កាលពីចុងសប្តាហ៍កន្លងទៅនេះ មានការឆ្លងឆ្លើយគ្នារវាងសមាជិកនៃគណបក្សកាន់អំណាចនិងអ្នកនយោបាយជំទាស់ជើងចាស់មួយរូប ទាក់ទងនឹងការប្រកាសរបស់លោក សម រង្ស៊ី គាំទ្រលោក ទៀ សីហា ដែលត្រូវជាកូនប្រុសរបស់លោក ទៀ បាញ់ ជាអនាគតបេក្ខជននាយករដ្ឋមន្ត្រី។
ការប្រកាសនេះបានរងការប្រតិកម្មធ្ងន់ៗនិងការថ្កោលទោសពីមន្ត្រីជាន់ខ្ពស់របស់គណបក្សកាន់អំណាចខណៈអ្នកតាមដាននយោបាយកម្ពុជាបានចាត់ទុកយុទ្ធសាស្ត្រនយោបាយនេះ ថាមិនហុចប្រយោជន៍អ្វីដល់ជាតិ ហើយបានស្នើឱ្យអ្នកនយោបាយគ្រប់រូប បញ្ឈប់ការប្រើប្រាស់យុទ្ធសាស្ត្របង្កភាពសង្ស័យលើគ្នាទៅវិញទៅមកនេះ។
កាលពីថ្ងៃទី១០ ខែមីនា ឆ្នាំ២០២៣ លោក សម រង្ស៊ី ដែលកំពុងតែនិរទេសខ្លួននៅប្រទេសបារាំង បានសរសេរនៅលើទំព័រហ្វេសប៊ុកថា៖ «ក្នុងនាមគណបក្សសង្គ្រោះជាតិដែលបានទទួលសំឡេងសន្លឹកឆ្នោត ៤៤% (សល់ពីគេលួច) ក្នុងការបោះឆ្នោតថ្នាក់ជាតិ ឆ្នាំ ២០១៣ និងថ្នាក់ឃុំ-សង្កាត់ ឆ្នាំ ២០១៧ ខ្ញុំ សម រង្ស៊ី សូមគាំទ្របេក្ខភាពលោក ទៀ សីហា ជានាយករដ្ឋមន្ត្រី សម្រាប់អាណត្តិរដ្ឋសភាទី ៧ គឺពីឆ្នាំ ២០២៣ ដល់ ២០២៨។
អតីតមេដឹកនាំគណបក្សប្រឆាំងរូបនេះក៏បានជំរុញឱ្យប្រជាពលរដ្ឋដែលចង់បាន«សេរីភាព និងយុត្តិធម៌» ងាកមកគាំទ្រលោក ទៀត សីហា សព្វថ្ងៃជាអភិបាលខេត្តសៀមរាប លោក ទៀ បាញ់ រដ្ឋមន្ត្រីក្រសួងការពារជាតិ និងលោក ទៀ វិញ អគ្គមេបញ្ជាការរង នៃកងយោធពលខេមរភូមិន្ទ ដើម្បីឱ្យមានការផ្លាស់ប្តូរតាមគន្លងលទ្ធិប្រជាធិបតេយ្យ។
ជាការឆ្លើយតប លោក ទៀ សីហា កាលពីថ្ងៃទី ១១ ខែមីនា បានបង្ហោះសារនៅលើទំព័រហ្វេសប៊ុកថា លោកប្រឆាំងយ៉ាងដាច់អហង្ការចំពោះការការលើកឡើងរបស់លោក សម រង្ស៊ី។
លោកបញ្ជាក់ក្នុងន័យដើមថា៖ «តាំងពីខ្ញុំដឹងក្តីមក ប៉ាតែងតែនិយាយប្រាប់ខ្ញុំថា «ប្រទេសកម្ពុជា មានតែសម្តេចតេជោនាយករដ្ឋមន្ត្រីទេ ដែលអាចដឹកនាំប្រទេសបាន» ប៉ាតែងតែទូន្មានប្រដៅដល់ក្រុមគ្រួសារត្រកូល «ទៀ» ទាំងអស់ថា ទោះស្ថិតនៅក្នុងកាលៈទេសៈណាក៏ដោយយើងនៅតែស្មោះស្ម័គ្រចំពោះ សម្តេចតេជោនាយករដ្ឋមន្ត្រី»។
ចំណែកឯ លោក ទៀ បាញ់ ក៏បានថ្កោលទោសហើយបដិសេធ ចំពោះការលើកឡើងរបស់លោក សម រង្ស៊ី ដោយលោកបានចាត់ទុកខ្លឹមសារដែលបានលើកឡើងនោះថា «មានការញុះញង់បំបែកបាក់ជាតិ»។
លោកបញ្ជាក់នៅលើទំព័រហ្វេសប៊ុក កាលពីថ្ងៃទី១០ ខែមីនា ឆ្នាំ២០២៣ ថា៖ «ខ្ញុំនិងក្រុមគ្រួសារ នៅតែប្រកាន់ជំហរគាំទ្រទាំងស្រុងចំពោះ ឯកឧត្តម ហ៊ុន ម៉ាណែត ជាបេក្ខភាពនាយករដ្ឋមន្រ្តីនាពេលអនាគត។ កងយោធពលខេមរភូមិន្ទ បន្តប្តេជ្ញាការពារឯករាជ្យ អធិបតេយ្យ និងបូរណភាពទឹកដីបានគត់មត់ ប្រឆាំងការជ្រៀតជ្រែករបស់បរទេសចូលកិច្ចការផ្ទៃក្នុងកម្ពុជា ថែរក្សាសន្តិភាព ស្ថិរភាពនយោបាយ សន្តិសុខ សណ្តាប់ធ្នាប់ និងសុខសុវត្ថិភាពសង្គម»។
នៅថ្ងៃចន្ទនេះ មន្ត្រីជាន់ខ្ពស់នៃគណបក្សកាន់អំណាច បានអះអាងថា ល្បិចកលរបស់លោក សម រង្ស៊ី នេះ មិនអាចធ្វើឱ្យគណបក្សប្រជាជនកម្ពុជាបែកបាក់គ្នាឡើយ ផ្ទុយទៅវិញរឹតតែនាំសាមគ្គីភាពដល់ផ្ទៃគណបក្សកាន់អំណាច។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ប្រាប់វីអូអេនៅថ្ងៃចន្ទនេះថា៖ «ផ្ទុយទៅវិញគឺ គណបក្សប្រជាជនកាន់តែមានសាមគ្គីភាពនិងឯកភាពផ្ទៃក្នុងបក្សកាន់តែរឹងមាំថែមទៀត ដែលធ្វើឱ្យគណបក្សកាន់តែដើរតួនាទីមិនអាចខ្វះបាននៅក្នុងសង្គមកម្ពុជា»។
សាររបស់លោក សម រង្ស៊ី បែបនេះបានធ្វើឡើងក្នុងរយៈពេលជាច្រើនខែកន្លងមកនេះ បន្ទាប់ពីមានការប្រតិកម្មដាក់គ្នាទៅវិញទៅមករវាងលោក សម រង្ស៊ី និងលោក ហ៊ុន ម៉ាណែត អគ្គមេបញ្ជាការកងទ័ពជើងគោកកម្ពុជានិងជាកូនប្រុសច្បងរបស់លោកនាយករដ្ឋមន្ត្រី ហ៊ុន សែន ដែលត្រូវបានប្រកាសតែងតែងដោយប្រមុខមេដឹកនាំបក្សប្រជាជនកម្ពុជា ឱ្យក្លាយជាបេក្ខជននាយករដ្ឋមន្ត្រីរបស់បក្សនាពេលអនាគត។
សម្រាប់អ្នកតាមដាននយោបាយកម្ពុជា ការប្រកាសគាំទ្រក្រុមមួយផ្នែកនៃគណបក្សណាមួយនោះ គឺជាយុទ្ធសាស្ត្របំបែកសាមគ្គីភាពនិងបង្កភាពសង្ស័យក្នុងបក្ស ហើយបានក្លាយជា «វប្បធម៌នយោបាយ» មួយនៅក្នុងឆាកនយោបាយកម្ពុជា។ នេះបើតាមការលើកឡើងរបស់លោក មាស នី អ្នកស្រាវជ្រាវអំពីសង្គមនិងនយោបាយកម្ពុជា។ លោកបានឱ្យដឹងថា កន្លងមកមានតែគណបក្សកាន់អំណាចទេ ដែលប្រើប្រាស់យុទ្ធសាស្ត្រនេះ ប៉ុន្តែឥឡូវមកដល់ពេលនេះ គណបក្សប្រឆាំងក៏បាននិងកំពុងប្រើប្រាស់វាផងដែរ។
លោក មាស នី យល់ថា ការលាបពណ៌គ្នាបែបនេះ ឬក៏ការធ្វើឱ្យមានការមន្ទិលសង្ស័យចំពោះគ្នា មិនមែនជាវិថីត្រូវដើរឡើយ ដោយសារតែវាមិននាំផលប្រយោជន៍ដល់ជាតិ។
លោកថ្លែងថា៖ «ការធ្វើនយោបាយបំបែកបំបាក់គ្នានេះ វាជាវិធីសាស្ត្រមួយយកប្រៀបគ្នាទៅវិញទៅមក ហើយនិងធ្វើឱ្យគូបដិបក្ខចុះខ្សោយរៀងខ្លួន ប៉ុន្តែសម្រាប់ខ្ញុំៗមិនគាំទ្រឱ្យមានច្រកហ្នឹងទេ។ ប្រសិនបើអ្នកនយោបាយខ្មែរបង្ហាញពីសមត្ថភាព កុំបំបែកបំបាក់គ្នា ប៉ុន្តែគួរត្រូវតែប្រឹងប្រណាំងទាំងអស់ហ្នឹងដើម្បីរួមគ្នាទៅរកច្រកតែមួយគឺដើម្បីជាតិតែមួយទាំងអស់គ្នា»។
ពាក់ព័ន្ធនឹងភាពជោគជ័យដែលភាគីទាំងសងខាងប្រើប្រាស់យុទ្ធសាស្ត្របំបែកបំបែកនេះ លោក មាស នី អះអាងថា គណបក្សប្រជាជនកម្ពុជាតែងតែធ្វើបានសម្រេចច្រើន ដែលធ្វើឱ្យគណបក្សប្រឆាំងបែកបាក់គ្នាជាបំណែករហូតមកដល់ឥឡូវនេះ។ លោកបន្តថា គណបក្សប្រឆាំងហាក់ទទួលបានផលតិចតួចពីការប្រើប្រាស់យុទ្ធសាស្ត្រមួយនេះ។
អ្នកស្រាវជ្រាវសង្គមនិងនយោបាយរូបនេះ ក៏ស្នើឱ្យអ្នកនយោបាយគ្រប់រូបលុបចោលវប្បធម៌នយោបាយនេះ ហើយធ្វើនយោបាយតាមរយៈសមត្ថភាពផ្ទាល់ខ្លួន ដើម្បីជាប្រយោជន៍របស់ប្រទេសជាតិ។
លោក មាស នី ថ្លែងថា៖ «យើងគិតអំពីរឿងថាតើបញ្ហាសង្គមអ្វីខ្លះដែលគណបក្សមួយទៀតចង់បានដើម្បីឱ្យវាទៅមុខបន្តទៀត។ រីឯគណបក្សកាន់អំណាចក៏បន្តបង្កើតលក្ខណៈដូចគ្នាដែរ គឺកុំព្យាយាមបំបែកបំបាក់គេ ប៉ុន្តែពង្រឹងសមត្ថភាពខ្លួនឯងនៅក្នុងការដឹកនាំប្រទេសដើម្បីទាញយកប្រជាប្រិយភាពពីប្រជាពលរដ្ឋ ជាជាងការគិតតែរវល់ពីការងាកក្រោយ ហើយធ្វើការប្រយុទ្ធជាមួយនឹងគ្នាឯង ហើយគិតមើលនូវអ្វីដែលជាទិសដៅសម្រាប់ប្រទេសជាតិនាពេលខាងមុខ»។
ដោយឡែក អ្នកនាំពាក្យគណបក្សភ្លើងទៀន ដែលជាគណបក្សមួយកើតចេញពីគណបក្ស សម រង្ស៊ី របស់លោក សម រង្ស៊ី បាន បដិសេធផ្តល់មតិយោបល់ នៅពេលអ្នកសារព័ត៌មានវីអូអេទាក់ទងទៅ ដោយលោកចាត់ទុកថា នេះជាសេរីភាពនៃការបញ្ចេញមតិរបស់បុគ្គល។
លោក គីមសួរ ភិរិទ្ធ បានថ្លែងថា៖ «អាហ្នឹងជាសម្តី ជាប្រសាសន៍របស់គាត់។អ៊ីចឹងបងអត់មិនបានវិភាគអីពាក់ព័ន្ធជាមួយប្រសាសន៍របស់គាត់ទេ។ព្រោះឥឡូវយើងកំពុងផ្តោតទៅលើអ្វីដែលគណបក្សភ្លើងទៀនត្រូវធ្វើពាក់ព័ន្ធជាមួយគោលនយោបាយ និងការចុះជួបសកម្មជន»។
ការប្រកាសរបស់លោក សម រង្ស៊ី បែបនេះ បានកើតឡើង ខណៈកម្ពុជានឹងរៀបចំការបោះឆ្នោតថ្នាក់ជាតិដើម្បីជ្រើសរើសតំណាងរាស្ត្រសម្រាប់នីតិកាលទី៧ នៅថ្ងៃទី ២៣ ខែកក្កដាខាងមុខនេះ។ គណបក្សកាន់អំណាចបានប្រកាសជាសាធារណៈថា លោកនាយករដ្ឋមន្ត្រី ហ៊ុន សែន គឺជាបេក្ខជននាយករដ្ឋមន្ត្រីសម្រាប់អាណត្តិនេះ ស្របពេលដែលលោក ហ៊ុន ម៉ាណែត អគ្គមេបញ្ជាការកងទ័ពជើកគោកកម្ពុជានិងជាកូនប្រុសច្បងរបស់លោក ហ៊ុន សែន ត្រូវបានបក្សប្រកាសគាំទ្រធ្វើជាបេក្ខជននាយករដ្ឋមន្ត្រីនាពេលអនាគត៕
