មន្រ្តីក្រសួងសុខាភិបាលឲ្យដឹងថា ការធ្វើតេស្តរកវីរុសកូរ៉ូណាសរុបនៅទូទាំងប្រទេសកម្ពុជា មានជាង ៤ពាន់នាក់ ហើយក្នុងនោះរកឃើញអ្នកផ្ទុកវីរុសប្រមាណ ១០០ករណី រហូតមកដល់ថ្ងៃអង្គារនេះ។
ក្រសួងសុខាភិបាលបានប្រកាស នៅថ្ងៃអង្គារនេះថា មានករណីថ្មីពីរទៀតនៃការឆ្លងវីរុសកូរ៉ូណានៅខេត្តសៀមរាប ដែលជាម្តាយនិងកូន។ បន្ថែមករណីថ្មីពីរនេះ ករណីឆ្លងវីរុសនេះសរុបទាំងអស់នៅកម្ពុជាមានចំនួន ១០៩ករណី។
នៅពេលទាក់ទងតាមទូរស័ព្ទដើម្បីសាកសួរព័ត៌មានលោក លី សូវ៉ាន់ អ្នកនាំពាក្យរបស់ក្រសួងសុខាភិបាល បានបដិសេធមិនប្រាប់ចំនួនសរុបនៃកំណើនមនុស្ស ដែលត្រូវបានធ្វើតេស្តរកវីរុសកូរ៉ូណាទេ។
លោកបានថ្លែងថា៖ «ចាំបាច់ដឹងរឿងហ្នឹងធ្វើអី?»
លោកបានឲ្យអ្នកសារព័ត៌មានសរសេរថា «មនុស្សរាប់ពាន់នាក់» ត្រូវបានធ្វើតេស្តរកវីរុសនេះ។
ប៉ុន្តែក្រោយមកអ្នកនាំពាក្យរូបនោះបានប្រាប់ VOA តាមប្រព័ន្ធតេលេក្រាមថា ចំនួនមនុស្សសរុបដែលត្រូវបានធ្វើតេស្តក្នុងប្រទេសមានចំនួន ៤១៥២នាក់ ដោយរាប់បញ្ចូលទាំងជនបរទេសផងដែរ។ ប៉ុន្តែ លោកថា ចំនួននេះមិនរាប់បញ្ចូលការធ្វើតេស្តអ្នកដំណើរនៅលើនាវាកម្សាន្តអន្តរជាតិ Westerdam ប្រមាណ ១៥៨០នាក់ និងនាវា Dream World ចំនួន ៣៦នាក់ ដែលបានសុំចតនៅប្រទេសកម្ពុជា កាលពីកន្លងទៅក្រោយមានការបដិសេធពីប្រទេសផ្សេង។
លោក លី សូវ៉ាន់ បន្តថា ក្រសួងសុខាភិបាលកម្ពុជា មានសម្ភារៈគ្រប់គ្រាន់ក្នុងការធ្វើតេស្ត។
លោកបានប្រាប់ VOA ថា៖ «សម្ភារៈមន្ទីរពិសោធន៍ក៏មិនអីដែរទាំងការប្រមូលយកមកធ្វើតេស្តហើយនឹងធ្វើតេស្តហ្នឹង គឺទាន់ហើយ។ ហើយយើងក៏ត្រៀមលក្ខណៈហើយ ហើយបើសិនមានករណីតម្រូវការធ្វើតេស្តច្រើនអី យើងមានមន្ទីរពិសោធន៍ជាច្រើនទៀត ដើម្បីត្រៀមលក្ខណៈធ្វើតេស្ត»។
លោកបញ្ជាក់បន្ថែមថា៖ «យើងធ្វើជាជំហានៗប៉ុន្តែបច្ចុប្បន្នយើងគាំទ្របានទាំងអស់។ ហើយលើកទឹកចិត្តឲ្យគ្រប់ខេត្តរាជធានីហ្នឹងប្រមូលវិភាគឲ្យបានច្រើនដើម្បីឲ្យប្រាកដថាយើងគ្មានករណីកើតឡើងក្នុងសហគមន៍របស់យើងទេ»។
កាលពីថ្ងៃទី១៨ ខែមីនា លោកស្រី ឱ វណ្ណឌីន អ្នកនាំពាក្យក្រសួងសុខាភិបាល បានបញ្ជាក់ថា មនុស្សជាង ១ពាន់នាក់ ត្រូវបានធ្វើតេស្តរកវីរុសកូរ៉ូណា។
ក្នុងរយៈពេលប៉ុន្មានសប្តាហ៍ចុងក្រោយនេះ ក្រសួងសុខាភិបាលតែងតែប្រកាសជារៀងរាល់ថ្ងៃអំពីចំនួនករណីឆ្លងជាបន្តបន្ទាប់។ នៅក្នុងសេចក្តីប្រកាសព័ត៌មាន នៅព្រឹកថ្ងៃអង្គារនេះ ក្រសួងសុខាភិបាលបានបញ្ជាក់ថា ចំនួនមនុស្សជាសះស្បើយពីជំងឺកូវីដនេះមានចំនួន ២៣នាក់ ហើយរហូតមកដល់ពេលនេះ។ ប៉ុន្តែ ក្រសួងមិនបានបញ្ជាក់អំពីចំនួនមនុស្ស ដែលត្រូវបានធ្វើតេស្តសរុបរហូតមកដល់ពេលនេះទេ។
លោក លី សូវ៉ាន់ បានបង្ហោះសារនៅលើហ្វេសប៊ុករបស់លោកនៅថ្ងៃអង្គារនេះថា រហូតមកដល់ពេលនេះមិនទាន់មានករណីឆ្លងទៅដល់សហគមន៍នៅឡើយទេ។ ប៉ុន្តែ លោកបញ្ជាក់ថា អាចមាន។
ការធ្វើតេស្តរកវីរុសកូរ៉ូណាក្នុងតំបន់អាស៊ីអាគេ្នយ៍ ក្នុងនោះមានប្រទេសកម្ពុជាផងដែរ ត្រូវបានអ្នកជំនាញសុខាភិបាលក្នុងតំបន់សង្ស័យថា ការធ្វើតេស្តមានកម្រិតទាបនេះ ប្រហែលជាមិនអាចបង្ហាញអំពីអត្រាពិតប្រាកដនៃអ្នកឆ្លងជំងឺកូវីដ១៩បានទេ។ ក្រុមអ្នកជំនាញបារម្ភថា បើសិនជាការបង្ហាញចំនួនមិនពិតប្រាកដនៃអ្នកឆ្លងជំងឺកូវីដ១៩ បង្កឲ្យមានភាពមិនសូវខ្វាយខ្វល់ នោះវាអាចធ្វើឲ្យវីរុសនេះកាន់តែរីករាលដាល។
លោក Mark Simmerman គឺជាអ្នកពិគ្រោះយោបល់ផ្នែកសុខភាពនៃក្រុមហ៊ុនឯកជនមួយមានមូលដ្ឋាននៅប្រទេសថៃ និងជាអតីតអ្នកជំនាញផ្នែករោគឆ្លងនៃមជ្ឈមណ្ឌលគ្រប់គ្រងនិងការពារជំងឺសហរដ្ឋអាមេរិក ដែលធ្វើការលើការឆ្លើយតបក្នុងតំបន់ទៅនឹងការផ្ទុះឡើងនៃជំងឺ SARS ក្នុងឆ្នាំ២០០៣។
លោកបានថ្លែងប្រាប់ VOA តាមសម្តីដើមថា៖ «នោះគ្រាន់តែជាផលវិបាកនៃសមត្ថភាពមានកម្រិតក្នុងការធ្វើតេស្តនិងការឃ្លាំមើលដែលនៅខ្សោយប៉ុណ្ណោះ។ នេះជាស្ថានភាពជាក់ស្តែងនៅក្នុងតំបន់នោះ។ក៏ប៉ុន្តែចំនួនដ៏តិចតួចទាំងនេះគឺមិនស៊ីគ្នាទៅនឹងស្ថានភាពជាក់ស្តែងទេ»។
កន្លងទៅ លោកនាយករដ្ឋមន្រ្តី ហ៊ុន សែន បានថ្លែងថា រដ្ឋាភិបាលមិនមានហេតុផលណាមួយក្នុងការលាក់បាំងចំនួនមនុស្សដែលឆ្លងវីរុសនោះទេ។
លោកមានប្រសាសន៍ថា៖ «រឿងទាំងអស់គ្មានការចាំបាច់ណាដើម្បីលាក់លាមជាមួយនឹងអ្នកដែលកើតជំងឺនេះទេ។ បើសិនជារដ្ឋាភិបាលចង់លាក់ក៏មិនអាចលាក់បានដែរ។ នេះគឺជារឿងពិតព្រោះសាមីខ្លួនគេគេដឹងថាគេឈឺឬមិនឈឺ»។
ទោះជាយ៉ាងណាកាលពីថ្ងៃច័ន្ទ លោក ហ៊ុន សែន បានប្រកាសថា រដ្ឋាភិបាលរបស់លោកបានបញ្ចប់សេចក្តីព្រាងច្បាប់មួយសម្រាប់ដាក់ប្រទេសក្នុងគ្រាអាសន្ន ដែលនឹងត្រៀមនៅពេលណាមួយដែលរដ្ឋាភិបាលយល់ថា ត្រូវប្រើកម្លាំងសន្តិសុខ ដើម្បីបង្ការការរាតត្បាតវីរុសកូរ៉ូណា។
រដ្ឋាភិបាលក៏បានប្រកាសបិទបណ្តោះអាសន្ននូវកាស៊ីណូទាំងអស់នៅទូទាំងប្រទេស ចាប់ពីថ្ងៃទី១ ខែមេសា និងបិទកុំឲ្យមានការនាំអង្ករសនិងស្រូវចេញទៅក្រៅប្រទេស ដើម្បីរក្សាទុកស្បៀងក្នុងប្រទេស ប្រសិនបើជំងឺកូវីដនេះរាលដាលកាន់តែខ្លាំង៕
