«កម្មវិធីស្ត្រីកម្ពុជាក្នុងវិស័យបច្ចេកវិទ្យាឆ្នាំ២០១៨» ឬ «Cambodia Women in Tech» Award ដែលជាកម្មវិធីផ្តួចផ្តើម ដោយក្រសួងប្រៃសណីយ៍និងទូរគមនាគមន៍ នឹងប្រគល់ពានរង្វាន់ដល់ស្រ្តីឆ្នើមៗនៅក្នុងវិស័យបច្ចេកវិទ្យាក្នុងប្រទេសកម្ពុជា ជាលើកដំបូង នៅថ្ងៃទី០៧ ខែមីនានេះ។
ស្រ្តីឆ្នើមដែលកំពុងធ្វើការនៅក្នុងផ្នែកបច្ចេកវិទ្យា វិស្វកម្ម ឬ ជាអ្នកប្រើបច្ចេកវិទ្យាសម្រាប់ការអភិវឌ្ឍសង្គមឬសហគមន៍ អាចចុះឈ្មោះចូលរួមក្នុងកម្មវិធីពានរង្វាន់នេះ បានត្រឹមថ្ងៃទី១ ខែមីនានេះ ហើយលទ្ធផលជ័យលាភីនៃកម្មវិធីពានរង្វាន់ នឹងប្រកាសនៅថ្ងៃទី០៧ ខែមីនា នៅក្រសួង ប្រៃសណីយ៍និងទូរគមនាគមន៍ មួយថ្ងៃមុនទិវាសិទ្ធិនារីអន្តរជាតិ ០៨ មីនា។
«កម្មវិធីស្ត្រីកម្ពុជាក្នុងវិស័យបច្ចេកវិទ្យាឆ្នាំ២០១៨» នេះ ត្រូវបានបង្កើតឡើង ដើម្បីជំរុញលើកទឹកចិត្តស្រ្តី ដែលមានចំណាប់អារម្មណ៍វិស័យបច្ចេកវិទ្យា គមនាគមន៍ និងព័ត៌មានវិទ្យា (ប.គ.ព) ឲ្យចូលរួមកាន់តែច្រើនក្នុងសង្គមឌីជីថល ជាពិសេសដើម្បីកាត់បន្ថយគម្លាតយេនឌ័ររវាងស្រ្តីនិងបុរស ក្នុងវិស័យបច្ចេកវិទ្យានិងវិស្វកម្ម។ នេះបើយោងតាមសេចក្តីប្រកាសរបស់អគ្គនាយកដ្ឋានបច្ចេកវិទ្យាគមនាគមន៍ និងព័ត៌មាន នៃក្រសួងប្រៃសណីយ៍ និងទូរគនាគមន៍។
អ្នកស្រី តាន់ សូដានី ប្រធាននាយកដ្ឋានគោលនយោបាយបច្ចេកវិទ្យា គមនាគមន៍ និងព័ត៌មានវិទ្យា បានប្រាប់ VOA តាមទូរសព្ទកាលពីរសៀលថ្ងៃព្រហស្បតិ៍នេះថា ចំនួនស្រ្តីដែលធ្វើការក្នុងផ្នែកនេះនិងចំនួនស្រ្តីដែលចាប់យកជំនាញបច្ចេកវិទ្យា នៅមានតិចតួចនៅឡើយ។ ដូច្នេះ ក្រសួងប្រៃសណីយ៍ និងទូរគមនាគមន៍ សង្ឃឹមថា កម្មវិធីពានរង្វាន់នេះ នឹងដើរតួជាកត្តាមួយក្នុងការជំរុញលើកទឹកចិត្តស្រ្តីឲ្យចូលរួមកាន់តែច្រើន។
អ្នកស្រីបាននិយាយប្រាប់ VOA ថា៖
«អីចឹងយើងចង់បានការចូលរួមរបស់ស្រ្តីកាន់តែច្រើននៅក្នុងវិស័យហ្នឹង ហើយចូលរួមក្នុងការអភិវឌ្ឍនៅក្នុងវិស័យហ្នឹង ក៏ដូចជាដើម្បីធ្វើឲ្យកម្ពុជាអាចបោះជំហានមួយទៅខាងមុខបាន ហើយក៏ជាសង្គមដែលមានសេដ្ឋកិច្ចផ្នែកឌីជីថល»។
របាយការណ៍ការអប់រំសង្ខេបរបស់អង្គការ UNESCO នៅអាស៊ីប៉ាស៊ីហ្វិក ស្តីអំពីគម្លាតយេនឌ័រក្នុងវិស័យ STEM អះអាងថា បើទោះបីជាតម្រូវការអ្នកជំនាញផ្នែក STEM បានកើនឡើងក៏ដោយ ក៏ចំនួនស្រ្តីក្នុងវិស័យនេះ នៅមានតិចតួច។ ហើយស្រ្តីដែលធ្វើការជាអ្នកស្រាវជ្រាវវិទ្យាសាស្រ្តគឺមានតែ២៨ភាគរយប៉ុណ្ណោះទូទាំងពិភពលោក។
កញ្ញា តាន់ អេង កញ្ចនិត្យ និស្សិតឆ្នាំទីពីរ ដែលកំពុងសិក្សាផ្នែកវិស្វកម្ម វិទ្យាសា្ថនបច្ចេកវិទ្យាកម្ពុជានិងជាបេក្ខជនម្នាក់ចូលរួមក្នុងសិក្ខាសាលាថ្នាក់តំបន់ស្តីពីរការសិក្សាមុខវិជ្ជា STEM របស់គម្រោងមេដឹកនាំយុវជនវ័យក្មេងនៅអាស៊ីអាគ្នេយ៍ (YSEALI) បានប្រាប់ VOA ថា ទោះបីជានាងស្រឡាញ់វិទ្យាសាស្រ្តតាំងពីតូចក៏ដោយ ប៉ុន្តែក្រុមគ្រួសាររបស់យុវនារីមួយរូបនេះ មិនពេញចិត្តឲ្យនាងសិក្សាមុខវិជ្ជានេះទេ។
កញ្ញា តាន់ អេង កញ្ចនិត្យ បានប្រាប់ VOA ថា៖
«ចំពោះស្រ្តីគាត់ខ្លាចថា ពេលចេញទៅពិបាករកការងារធ្វើព្រោះយើងស្រី ហើយសង្គមគេគិតថាអាហ្នឹងប្រុសៗគេធ្វើបានល្អជាង»។
ទោះជាយ៉ាងណាក៏ដោយ កញ្ចនិត្យ បានបន្ថែមថា នាងនៅតែបន្តសិក្សាមុខវិជ្ជាដែលខ្លួនស្រឡាញ់ មិនមែនដើម្បីតែខ្លួននាងនោះទេ តែដើម្បីការអភិវឌ្ឍរបស់ប្រទេសកម្ពុជា។
កញ្ចនិត្យ បានបន្ថែមថា៖
«ប្រទេសយើងស្រីវាលើស៥០ភាគរយហើយ។ អ៊ីចឹងពេលយើងកំពុងតែត្រូវការជំនាញហ្នឹងផង អីចឹងបើសិនជាអត់ស្រ្តីហើយនិងមនុស្សជំនាន់ក្រោយ ដូចខ្ញុំអ៊ីចឹងចូលរួមទេ អីចឹងវារាងពិបាកធ្វើឲ្យយើងអភិវឌ្ឍរាងយឺតអីចឹង»។
លោក សុខ សុភមង្គល នាយកប្រតិបត្តិនៃក្រុមហ៊ុនបច្ចេកវិទ្យា Codingate បានបង្ហាញការគាំទ្ររបស់លោកចំពោះ «កម្មវិធីស្ត្រីកម្ពុជាក្នុងវិស័យបច្ចេកវិទ្យាឆ្នាំ២០១៨» ដោយលោកលើកឡើងថា ស្រ្តីមានការចាប់អារម្មណ៍វិស័យបច្ចេកវិទ្យានេះ ប៉ុន្តែពួកគេមិនហ៊ានចេញមុខដោយសារកម្ពុជានៅខ្វះស្រ្តីគំរូ។
លោកបាននិយាយប្រាប់ VOA ថា៖
«ស្ត្រីគឺគាត់មានការចាប់អារម្មណ៍ ឬក៏គាត់ចង់ធ្វើប៉ុន្តែគាត់មិនទាន់ លក្ខណៈមួយថា..ចេញមកជា star (តារា) ឬ role model (ជនគំរូ) ក្នុង industry (វិស័យ) ហ្នឹង»។
ទោះបីជាយ៉ាងណាក៏ដោយ គិតត្រឹមថ្ងៃទី០១ ខែមីនា ដែលជាថ្ងៃចុងក្រោយសម្រាប់ការដាក់ពាក្យ អ្នកស្រី តាន់ សូដានី ប្រធាននាយកដ្ឋានគោលនយោបាយបច្ចេកវិទ្យា គមនាគមន៍ និងព័ត៌មានវិទ្យា បាននិយាយថា ស្រ្តីដែលបានដាក់ស្នើជាបេក្ខភាពចូលរួមក្នុង «កម្មវិធីស្ត្រីកម្ពុជាក្នុងវិស័យបច្ចេកវិទ្យាឆ្នាំ២០១៨» មានចំនួនតែ ២៦នាក់ប៉ុណ្ណោះ ក្នុងចំណោមប្រជាជនស្រ្តីសរុបប្រហែល ៨លាននាក់ក្នុងប្រទេសកម្ពុជាយោងតាមទិន្នន័យរបស់ធនាគារពិភពលោក។ ស្រី្តទាំង២៦នាក់នោះភាគច្រើន គឺមកពីស្ថាប័នឯកជន សាស្រ្តាចារ្យ អង្គការក្រៅរដ្ឋាភិបាល ឬមកពីក្រសួង។
«កម្មវិធីស្ត្រីកម្ពុជាក្នុងវិស័យបច្ចេកវិទ្យាឆ្នាំ២០១៨» នឹងប្រគល់ពានរង្វាន់បីប្រភេទជូនទៅឲ្យស្រី្តឆ្នើមចំនួនបីនាក់ គឺពានរង្វាន់សហគ្រិនស្ត្រីឆ្នើមក្នុងវិស័យបច្ចេកវិទ្យា (Cambodian Woman ICT Entrepreneur Award) ពានរង្វាន់វិស្វករស្រ្តីជោគជ័យក្នុងជំនាញ ប.គ.ព (Cambodian Woman ICT Engineer Award) ពានរង្វាន់ស្រ្តីដែលបានចូលរួមជំរុញការប្រើប្រាស់បច្ចេកវិទ្យាសម្រាប់ការអភិវឌ្ឍសង្គម ឬសហគមន៍ (Cambodian Woman ICT For Community Award)។
ស្រ្តីឆ្នើមទាំងបីរូប នឹងផ្តល់កិត្តិយសទទួលពានរង្វាន់ ព្រមទាំងរង្វាន់លើកទឹកចិត្តនានា ពីក្រសួងប្រៃសណីយ៍ និង ទូរគមនាគមន៍ផងដែរ។ ពួកគេក៏នឹងត្រូវស្នើសុំផ្តល់បទសម្ភាសន៍ដើម្បីបង្កើតជាវីដេអូខ្លីៗក្នុងប្រធានបទ«ការផ្តល់សិទ្ធិអំណាចដល់ស្រ្តីតាមរយៈបច្ចេកវិទ្យា គមនាគមន៍និងព័ត៌មាន»ដើម្បីផ្សព្វផ្សាយជំរុញការចូលរួមរបស់ស្រ្តីដទៃទៀតជាបន្តបន្ទាប់ដែរ។
នៅក្នុងរយៈពេលប៉ុន្មានឆ្នាំចុងក្រោយនេះ វិស័យបច្ចេកវិទ្យា ICT ឬ STEM នៅក្នុងប្រទេសកម្ពុជាទទួលបានការចាប់អារម្មណ៍យ៉ាងខ្លាំង។ ទាំងរដ្ឋាភិបាល និងអង្គការក្រៅរដ្ឋាភិបាលបានរៀបចំកម្មវិធីផ្សេងៗ ដើម្បីជំរុញនិងលើកស្ទួយឲ្យយុវជនកម្ពុជាចូលរួមច្រើនជាងមុន។
នៅក្នុងខែមីនានេះ កម្ពុជារៀបចំកម្មវិធីបី ដែលផ្តោតលើវិស័យបច្ចេកវិទ្យា ក្នុងនោះរួមមាន មហោស្រព វិទ្យាសាស្រ្ត និងវិស្វកម្មកម្ពុជាលើកទីបួន ដែលកំពុងប្រព្រឹត្តធ្វើឡើងចាប់ពីថ្ងៃទី០១ ដល់ថ្ងៃទី០៣ មីនា សិក្ខាសាលាថ្នាក់តំបន់ស្តីពីការសិក្សាមុខវិជ្ជា STEM និង «កម្មវិធីស្ត្រីកម្ពុជាក្នុងវិស័យបច្ចេកវិទ្យាឆ្នាំ២០១៨»៕
