ពលករកម្ពុជាជាង១០០នាក់ បានមកជួបជុំគ្នានៅក្រសួងការងារនៅថ្ងៃពុធនេះ ដើម្បីទាមទារប្រាក់ដែលពួកគេបានបង់ទៅឲ្យក្រុមហ៊ុននាំចេញពលករក្នុងស្រុកចំនួនពីរ គឺក្រុមហ៊ុន Rice Natural Co. Ltd និងក្រុមហ៊ុន Century (Cambodia) Manpower Co. Ltd ជាថ្នូរនឹងឱកាសការងារនៅប្រទេសជប៉ុន។ នេះបើយោងតាមតំណាងពលកររងគ្រោះ និងមន្តី្រអង្គការសិទ្ធិមនុស្ស។
ការមកប្រមូលផ្តុំគ្នារបស់ពួកគេ ធ្វើឡើងនៅក្រោយពេល ដែលក្រុមហ៊ុនទាំងពីរបានចាប់ផ្តើមសងប្រាក់ត្រឡប់ទៅកម្មករបានចំនួន៦៨នាក់ក្នុងរយៈពេលពីរថ្ងៃកន្លងមកនេះ។
លោក ជុន ភក្តី តំណាងពលកររងគ្រោះមកពីខេត្តសៀមរាប បានឲ្យដឹងថា លោកមកកាន់ក្រសួងការងារតាំងពីព្រឹករហូតមកដល់រសៀលថ្ងៃនេះ ដោយសង្ឃឹមថានឹងទទួលបានប្រាក់ដូចកម្មករចំនួន៦៨នាក់នេះ ពីព្រោះតំណាងក្រុមហ៊ុនទាំងពីរសន្យាថានឹងបន្តប្រគល់ប្រាក់ជូនបន្ថែមចាប់ពីថ្ងៃនេះទៅ ប៉ុន្តែពលករនិងរូបលោកដែលមកជួបជុំគ្នានៅក្នុងក្រសួងការងារពុំទាន់ទទួលបានប្រាក់នៅឡើយទេ។
លោកនិយាយថា៖ «ថ្ងៃទី២០ហ្នឹងគឺត្រូវតែដោះស្រាយក្នុង២០០នាក់ជាង។ ឥឡូវហ្នឹងថ្ងៃទី២០នេះជាថ្ងៃដំបូងរបស់ខ្ញុំ នៅតែអត់ទាន់ឃើញដោះស្រាយឲ្យខ្ញុំផង»។
កាលពីថ្ងៃច័ន្ទក្រុមហ៊ុន Rice Natural Co. Ltd បានសន្យាប្រគល់ប្រាក់ទៅឲ្យពលករចំនួន៤៨នាក់ ហើយថ្ងៃអង្គារម្សិលមិញនេះ ក្រុមហ៊ុន Century (Cambodia) Manpower Co. Ltd ក៏បានយល់ព្រមប្រគល់ប្រាក់ទៅឲ្យពលករចំនួន២០នាក់។ នេះបើតាមការបញ្ជាក់របស់លោក ជុន ភក្កី។
ក៏ប៉ុន្តែ លោកស្រី មាស សាអ៊ីម អនុប្រធានផ្នែកស្រ្តី កុមារ និងការដោះស្រាយទំនាស់ក្រៅប្រព័ន្ធតុលាការនៃអង្គការសិទ្ធិមនុស្សអាដហុក បានពន្យល់ថា ប្រាក់ដែលក្រុមហ៊ុន Rice Natural Col. Ltd ថាឲ្យទៅពលករ៤៨នាក់នោះ គឺគ្រាន់តែជាការសន្យាតែប៉ុណ្ណោះ ប៉ុន្តែប្រាក់មិនទាន់បានធ្លាក់ទៅដល់ដៃកម្មកររងគ្រោះនៅឡើយទេ។
លោកស្រីពន្យល់ថាកម្មករទាំង ៤៨នាក់នោះពុំបានប្តឹងមកអង្គការលោកស្រីទេ។
លោកស្រី មាស សាអ៊ីមបានបន្ថែមថា៖ «គាត់សន្យាថាបង់ឲ្យ ៤៨នាក់ ប៉ុន្តែមិនទាន់ចេញជាលទ្ធផលថាបង់ឲ្យនៅឡើយទេ។ ខ្ញុំបញ្ជាក់កន្លែងហ្នឹង ៤៨នាក់ហ្នឹង មិនមែនជាឈ្មោះជនរងគ្រោះដែលអាដហុកទទួលពាក្យបណ្តឹងបានទេ»។
លោកស្រី មាស សាអ៊ីម មិនអាចបញ្ជាក់ពីពលករ២០នាក់ផ្សេងទៀតបានទេ ដោយពុំទាន់ទទួលបានព័ត៌មានគ្រប់គ្រាន់។
ដោយឡែក លោក ហែម ប៊ុននី ប្រធាននាយកដ្ឋាន ពលករ និងការងារនៃក្រសួងការងារបញ្ជាក់ថាក្រសួងបានទទួលពាក្យបណ្តឹងពីពលកររងគ្រោះតាំងពីខែធ្នូឆ្នាំ២០១៤មក ហើយបានស្នើឲ្យពលករនាំមកនូវសក្ខីប័ត្រដើម ដែលពួកគេបានទទួលពីក្រុមហ៊ុន ដើម្បីទូទាត់ សំណងប៉ុន្តែលោកបដិសេធមិនឆ្លើយទាក់ទងនឹងចំនួនពលករជាង១០០នាក់ដែលមកតវ៉ានៅថ្ងៃនេះទេ។
លោកមានប្រសាសន៍ថា៖ «ខ្ញុំគ្រាន់តែប្រាប់អញ្ចេះ ពាក្យបណ្តឹងដែលខ្ញុំទទួលបាន ខ្ញុំទទួលបានតាំងពីឆ្នាំ២០១៤ម៉្លេះ មិនមែនទើបថ្ងៃនេះទេបាទ។ ក៏ប៉ុន្តែពលករមកប្តឹងហ្នឹងគ្មានសក្ខីប័ត្រដើម។ យល់នៅ? គ្រាន់តែប្តឹងយើងទាររកវិក្កយបត្រវាអត់មាន។ អញ្ចឹងយើងថាព្យាយាមទៅរកមក ក្រែងទុកនឹងបងប្អូន ទុកអីណាអញ្ចឹង»។
កាលពីសប្តាហ៍មុនក្រសួងការងារបានបង្គាប់ឲ្យក្រុមហ៊ុនទាំងពីរសងប្រាក់ ឲ្យបានគ្រប់ចំនួនជូនពលករដែលមានសក្ខីបត្រត្រឹមត្រូវក្នុងរយៈពេលមួយខែគឺគិតចាប់ពីថ្ងៃទី២០ ខែឧសភា ដល់ថ្ងៃទី២០ ខែមិថុនា។
ក្រុមហ៊ុន Rice Natural Co. Ltd និង ក្រុមហ៊ុន Century (Cambodia) Manpower Co. Ltd ទទួលរងការចោទប្រកាន់ថាបានទទួលប្រាក់ចំនួន៤០០ដុល្លារពីពលករម្នាក់ៗ សម្រាប់តម្លៃចុះឈ្មោះរបស់ពលករដើម្បីបានទៅធ្វើការផ្នែក កសិកម្ម ឧស្សហកម្ម និងសំណង់ក្នុងប្រទេសជប៉ុន ក៏ប៉ុន្តែមិនបានធ្វើតាមសន្យា ហើយក៏ប្តូរទីតាំងការិយាល័យក្រោយពីបានទទួលបា្រក់អស់ហើយ៕
