ប្រទេសកម្ពុជាអះអាងថា ខ្លួនបានរៀបចំជាស្រេចក្នុងការតាមដាន និងការពារជំងឺផ្លូវដង្ហើមមជ្ឈឹមបូព៌ា ឬ MERS បើទោះជាមិនទាន់មានករណីឆ្លងជំងឺនេះនៅក្នុងប្រទេសដ៏ក្រីក្រមួយនេះក្តី។ ប៉ុន្តែជំងឺនេះបានឆ្លងមកដល់ប្រទេសថៃ ដែលនៅជិតខាងកម្ពុជារួចទៅហើយ។
ក្រសួងសុខាភិបាលបានប្រកាសនៅថ្ងៃសុក្រនេះថា កម្ពុជាបានត្រៀមទប់ស្កាត់ជំងឺនេះ និងបានដាក់មន្រ្តីសុខាភិបាល រួចជាសេ្រចតាមច្រកសំខាន់ៗចូលមកកាន់ប្រទេសកម្ពុជា ដើម្បីការពារការចម្លងជំងឺផ្លូវដង្ហើមមជ្ឈឹមបូព៌ា ឬ MERS ខណៈពេលដែលប្រទេសថៃដែលនៅជិតខាងបានរកឃើញករណីដំបូងគេបង្អស់នៃជំងឺនេះកាលពីថ្ងៃព្រហស្បតិ៍។
យោងតាមសេចក្តីប្រកាសព័ត៌មានរបស់នាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាល ដែលបានផ្សព្វផ្សាយនៅក្នុងបណ្តាញសង្គមហ្វេសប៊ុកពិសេសរបស់នាយកដ្ឋាននេះ បានឲ្យដឹងថា កម្ពុជាបានត្រៀមរួចជាសេ្រចក្នុងការបន្តតាមដាន អប់រំ និងមានការដាក់ភ្នាក់មន្រ្តីសុខាភិបាលនៅតាមច្រកព្រំដែនសំខាន់ៗ ដូចជាព្រលានយន្តហោះ និងច្រកព្រំដែនប៉ោយប៉ែតជាដើម ដើម្បីត្រួតពិនិត្យអ្នកដំណើរដែលចូលមកប្រទេសម្ពុជា ហើយគណៈកម្មការពិសេសមួយក៏ត្រូវបានបង្កើតផងដែរ ដើម្បីធ្វើការលើជំងឺនេះ។
លោកវេជ្ជបណ្ឌិត លី សុវណ្ណ អ្នកនាំពាក្យក្រសួងសុខាភិបាល បានប្រាប់វីអូអេខេមរភាសាថា ប្រទេសកម្ពុជាពុំទាន់មានឆ្លងជំងឺនេះនៅឡើយទេ តែបានត្រៀមទប់ទល់រួចជាស្រេចហើយ។
«យុទ្ធសាស្ត្ររបស់យើងគឺថា ទី១គឺធ្វើការផ្សព្វផ្សាយព័ត៌មានដល់ប្រជាពលរដ្ឋអំពីស្ថានភាព អំពីព័ត៌មាន អំពីជំងឺ និងលេខទូរស័ព្ទទាន់ហេតុការណ៍។ ទីពីរគឺយើងពង្រឹងច្រកចេញចូលដែលសំខាន់ៗ ក្នុងនោះមានអាកាសយានដ្ឋានអន្តរជាតិភ្នំពេញ សៀមរាប ហើយនឹងច្រកព្រំដែនបាវិត និងប៉ោយប៉ែត។ ទីបីយើងបានត្រៀមមន្ត្រី ក្រុមអ្នកធ្វើការបន្ទាន់២៤ម៉ោងក្នុងមួយថ្ងៃ មួយអាទិត្យ៧ថ្ងៃ មិនមានថ្ងៃឈប់សម្រាកទេ ដើម្បីរកឃើញភ្លាម យើងចុះធ្វើការជាបន្ទាន់ ហើយយើងបានធ្វើការអប់រំគាត់រួចហើយ»។
លោកវេជ្ជបណ្ឌិត លី សុវណ្ណ ក៏បានបន្តថា ទោះបីជាបានត្រៀមយ៉ាងដូចនេះក្តី ក៏ក្រសួងនៅតែត្រូវការការចូលរួមពីប្រជាពលរដ្ឋ ជាពិសេសអ្នកដែលបានទៅកាន់ប្រទេសកូរ៉េខាងត្បូង និងតំបន់មជ្ឈឹមបូព៌ាក្នុងរដូវកាលបុណ្យរ៉ាម៉ាដាន់នោះត្រូវមានការប្រុងប្រយ័ត្នខ្ពស់។
លោកវេជ្ជបណ្ឌិត លី សុវណ្ណ បានថ្លែងយ៉ាងដូច្នេះថា៖ «យើងបានតៀមលក្ខណៈហើយ ក៏ប៉ុន្តែអ្វីដែលចាំបាច់បំផុតគឺសំណូមពរដែរទៅប្រជាពលរដ្ឋដែលបានធ្វើដំណើរទៅមជ្ឈឹមបូព៌ា ឬក៏ប្រទេសកូរ៉េខាងត្បូងហ្នឹងឲ្យគាត់មានការប្រុងប្រយ័ត្នខ្ពស់ ហើយឲ្យគាត់រាយការណ៍ជាបន្ទាន់ ក្នុងករណីខ្លួនមានជំងឺហ្នឹង។ ហើយក៏សុំអំពាវនាវទៅដល់គ្រូពេទ្យផងដែរ។ គ្រូពេទ្យត្រូវតែមានការប្រុងប្រយ័ត្នអ្នកជំងឺហ្នឹង ហើយបើគាត់មានជំងឺផ្លូវដង្ហើម ត្រូវសួរពីប្រវត្តិដំណើរគាត់។ ប្រសិនបើមានអ្វីមួយខុសធម្មតា ត្រូវរាយការណ៍មកតាមលេខទូរស័ព្ទទាន់ហេតុការណ៍»។
ជំងឺផ្លូវដង្ហើមមជ្ឈឹមបូព៌ា ឬ Middle East Respiratory Syndrome នេះបានផ្ទុះឡើងនៅក្នុងបណ្តាប្រទេសនៅមជ្ឈឹមបូព៌ា ហើយបានរីករាលដាលមកដល់ប្រទេសកូរ៉េខាងត្បូង និងថៃទៀតផង។ កាលពីថ្ងៃព្រហស្បតិ៍កន្លងទៅនេះ គ្រូពេទ្យនៃប្រទេសថៃ បានអះអាងថា ពាណិជ្ជករមកពីប្រទេសអូម៉ង់ជាអ្នកដែលមានជំងឺនេះមុនគេនៅក្នុងប្រទេសថៃ។ បុរសដែលមានអាយុ៧៥ឆ្នាំរូបនោះបានធ្វើដំណើរទៅកាន់ប្រទេសថៃ ដើម្បីព្យាបាលជំងឺបេះដូង។ ហើយមនុស្សចំនួនមនុស្ស៥៩នាក់ផ្សេងទៀត ដែលធ្វើការប៉ះពាល់នឹងអ្នកជំងឺរូបនេះក៏ត្រូវបានគេដាក់ក្រោមការឃ្លាំមើលមេរោគនេះនៅឯមន្ទីរពេទ្យផងដែរ។
លោកវេជ្ជបណ្ឌិត លី សុវណ្ណ ក៏បានឲ្យដឹងផងដែរថា៖ «កាលពីដើមខែមិថុនានេះ កម្ពុជាក៏ធ្លាប់បានដាក់ជនជាតិកូរ៉េខាងត្បូងចំនួនពីររូប ឲ្យឋិតក្រោមការឃ្លាំមើល និងពិនិត្យដោយក្រុមគ្រូពេទ្យកម្ពុជាផងដែរ ដោយសង្ស័យថា មានជំងឺផ្លូវដង្ហើមមជ្ឈឹមបូព៌ា ឬ MERS នេះ។ ក៏ប៉ុន្តែលទ្ធផលបានពីធ្វើតេស្តបង្ហាញថា អ្នកទាំងពីរមិនមានមេរោគនេះទេ៕