ពលរដ្ឋខ្មែរនៅសហរដ្ឋអាមេរិកនិងនៅប្រទេសកាណាដាជាច្រើនរយនាក់បានធ្វើបាតុកម្មនៅមុខស្នាក់ការអង្គការសហប្រជាជាតិកាលពីថ្ងៃសៅរ៍ប្រឆាំងនឹងការដឹកនាំជាង៣០ឆ្នាំរបស់លោកនាយករដ្ឋមន្ត្រីហ៊ុន សែនហើយទាមទាររកយុត្តិធម៌សម្រាប់ជនរងគ្រោះនានាក្នុងប្រទេសកម្ពុជា។
បាតុករបានលើកបដារជាភាសាអង់គ្លេស និងខ្មែរដែលខ្លះសរសេរដោយដៃនិងបដារខ្លះបោះពុម្ពយ៉ាងត្រឹមត្រូវបង្ហាញពីខ្លឹមសារយ៉ាងច្បាស់ៗថា «ហ៊ុន សែនចុះចេញទៅ» «ហ៊ុន សែនជាឧក្រិដ្ឋជន» «ឈប់ដណ្តើមយកដីរបស់ប្រជាពលរដ្ឋ» ហើយក៏មានបដារខ្លះសរសេរថា «នាំខ្លួនហ៊ុន សែនទៅកាន់តុលាការអន្តរជាតិពីបទឧក្រិដ្ឋកម្មខ្លួនបានប្រព្រឹត្តលើជនជាតិឯង»។
លោកសូ សុខុមបាតុករម្នាក់ដែលមកពីរដ្ឋ Virginia បានថ្លែងថា៖
«បងប្អូនយើងមកថ្ងៃនេះគឺមករួមគ្នាដើម្បីធ្វើបាតុកម្មប្រឆាំងនឹងការរំលោភសិទ្ធិមនុស្សរបស់លោកនាយករដ្ឋមន្ត្រីហ៊ុន សែន ដែលលោកធ្វើបាបប្រជាពលរដ្ឋខ្មែរ ជាពិសេសយកដីខ្មែរបម្រើកុម្មុយនិស្ត បម្រើប្រទេសដទៃ ហេតុនេះយើងទាំងអស់គ្នាសុំឱ្យរដ្ឋាភិបាលអាមេរិក ជាពិសេសអ.ស.ប. សូមឱ្យជួយខ្មែរយើង»។
លោកសិទ្ធ បារ៉ាដូ មកតាំងពីប្រទេសកាណាដា គឺដើម្បីជំរុញឱ្យសំណុំរឿងដែលពលរដ្ឋបានប្តឹងទៅតុលាការព្រហ្មទណ្ឌអន្តរជាតិប្រឆាំងនឹងការរឹបអូសយកដីធ្លី ប្រជាពលរដ្ឋដោយបង្ខំនោះ អាចដំណើរការបានទៅមុខឆាប់ៗ៖
«ពួកយើងមកនេះចង់ជំរុញឱ្យតុលាការព្រហ្មទណ្ឌអន្តរជាតិស៊ើបអង្កេតជាបឋមនូវករណីលោកហ៊ុន សែនដែលមានការរំលោភលើសិទ្ធិមនុស្ស»។
បាកម្មនេះធ្វើឡើងស្របគ្នាជាមួយនឹងលោកនាយករដ្ឋមន្ត្រីហ៊ុន សែន កំពុងឡើងថ្លែងសុន្ទរកថានៅឯកិច្ចប្រជុំកំពូលរបស់អង្គការសហប្រជាជាតិ ស្តីពីការអនុម័តរបៀបវារៈអភិវឌ្ឍន៍ក្រោយឆ្នាំ២០១៥។
នៅក្នុងសុន្ទរថានោះលោកបានថ្លែងអំពីការអភិវឌ្ឍសេដ្ឋកិច្ចដែលកើនឡើងថេរក្នុងរយៈពេលជាច្រើនឆ្នាំមកនេះ៖
«ខ្ញុំរីករាយនិងជម្រាបជូនអង្គប្រជុំថា ក្នុងរយៈពេលពីរទសវត្សរ៍កន្លងមកនេះ កម្ពុជាសម្រេចបាននូវការអភិវឌ្ឍប្រែប្រួលគួរជាទីមោទនៈ ពិសេស ការរក្សាបានសន្តិភាពពេញលេញ ស្ថិរភាពនយោបាយរឹងមាំ សន្តិសុខនិងសណ្តាប់ធ្នាប់សាធារណៈល្អ ប្រសើរព្រមទាំងកំណើនសេដ្ឋកិច្ចខ្ពស់ជាមធ្យមក្នុងអត្រា៧,៧ភាគរយ ក្នុងមួយឆ្នាំ។ លើមូលដ្ឋាននេះអត្រានៃភាពក្រីក្របានធ្លាក់ចុះយ៉ាងលឿន គឺពីជាង៥៣ភាគរយនៅឆ្នាំ២០០៤ មកនៅត្រឹម១៦ភាគរយនៅត្រឹមឆ្នាំ២០១៣ ដែលធ្វើឱ្យកម្ពុជាសម្រេចបាននូវគោលដៅអភិវឌ្ឍន៍សហស្សវត្សរ៍លើ ការកាត់បន្ថយភាពក្រីក្រនិងនៅលើសង្គមសេដ្ឋកិច្ចមួយចំនួនទៀត មុនពេលកំណត់ឆ្នាំ២០១៥»។
ប៉ុន្តែលោកស្រីសយ រាស៊ី បាតុករមកពីរដ្ឋម៉ារីឡែន មិនយល់ស្របទេ៖
«ខ្ញុំគិតថា ជោគជ័យហ្នឹងមានខ្លះដែរគឺតាមរយៈភ្នែករបស់លោកហ៊ុន សែន ហើយនឹងភ្នែករបស់អ្នកមាន និងភ្នែករបស់ឧកញ៉ាទាំងឡាយ ប៉ុន្តែ តាមភ្នែករបស់ប្រជាពលរដ្ឋវិញគឺវេទនាណាស់។ ពួកខ្ញុំមកនេះ ព្រោះខ្ញុំនឹកឃើញកាលពីខ្ញុំនៅសម័យខ្មែរក្រហម ពួកខ្ញុំតែងតែសំឡឹងមើលមេឃ ហើយពឹងឱ្យពិភពលោក ដូចជាអ.ស.ប.ចុះទៅជួយពួកខ្ញុំ ហើយឥឡូវនេះខ្ញុំគិតថា បងប្អូននៅស្រុកខ្មែរក៏កំពុងងើយមកលើដើម្បីឱ្យពួកយើងអ្នកខាងក្រៅហ្នឹងដែល នៅជិតអ.ស.ប.ហ្នឹង ជួយដែរ»។
លោកស្រីក៏បានសុំឱ្យដោះលែងសកម្មជននិងមន្ត្រីគណបក្សសង្គ្រោះជាតិ ដែលកំពុងជាប់ពន្ធនាគារជាង១០នាក់ផងដែរ៖
«ហើយសុំឱ្យគាត់ដោះលែងអ្នកត្រូវជាប់ឃុំទាំងប៉ុន្មាន ដែល ជាអ្នកទោសនយោបាយហ្នឹង ឱ្យគាត់ កុំយកតុលាការមកធ្វើជាឈ្នាន់សម្រាប់ដឹកនាំប្រទេសតទៅទៀត។ សុំឱ្យតុលាការមានយុត្តិធម៌។ សុំឱ្យឈប់កាប់ព្រៃឈើ ហើយឈប់ដេញប្រជាពលរដ្ឋចេញពីដីធ្លី ហើយសុំឱ្យផ្តល់យុត្តិធម៌ឱ្យប្រជាពលរដ្ឋ។ ហើយបោះឆ្នោតលើកក្រោយកុំលួចទៀត»។
ការតវ៉ានេះកើតឡើងរយៈពេលពីរថ្ងៃក្រោយពីមានពលរដ្ឋខ្មែរ ដែលរស់នៅសហរដ្ឋអាមេរិកជាង២០០នាក់បានមកជួបស្តាប់លោកនាយករដ្ឋមន្ត្រីហ៊ុន សែនពន្យល់អំពីការអភិវឌ្ឍ។
លោកជុំ ប៊ុនរ៉ុង ឯកអគ្គរាជទូតខ្មែរប្រចាំនៅសហរដ្ឋអាមេរិក បានប្រាប់ VOA ថា ការប្រឆាំងនិងការគាំទ្រជាសិទ្ធិដែលពលរដ្ឋខ្មែរនៅអាមេរិកមាន៖
«ខ្ញុំគិតថា រឿងបាតុកម្មវាជាប្រពៃណីមួយទៅហើយ ហើយនៅអាមេរិកគឺជាប្រទេសមានសេរីភាពខាងការបញ្ចេញមតិ ដូច្នេះការធ្វើបាតុកម្មគឺជាការធម្មតា ប៉ុន្តែតាមខ្ញុំមើលទំហំនៃការធ្វើ វាមិនធំដូចមុនៗទេ ចេះតែតូចទៅៗ ដោយសារថា បងប្អូនខ្មែរនៅសហរដ្ឋអាមេរិកលោកយល់អំពីបញ្ហាប្រទេសជាតិបានច្រើនណាស់ ធ្វើឱ្យការប្រឆាំងថយចុះ»។
សេចក្តីប្រកាសព័ត៌មានរបស់ក្រុមបាតុករក៏បានស្នើឱ្យអង្គការសហប្រជាជាតិនិងសហគមន៍អន្តរជាតិ ជួយធានាថា ការបោះឆ្នោត ឆ្នាំ២០១៨ខាងមុខប្រព្រឹត្តឡើងដោយយុត្តិធម៌ហើយ បើគណបក្សប្រឆាំងឈ្នះឆ្នោតត្រូវមានការផ្ទេរអំណាចដោយសន្តិវិធី។
លោកជុំ ប៊ុនរ៉ុងយល់ថា នោះគឺជាការត្រឹមត្រូវ ហើយលោកបន្ថែមថា អ្នកចាញ់មិនត្រូវមានទម្លាប់តវ៉ា ចោទប្រកាន់ថា មានការរៀបចំមិនត្រឹមត្រូវនោះទេ បើអន្តរជាតិយល់ថាត្រឹមត្រូវ៖
«រឿងនេះគឺថា ជាសិទ្ធិរបស់ប្រជាពលរដ្ឋ ក្នុងការបោះឆ្នោត។ ប្រសិនបើគណបក្សណាឈ្នះ គណបក្សនោះគាត់នឹងកាន់អំណាចហើយ។នេះជាជោគជ័យរបស់គណបក្សនោះតាមរដ្ឋធម្មនុញ្ញ ហើយការផ្ទេរអំណាចក៏អាស្រ័យទៅលើរដ្ឋសភា ទៅតាមច្បាប់រដ្ឋធម្មនុញ្ញរបស់យើង មិនមែនថា អ្នកណាឈ្នះទៅ អ្នកចាញ់មិនសុខចិត្ត ក្រាញននៀល។ នេះវាជារឿងមួយសោកស្តាយដែរ។ វាមិនអាចកើតមានទេ»។
ប្រទេសកម្ពុជានឹងរៀបចំការបោះឆ្នោតជាតិនៅឆ្នាំ២០១៨ ដែលជាការបោះឆ្នោតមួយអាចមានការប្រកួតប្រជែងខ្លាំង រវាងគណបក្សកាន់អំណាចនិងគណបក្សប្រឆាំង៕
