែតបន្តស្រាវជ្រាវទៅទៀត។ វាជាឱកាសមួយ បើយើងរង់ចាំដល់៣០ឆ្នាំទៀតគឺចប់ហើយ។ ម្ភៃ សាមសិបឆ្នាំទៀតគឺប្រវត្តិសាស្រ្តខ្មែរក្រហម អ្នកដែលដឹងរឿងពិតអ្នកដែលជាប់ទាក់ទិនហ្នឹង គឺចប់អស់ហើយ យើងអត់មានឱកាសទៀតទេ។ ដូច្នេះនេះជាឱកាសសម្រាប់យើងគ្រប់ៗគ្នា»។
ក្រៅពីការផ្តល់រង្វាន់ប្រចាំឆ្នាំដល់អ្នកកាសែតឆ្នើមៗដូចនេះ មជ្ឈមណ្ឌលអន្តរជាតិសម្រាប់អ្នកកាសែតក៏មានកម្មវិធីជាច្រើនទៀត មានដូចជាពលរដ្ឋសារព័ត៌មាន ការបណ្តុះបណ្តាលអ្នកសារព័ត៌មាន ការធ្វើសេចក្តីរាយការណ៍ព័ត៌មានបែបស៊ើបអង្កេត និងការគ្រប់គ្រងបណ្តាញព័ត៌មានដែលមានគោលដៅធ្វើឱ្យប្រសើរឡើងដល់វិស័យសារព័ត៌មាននិងសង្គមជាដើម៕
