នៅថ្ងៃច័ន្ទនេះ គណៈកម្មាធិការជាតិរៀបចំការបោះឆ្នោត (គ.ជ.ប.) ប្រកាសថា ប្រជាពលរដ្ឋជាង៨លាន៥សែននាក់ មានឈ្មោះក្នុងបញ្ជីបោះឆ្នោតឆ្នាំ២០១៨ ស្មើនឹងប្រមាណ៨៦.២៤ភាគរយនៃចំនួនពលរដ្ឋមានសិទ្ធិបោះឆ្នោតសរុបចំនួនជាង៩លាន៩សែននាក់។
បើតាមសេចក្ដីប្រកាសព័ត៌មានរបស់ គ.ជ.ប ចេញនៅថ្ងៃច័ន្ទនេះបញ្ជាក់ថា នៅថ្ងៃទី៣១ ខែធ្នូ ឆ្នាំ២០១៨នេះ គ.ជ.ប បានផ្តល់សុពលភាព និងប្រកាសផ្សាយលទ្ធផលផ្លូវការនៃការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០១៨។ លទ្ធផលផ្លូវការបង្ហាញថា ពលរដ្ឋចំនួនជាង៨លាន៥សែននាក់ (៨,៥៤៤,៨៨៥ នាក់) មានឈ្មោះក្នុងបញ្ជីឈ្មោះបោះឆ្នោត ឆ្នាំ២០១៨នេះ។
សេចក្តីប្រកាសព័ត៌មានបានបញ្ជាក់ថា៖
«លទ្ធផលផ្លូវការនៃការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០១៨នេះមានតួលេខ អ្នកចុះឈ្មោះបោះឆ្នោតថ្មីចំនួន ១៩៥,៣៨៥នាក់។ អ្នកដែលត្រូវបានលុបចេញពីបញ្ជីបោះឆ្នោតមានចំនួន ៥៦,៩៤១នាក់។ ចំនួនប៉ាន់ស្មានអ្នកដែលមានអាយុចាប់ពី១៨ឆ្នាំឡើងទៅមានចំនួន ៩,៩០៨,២៤៣នាក់»។
VOA មិនអាចទាក់ទងសុំការអត្ថាធិប្បាយពីអ្នកនាំពាក្យ គ.ជ.ប ទាំងពីររូប គឺលោក ហង្ស ពុទ្ធា និងលោក ឌឹម សុវណ្ណារុំ បានទេ រហូតដល់ល្ងាចថ្ងៃច័ន្ទនេះ។
ការប្រកាសពីចំនួនអ្នកមានឈ្មោះក្នុងបញ្ជីបោះឆ្នោតឆ្នាំ២០១៨នេះ ធ្វើឡើងបន្ទាប់ពីកម្ពុជាបានរៀបចំការបោះឆ្នោតជាតិ ដែលរងការរិះគន់យ៉ាងខ្លាំងពីបណ្តាប្រទេសកាន់លទ្ធិប្រជាធិបតេយ្យធំៗ ថាជាការបោះឆ្នោតដែលមិនមានភាពស្របច្បាប់ ដោយសារមិនមានការចូលរួមពីគណបក្សសង្គ្រោះជាតិ ដែលជាគណបក្សមានអ្នកគាំទ្រជាង៤០ភាគរយនៅទូទាំងប្រទេសកាលពីការបោះឆ្នោត ឃុំសង្កាត់ ឆ្នាំ២០១៧។
ក្រុមអង្គការឃ្លាំមើលសិទ្ធិមនុស្សអន្តរជាតិនានា បានហៅការបោះឆ្នោតជាតិកាលពីខែកក្កដា ឆ្នាំ២០១៨កន្លងទៅ ថាជាការបោះឆ្នោតក្លែងក្លាយ ដោយសារអវត្តមានគណបក្សប្រឆាំង ក្រោយតុលាការកំពូលកម្ពុជារំលាយគណបក្សនេះចោល ទៅតាមសំណើរបស់ក្រសួងមហាផ្ទៃ៕
