ក្រសួងការបរទេសកម្ពុជានៅថ្ងៃពុធនេះ បានប្រកាសមិនស្វាគមន៍លោក ហុង លីម សមាជិកសភានៃរដ្ឋវីចតូរីយ៉ា (Victoria) ប្រទេសអូស្ត្រាលី មានដើមកំណើតខ្មែរ ឲ្យចូលក្នុងប្រទេសកម្ពុជានោះទេ។
នៅក្នុងសេចក្តីប្រកាសមួយចេញដោយក្រសួងការបរទេសនាព្រឹកថ្ងៃពុធនេះ កម្ពុជាបានចាត់ទុក តំណាងរាស្ត្រថ្នាក់ក្រោមជាតិរបស់អូស្រ្តាលីដើមកំណើតខ្មែររូបនេះ ថាជាជនដែល«មិនត្រូវបានស្វាគមន៍» (Persona non grata)។
សេចក្តីសម្រេចនេះធ្វើឡើងបន្ទាប់ពីលោក ហុង លីម បានផ្តល់ការអធិប្បាយមួយជាមួយវិទ្យុអាស៊ីសេរី កាលពីថ្ងៃទី៤ ខែសីហាកន្លងទៅ ដោយប្រៀបធៀបប្រទេសកម្ពុជាទៅហ្នឹងរបបតិរច្ឆាន។ ក្រសួងការបរទេស និងមន្ត្រីជាន់ខ្ពស់រដ្ឋាភិបាលកម្ពុជា ជាបន្តបន្ទាប់ បានថ្កោលទោស និងអះអាងថា លោក ហុង លីម កំពុងតែប្រមាថប្រជាជាតិកម្ពុជា។
សេចក្តីប្រកាសនេះសរសេរថា៖ «ក្រសួងការបរទេស និងសហប្រតិបត្តិការអន្តរជាតិ ថ្កោលទោសដាច់អហង្ការបុគ្គលឈ្មោះ ហុង លីម ចំពោះការនិយាយបង្ខូចកិត្តិយសដែលផ្ទុយទាំងស្រុងពីការពិតជាក់ស្តែងនៅកម្ពុជា។ ...ការប្រមាថរបស់បុគ្គល ហុង លីម ចំពោះប្រជាជាតិកម្ពុជា បានជំរុញឲ្យក្រសួងការបរទេស សម្រេចចាត់ទុកបុគ្គលនេះជាជនមិនត្រូវបានស្វាគមន៍សម្រាប់ព្រះរាជាណាចក្រកម្ពុជា»។
ជាការឆ្លើយតបទៅនឹងក្រសួងការបរទេសកម្ពុជា នៅថ្ងៃពុធដដែលនេះ ស្ថានទូតប្រទេសអូស្ត្រាលីប្រចាំកម្ពុជាបានចេញសេចក្តីថ្លែងការណ៍មួយថា សម្ដីរបស់លោក ហុង លីម មិនមែនតំណាងឲ្យប្រទេសអូស្ត្រាលី ឬស្ថានទូតអូស្ត្រាលីនោះទេ ដោយសារតែ លោក ហុង លីម ជាសមាជិកសភានៃរដ្ឋវីចតូរីយ៉ា ប្រទេសអូស្ត្រាលី តែលោកមិនមែនជាសមាជិករដ្ឋាភិបាលសហព័ន្ធ ឬសភាសហព័ន្ធនោះទេ។
យ៉ាងណាក៏ដោយ សេចក្តីថ្លែងការណ៍របស់ស្ថានទូតអូស្រ្តាលីនេះ លើកឡើងថា ការបញ្ចេញមតិក្នុងវេទិកាសាធារណៈជាផ្នែកមួយសំខាន់របស់ប្រព័ន្ធលទ្ធិប្រជាធិបតេយ្យរបស់ប្រទេសអូស្ត្រាលី។
សេចក្តីថ្លែងការណ៍បានសរសេរបញ្ជាក់ថា «ប្រទេសអូស្រ្តាលីមានប្រពៃណីមុតមាំមួយក្នុងការបើកចំហឲ្យមានការផ្សព្វផ្សាយទស្សនៈផ្សេងៗគ្នានៅក្នុងវេទិកាសាធារណៈ។ ហើយនេះ គឺជាធាតុផ្សំដ៏សំខាន់សម្រាប់ប្រព័ន្ធប្រជាធិបតេយ្យរបស់ប្រទេសនេះ»៕
