អាជ្ញាធរប្រទេសកម្ពុជាបានឲ្យដឹងនៅថ្ងៃអង្គារនេះថា សំរាមប្លាស្ទីកទម្ងន់១៦០០តោនដែលរកឃើញក្នុងខេត្តព្រះសីហនុនឹងត្រូវដឹកជញ្ញូនចេញទៅកាន់ប្រទេសដើមវិញនៅថ្ងៃទី២៤ខែសីហាខាងមុខនេះ។
លោកគុន ញឹម អគ្គនាយកនៃអគ្គនាយកដ្ឋានគយ និងរដ្ឋាករបានគូសបញ្ជាក់ក្នុងសន្និសីទសារព័ត៌មានមួយនៅរសៀលថ្ងៃអង្គារនេះថា ក្រុមហ៊ុនដែលបាននាំសំរាមជាតិប្លាស្ទិកនេះចូលនឹងត្រូវដឹកចេញតាមការកំណត់របស់អាជ្ញាធរមានសមត្ថកិច្ចកម្ពុជា។
«យើងដាក់កាលបរិច្ឆេទឲ្យក្រុមហ៊ុនរៀបចំដឹកជញ្ជូនត្រឡប់ទៅឲ្យក្រុមហ៊ុនដែលបានធ្វើការនាំចេញវិញ»។
សំរាមផ្លាស្ទីកទាំងនេះត្រូវបានរកឃើញក្នុងទូកុងតឺន័រចំនួន៨៣ក្នុងកំពង់ផែស្វ័យ័តខេត្តព្រះសីហនុ។ សំរាមទាំងនេះនាំចូលពីប្រទេសកាណាដានិងសហរដ្ឋអាមេរិកតាមរយៈក្រុមហ៊ុន Chungyuen Plastic Manufacture Co.,Ltd។ ក្រុមហ៊ុននេះជាក្រុមហ៊ុនខ្មែរ។ នេះបើតាមសេចក្តីអះអាងផ្លូវការរបស់ក្រុមមន្ត្រីកម្ពុជា។
យោងតាមសេចក្តីប្រកាសព័ត៌មានរួមរបស់ក្រសួងបរិស្ថាន និងអគ្គនាយកដ្ឋានគយ និងរដ្ឋាករ ក្រុមហ៊ុន Chungyuen Plastic Manufacture Co.,Ltd នឹងត្រូវពិន័យជាប្រាក់ចំនួន១០៧៣លានរៀល ឬស្មើនឹងប្រមាណ២៥ម៉ឺនដុល្លារអាមេរិក។ ក៏ប៉ុន្តែមិនទាន់មានការកំណត់ទោសផ្សេងពីនេះបន្ថែមនោះទេ។
យោងតាមរបាយការណ៍ស្រាវជ្រាវរបស់ក្រសួងបរិស្ថាន និងអគ្គនាយកដ្ឋានគយ និងរដ្ឋាករកម្ពុជា កាកសំណល់ប្លាស្ទិកទាំងនេះត្រូវបានដឹកជញ្ជូនចូលមកប្រទេសកម្ពុជាចំនួន២៧លើក ចាប់តាំងពីខែកញ្ញាឆ្នាំ២០១៨រហូតដល់ចុងខែមករាឆ្នាំ២០១៩។
ក្នុងចំណោមកាកសំណល់សំរាមប្លាស្ទិកទាំងនេះមាន៧០កុងតឺន័រមកពីសហរដ្ឋអាមេរិកនិង១៣កុងតឺន័រមកពីប្រទេសកាណាដា ដោយឆ្លងកាត់តាមប្រទេសសិង្ហបុរី ម៉ាឡេស៊ីនិងប្រទេសវៀតណាម មុននឹងចូលមកដល់កំពង់ផែខេត្តព្រះសីហនុ។
លោកនេត្រ ភក្ត្រា អ្នកនាំពាក្យក្រសួងបរិស្ថាន បានថ្លែងក្នុងសន្និសីទកាសែតនៅរសៀលនេះដែរថា សំរាមប្លាស្ទិកទាំងនេះមិនមានសារធាតុពុលដែលអាចបង្កផលប៉ះពាល់ដល់បរិស្ថាន ឬសុខភាពមនុស្សនោះទេ។
«មិនមានជាតិពុលដែលធ្វើឲ្យគ្រោះថ្នាក់ដល់សុខភាពមនុស្សនិងបរិស្ថានទេ។ ប៉ុន្តែវាជាប្រភេទទំនិញហាមឃាត់ មិនឲ្យនាំចូល។ ទោះបីជាវាមិនប៉ះពាល់យ៉ាងណាក៏ដោយគឺចាំបាច់ត្រូវតែបញ្ជូនចេញទៅប្រភពដើមវិញ»។
លោកនេត្រ ភក្ត្រា បញ្ជាក់ថា អាជ្ញាសហរដ្ឋអាមេរិកនិងប្រទេសកាណាដា បានសហការជាមួយអាជ្ញាធរមានសមត្ថកិច្ចកម្ពុជាដើម្បីជួយសម្រួលដល់ការបញ្ជូនសំរាមប្លាស្ទិកទាំង១៦០០តោនទៅកាន់ប្រទេសទាំងពីរនេះវិញ។
ប្រទេសកម្ពុជាធ្លាប់ទទួលបានការនាំចូលនូវកាកសំណល់វិទ្យុសកម្ម និងកាកសំណល់ហ្វ៊ីលជាច្រើនតោនមកកាន់ខេត្តព្រះសីហនុ។ សារធាតុវិទ្យុសកម្មត្រូវបានជីកកប់ក្នុងដីដោយមិនបានបញ្ជូនត្រឡប់ទៅកាន់ប្រទេសកំណើតវិញនោះទេ៕
