សមត្ថកិច្ចកម្ពុជាដែលប្រយុទ្ធប្រឆាំងគ្រឿងញៀនចាប់បានគ្រឿងញៀនប្រមាណ ១តោនកន្លះ កាលពីថ្ងៃចន្ទ ដែលឧក្រិដ្ឋជននាំចូលពីប្រទេសឡាវ គ្រោងដឹកជញ្ជូនទៅកោះតៃវ៉ាន់។ នេះបើតាមមន្ត្រីជាន់ខ្ពស់នៃអាជ្ញាធរគ្រឿងញៀន។
ថ្លែងនៅក្នុងបទសម្ភាសន៍ជាមួយវីអូអេ លោក ឃឹម សារ៉ាត់ នាយកមន្ទីរប្រឆាំងបទល្មើសគ្រឿងញៀន លើកឡើងថា គ្រឿងញៀនទាំងនោះ គឺដឹកចេញពីតំបន់ត្រីកោណមាស ប្រទេសឡាវ ទៅកាន់ដែនកោះតៃវ៉ាន់ ដោយឆ្លងកាត់ប្រទេសកម្ពុជា។ លោកបន្ថែមថា មុននឹងចេញធ្វើសកម្មភាពដឹកជញ្ជូន កាលពីថ្ងៃទី ២២ ខែមករា ឆ្នាំ ២០២៤ ក្រុមឧក្រិដ្ឋជនទាំងនោះបានត្រៀមខ្លួនរហូតដល់ពីរសប្តាហ៍ទៅហើយ ដើម្បីដឹកគ្រឿងញៀនតាមទូកនៅក្នុងខេត្តព្រះសីហនុចេញទៅកោះតៃវ៉ាន់។
លោកថ្លែងថា៖«ថ្ងៃទី៣ ទី៤ ទី៥ ទី៦ វាចេញធ្វើសកម្មភាព។ រហូតដល់យប់ថ្ងៃទី២២នេះ វាធ្វើសកម្មភាពបាន ដោយសារយើងសង្ស័យខ្លាំងមែនទែន។ វាជួលមនុស្ស។ វាជួលគ្នាវាអី ឱ្យត្រៀមចាំហើយស្រេច ពេលវាដឹកអីវ៉ាន់ទៅលំហសមុទ្រ បានន័យថា ទៅលំហសមុទ្រអន្តរជាតិ ដើម្បីផ្ទេរគឺយើងដឹងសកម្មភាពទាន់គឺយើងកាក់ជាប់ជាមួយនឹងវរៈព្រំដែនទឹកជាមួយនឹងស្នងការខេត្តព្រះសីហនុបានជោគជ័យតែម្តង»។
លោក ឃឹម សារ៉ាត់ បន្ថែមថា មកទល់ពេលនេះ សមត្ថកិច្ចចាប់ឧក្រិដ្ឋជនបានចំនួន ៦នាក់ជាជនបរទេស ខណៈកំពុងតែស្វែងរកមេខ្លោង ១នាក់ទៀត ដើម្បីកសាងសំណុំរឿងបញ្ជូនទៅតុលាការខេត្តព្រះសីហនុ។ បើតាមមន្រ្តីជាន់ខ្ពស់រូបនោះ សមត្ថកិច្ចបានតាមដាននិងស៊ើបអង្កេតករណីនេះ អស់រយៈពេលមួយឆ្នាំមកហើយ។
វីអូអេមិនអាចសុំការអត្ថាធិប្បាយពីអ្នកនាំពាក្យសាលាដំបូងខេត្តព្រះសីហនុ លោក ធុច បញ្ចសន្តិភាព បាននៅឡើយទេ។
បើតាមការបង្ហោះនៅលើទំព័រហ្វេសប៊ុករបស់មន្ទីរប្រឆាំងគ្រឿងញៀន អាជ្ញាធរបានស្រាវជ្រាវស៊ើបអង្កេត ឃ្លាំមើលមុខសញ្ញាដឹកជញ្ជូនគ្រឿងញៀនឆ្លងដែន ពីប្រទេសឡាវឆ្លងកាត់កម្ពុជាតាមផ្លូវគោក រួចដឹកចេញតាមផ្លូវសមុទ្រ ទៅដែនកោះតៃវ៉ាន់។ ការស៊ើបអង្កេតនេះធ្វើនៅទីតាំង៣ផ្សេងៗគ្នា។ ទី១ កំពង់ផែកំពេញស្ទឹងហាវ ស្រុកស្ទឹងហាវ ខេត្តព្រះសីហនុ។ ទី២ ផ្ទះជួលគ្មានលេខ ផ្លូវទំនប់រលក ភូមិ៣ សង្កាត់លេខ១ ក្រុងព្រះសីហនុ។ ទី៣ ផ្ទះលេខ១៥៦ ផ្លូវ២៣ បុរីមួយកន្លែង ក្នុងសង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ។
បើតាមមន្ទីរប្រឆាំងគ្រឿងញឿន ជនសង្ស័យដែលត្រូវបានឃាត់ខ្លួនទាំងនោះមានសញ្ជាតិជាជនជាតិចិន ក្នុងនោះមានចិនតៃវ៉ាន់ផងដែរ និងជនជាតិសិង្ហបុរីម្នាក់។ វត្ថុតាងដែលចាប់យកបានរួមមានគ្រឿងញៀនប្រភេទកេតាមីន (Ketamine) ចំនួន១០០០ដុំ ស្មើ ៩៨០គីឡូក្រាម និង ៨០០ក្រាម និងគ្រឿងញៀនមេតំហ្វេតាមីន (ICE) ចំនួន ៥៣៤ដុំ ស្មើ ៥៣២គីឡូក្រាម និង ៦០៩,៦០ក្រាម។ គ្រឿងញៀនសរុបមានចំនួន ១៥៣០ដុំ ស្មើ ១តោន ៥១៣គីឡូក្រាម។ សមត្ថកិច្ចកម្ពុជាក៏ចាប់បានទូកនេសាទចំនួន ២គ្រឿង រថយន្ត ១គ្រឿង ម៉ូតូ១គ្រឿង និងទូរសព្ទដៃចំនួន ៨គ្រឿង។ នេះបើតាមព័ត៌មានដែលបង្ហោះនៅលើហ្វេសប៊ុករបស់មន្ទីរប្រឆាំងគ្រឿងញៀន។
នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ លោក អំ សំអាត លើកឡើងថា កន្លងមកមានច្រើនករណីដែលកម្ពុជាត្រូវបានក្រុមឧក្រិដ្ឋជនប្រើប្រាស់ជាកន្លែងឆ្លងកាត់ ដើម្បីដឹកជញ្ជូនគ្រឿងញៀន។ លោកបន្ថែមថា ការឆ្លងកាត់និងចែកចាយនេះក៏ប៉ះពាល់ដល់កម្ពុជាដែរ ដោយសារតែកម្ពុជាក៏ត្រូវបានដាក់ក្នុងបញ្ជីខ្មៅផងដែរ។
លោកបន្ថែមថា៖ «អាហ្នឹងវាជាចំណុចមួយដែលកម្ពុជាយើងនៅតែមិនសូវមានឈ្មោះល្អ បើសិនជាមានការឆ្លងកាត់ច្រើន។ អ៊ីចឹងហើយបានទាមទារឱ្យកម្ពុជាយើងពង្រឹងបន្ថែមនូវក្នុងការទប់ស្កាត់ និងការបង្ក្រាបទៅលើបញ្ហាគ្រឿងញៀន ទោះបីជាឆ្លងកាត់ក៏ដោយ លំហូរចូលមកកម្ពុជាក៏ដោយ»។
គួរបញ្ជាក់ថា កាលពីពេលថ្មីៗនេះ កម្លាំងកងរាជអាវុធហត្ថខេត្តព្រះវិហារបានរកឃើញគ្រឿងញៀនជាងមួយតោន នាំចូលពីប្រទេសឡាវ ដែលសមត្ថកិច្ចអះអាងថា ត្រូវបានក្រុមឧក្រិដ្ឋជនយកមកផ្លុងចោលនៅទីតាំងមួយក្នុងខេត្តនេះ៕
វេទិកាបញ្ចេញមតិ