ទីចាត់ការគយកម្ពុជាបានកំណត់អត្តសញ្ញាណក្រុមហ៊ុនចិនមួយថា បាននាំចូលកាកសំណល់ស្បោងប្លាស្ទិកចំនួន១៦០០តោនចូលមកកម្ពុជា។ នេះបើយោងតាមមន្ត្រីរបស់ប្រទេសកម្ពុជា។
កាកសំណល់ស្បោងប្លាស្ទិកទាំងនេះត្រូវបានរកឃើញក្នុងទូកុងតឺន័រចំនួន៨៣ក្នុងកំពង់ផែស្វយ័ត ខេត្តព្រះសីហនុកាលពីថ្ងៃអង្គារ។
លោកគុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជាបានប្រាប់VOA ជាខេមរៈភាសានៅថ្ងៃសុក្រនេះថាសម្រាមប្លាស្ទិកទាំង១,៦០០តោននេះនាំចូលដោយក្រុមហ៊ុនចិនមួយឈ្មោះ Chungyen។ក្រុមហ៊ុននេះមានភាគហ៊ុនខ្មែរនិងបាននាំកាកសំណល់ទាំងនេះមកកាន់កម្ពុជាជាបន្តបន្ទាប់ចាប់តាំងពីចុងឆ្នាំ២០១៨មកដល់ត្រឹមខែឧសភាឆ្នាំ២០១៩។
លោកគុណ ញឹមបញ្ជាក់បន្ថែមថា អគ្គនាយកដ្ឋានគយ និងរដ្ឋាករកម្ពុជារបស់លោកកំពុងស្រាវជ្រាវប្រវត្តិរបស់ក្រុមហ៊ុននេះ ហើយក្រុមហ៊ុននេះនឹងប្រឈមការផាកពិន័យព្រមទាំងការបិទក្រុមហ៊ុនជាស្ថាពរផងដែរ។
«បាទ យើងនឹងធ្វើការជាមួយក្រុមហ៊ុន អឺដើម្បីពិនិត្យមើល ហើយលទ្ធផលនៃការស្រាវជ្រាវនេះ យើងនឹងពិនិត្យតាមលទ្ធផលហ្នឹង អាចពិន័យលើក្រុមហ៊ុន អាចឈានទៅដល់បិទក្រុមហ៊ុន ហើយចំពោះទំនិញដែលជាទំនិញហាមឃាត់នាំចូលមកដល់កំពង់ផែរបស់យើងហ្នឹង យើងឲ្យក្រុមហ៊ុនបញ្ជូនទៅប្រទេសដើមវិញ»។
ទោះយ៉ាងណា លោកអគ្គនាយកនៃអគ្គនាយកដ្ឋានគយ និងរដ្ឋាករមិនអាចប្រាប់អត្តសញ្ញាណរបស់ម្ចាស់ក្រុមហ៊ុនចិននេះនៅឡើយទេ ដោយលោកអះអាងថា ក្រុមមន្ត្រីគយកំពុងស៊ើបអង្កេតបន្ថែមនៅឡើយ។
VOA ស្វែងរកក្រុមហ៊ុនឈ្មោះ Chungyen នេះនៅលើគេហទំព័ររបស់ក្រសួងពាណិជ្ជកម្ម ប៉ុន្តែមិនបានរកឃើញក្រុមហ៊ុននេះក្នុងចំណោមក្រុមហ៊ុនដែលបានចុះបញ្ជីពាណិជ្ជកម្មនោះឡើយ។ លោកគុណ ញឹមអះអាងថា ក្រុមហ៊ុននេះជាក្រុមហ៊ុនថ្មី ហើយទើបតែធ្វើការនាំចូលប៉ុណ្ណោះ។
មន្ត្រីគយរូបនេះបានបញ្ជាក់ថា ម្ចាស់ក្រុមហ៊ុន Chungyen របស់ចិននេះមិនបានមកបង្ហាញខ្លួននិងប្រកាសពន្ធគយចំពោះទំនិញដែលត្រូវបាននាំចូលនោះទេ តាំងពីចុងឆ្នាំ២០១៨មក។
ក្រុមមន្ត្រីកម្ពុជាអះអាងថា សម្រាមជាស្បោងប្លាស្ទិកទាំង១៦០០តោនត្រូវបាននាំចូលពីសហរដ្ឋអាមេរិកនិងប្រទេសកាណាដា។
ទោះយ៉ាងណា អ្នកស្រី Emily V Zeeberg អ្នកនាំពាក្យស្ថានទូតសហរដ្ឋអាមេរិកប្រចាំនៅកម្ពុជា បានប្រាប់ VOA តាមរយៈសារអេឡិចត្រូនិកថា ស្ថានទូតកំពុងត្រួតពិនិត្យរបាយការណ៍កាកសំណល់សម្រាមដែលត្រូវបាននាំចូលនៅកំពង់ផែស្វយ័តខេត្តព្រះសីហនុ។ ហើយស្ថានទូតបានផ្តល់កិច្ចសហការក្នុងការស្វែងរកអត្តសញ្ញាណស្ថាប័នដែលបាននាំកាកសំណល់ខុសច្បាប់នេះចូលប្រទេសកម្ពុជា។
គួរបញ្ជាក់ផងដែរថា បន្ទាប់ពីប្រទេសចិនបានបញ្ឈប់ការនាំចូលសម្រាមកាកសំណល់ដើម្បីធ្វើការកែច្នៃកាលពីដើមឆ្នាំ២០១៨ ប្រទេសលោកខាងលិចរួមមានសហរដ្ឋអាមេរិកអង់គ្លេស កាណាដា និងអូស្រ្តាលីបានចាប់ផ្តើមនាំចេញសម្រាមកាកសំណល់ជាច្រើនម៉ឺនតោនទៅប្រទេសអាស៊ីដទៃទៀត ដូចជាហ្វីលីពីន ម៉ាឡេស៊ី និងថៃជាដើម៕
