លោកនាយករដ្ឋមន្រ្តី ហ៊ុន ម៉ាណែត លើកឡើងថា សេដ្ឋកិច្ចកម្ពុជានៅតែរក្សាបានក្នុងស្ថានភាពល្អមួយ ហើយអាចនឹងត្រឡប់មកប្រសើរវិញបានក្នុងរង្វង់៧ភាគរយ ដូចនឹងមុនជំងឺរាតត្បាត ក្នុងឆ្នាំ២០២៨។
ការអត្ថាធិប្បាយរបស់លោក ហ៊ុន ម៉ាណែត យ៉ាងដូច្នេះ ស្របពេលធនាគារពិភពលោកព្យាករថា កំណើនសេដ្ឋកិច្ចកម្ពុជានឹងកើនដល់ ៥,៨ ភាគរយ ក្នុងឆ្នាំ ២០២៤ នេះ និង ៦,១ ភាគរយ ក្នុងឆ្នាំ ២០២៥ ជាមួយការរំពឹងទុកអំពីការកើនឡើងនូវការវិនិយោគហេដ្ឋារចនាសម្ពន្ធ និងអត្ថប្រយោជន៍ដែលនឹងកើតចេញពីកិច្ចព្រមព្រៀងពាណិជ្ជកម្មនានា ដែលកម្ពុជាមានជាមួយបណ្តាប្រទេសនៅក្នុងតំបន់។ ធនាគារពិភពលោកមិនទាន់ធ្វើការវាយតម្លៃលើកំណើនសេដ្ឋកិច្ចកម្ពុជានៅត្រឹមឆ្នាំ ២០២៨នោះទេ។
ក្នុងពិធីបើកកិច្ចប្រជុំកំពូលធុរកិច្ចអាស៊ាន-កម្ពុជា នាថ្ងៃទី ២ ខែមេសា ឆ្នាំ ២០២៤ លោកនាយករដ្ឋមន្ត្រី ហ៊ុន ម៉ាណែត បានថ្លែងថា កម្ពុជាបានឆ្លងកាត់ការផ្លាស់ប្តូរគួរឱ្យកត់សម្គាល់ដោយបានវិវឌ្ឍខ្លួនទៅជាសេដ្ឋកិច្ចទំនើបដែលមានសមាហរណកម្មក្នុងសេដ្ឋកិច្ចសកល។ លោកបន្ថែមថា សេដ្ឋកិច្ចកម្ពុជាក៏បានបង្ហាញពីភាពធន់គួរឱ្យកត់សម្គាល់ ដោយមុនការឆ្លងរាលដាលនៃជំងឺកូវីដ១៩ កម្ពុជារក្សាបាននូវអត្រាកំណើនសេដ្ឋកិច្ចជាមធ្យមលើសពី៧ភាគរយក្នុងមួយឆ្នាំសម្រាប់រយៈពេល ២ទសវត្សរ៍ជាប់ៗគ្នា។
លោក ហ៊ុន ម៉ាណែត បានថ្លែងជាភាសាអង់គ្លេស និងត្រូវបានប្រែសម្រួលជាខេមរភាសាថា៖ «ទោះបីជាមានការបន្ទច់បង្អាក់នាពេលថ្មីៗនេះក៏ដោយ សេដ្ឋកិច្ចកម្ពុជាក៏បានស្ទុះងើបឡើងវិញជាមួយនឹងអត្រាកំណើន ៥,៦ ភាគរយ ក្នុងឆ្នាំ ២០២៣ និងត្រូវបានព្យាករថានឹងមានកំណើន ៦,៦ ភាគរយ ក្នុងឆ្នាំ ២០២៤ ហើយនឹងអាចត្រឡប់ទៅរកអត្រាកំណើនមុនជំងឺរាតត្បាតក្នុងរង្វង់ ៧ ភាគរយក្នុងឆ្នាំ ២០២៨ ដែលការណ៍នេះបង្ហាញអំពីអនាគតសេដ្ឋកិច្ចប្រកបដោយក្តីសង្ឃឹមរបស់កម្ពុជា»។
លោកបញ្ជាក់ទៀតថា កម្ពុជាគឺជាប្រទេសដៃគូដ៏រស់រវើក និងទាក់ទាញក្នុងសហគមន៍អាស៊ាន ដោយទីតាំងប្រកបដោយឧត្តមភាពរបស់កម្ពុជាបានផ្តល់នូវការតភ្ជាប់ដោយរលូននៅទូទាំងតំបន់ និងបង្កើតឱ្យមានប្រព័ន្ធអេកូឡូស៊ីនៃកិច្ចសហការ ដែលផ្ដោតលើការផ្តល់ផលប្រយោជន៍ទៅវិញទៅមក និងសុខុមាលភាពរួមក្នុងតំបន់។
បើតាមលោកនាយករដ្ឋមន្រ្តី ហ៊ុន ម៉ាណែត រដ្ឋាភិបាលកម្ពុជាទើបបានដាក់ចេញនូវ «កម្មវិធីពិសេសជំរុញការវិនិយោគក្នុងខេត្តព្រះសីហនុឆ្នាំ២០២៤» ដើម្បីផ្តល់អត្ថប្រយោជន៍ពិសេសដល់ការវិនិយោគក្នុងឆ្នាំ ២០២៤ នៅក្នុងខេត្តជាប់មាត់សមុទ្រមួយនេះ។
កម្មវិធីពិសេសនេះគឺជាជំហានដ៏សំខាន់មួយ ក្នុងការប្រែក្លាយខេត្តព្រះសីហនុជាតំបន់សេដ្ឋកិច្ចពិសេសពហុបំណង ដើម្បីបម្រើជាមជ្ឈមណ្ឌលតំបន់សម្រាប់ផលិតកម្ម ពាណិជ្ជកម្ម ធុរកិច្ច និងហិរញ្ញវត្ថុ ហើយរដ្ឋាភិបាលក៏បាននឹងកំពុងរៀបចំការរចនាឡើងវិញនូវតំបន់សេដ្ឋកិច្ចពិសេស ដោយគិតគូរពីលក្ខណៈចម្រុះនៃឧស្សាហកម្ម វិនិយោគិន និងអ្នកអភិវឌ្ឍតំបន់សេដ្ឋកិច្ចពិសេស។ នេះបើតាមលោកហ៊ុន ម៉ាណែត។
នៅក្នុងពិធីសំណះសំណាលជាមួយប្រជាពលរដ្ឋខ្មែរនៅក្នុងប្រទេសអូស្រ្តាលី កាលពីដើមខែមីនា ឆ្នាំ ២០២៤ លោកនាយករដ្ឋមន្រ្តី ហ៊ុន ម៉ាណែត ក៏បានលើកឡើងថា កម្ពុជាស្វាគមន៍វិនិយោគិនពីគ្រប់ប្រទេសមិនមែនតែប្រទេសចិនមួយនោះទេ។ លោកលើកឡើងថា ក្នុងរយៈពេល ៦ ខែមកនេះ ម៉ាក្រូសេដ្ឋកិច្ចរបស់កម្ពុជាមានស្ថិរភាពប្រសើរ ដែលចាប់តាំងពីរដ្ឋាភិបាលថ្មីចូលកាន់តំណែង គម្រោងវិនិយោគដែលកម្ពុជាទទួលបានមាន ១៧២ គម្រោងទាំងក្នុង និងក្រៅប្រទេស ដែលមានទឹកប្រាក់សរុបប្រមាណជិត ៤.០០០ លានដុល្លារ។
លោក ហុង វណ្ណៈ អ្នកជំនាញសេដ្ឋកិច្ចនៃវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា ប្រាប់វីអូអេថា ចាប់តាំងពីកម្ពុជាបានចាប់ផ្តើមបើកប្រទេសឡើងវិញក្នុងឆ្នាំ ២០២១ សេដ្ឋកិច្ចកម្ពុជាមានកំណើន និងដំណើរការឡើងវិញជាបណ្តើរៗ។
លោកបន្ថែមថា ប្រសិនបើប្រៀបធៀបសេដ្ឋកិច្ចកម្ពុជានៅមុនជំងឺរាតត្បាតកូវីដ១៩ វិបត្តិសេដ្ឋកិច្ចពិភពលោក វិបត្តិសង្គ្រាមរវាងរុស្សី-អ៊ុយក្រែន និងវិបត្តិសង្គ្រាមរវាងអ៊ីស្រាអ៊ែល និងក្រុមហាម៉ាសនោះ ក៏សេដ្ឋកិច្ចកម្ពុជាស្ថិតនៅក្នុងរង្វង់ដែលសមស្រប និងរក្សាកំណើនមួយដែលមានភាពនឹងន។
លោកថ្លែងថា៖ «អ៊ីចឹងជាបន្តបន្ទាប់យើងសង្កេតឃើញសន្ទុះនេះឃើញងើបមកវិញ ហ្នឹងគឺយើងមិនគិតអំពីគេហៅថាការព្យាករវាមិនដូចការដែលយើងអនុវត្តជាក់ស្តែងទេ វាអាចមានការលម្អៀងខ្លះ សូម្បីតែស្ថានភាពសេដ្ឋកិច្ចពិភពលោកក៏មានការព្យាករទម្លាក់ចុះទៅតាមស្ថានភាពពេលវេលាដែរ។ ប៉ុន្តែខ្ញុំសម្អាងពីសន្ទុះនៃការងើបជា ឬកើនឡើងជាដំណាក់កាលពីមួយឆ្នាំទៅមួយឆ្នាំ បើយើងពិនិត្យស្ថានភាពកាលហ្នឹងយើងសម្អាងឃើញថា ស្ថានភាពចេះតែល្អប្រសើរទៅ»។
ពេញមួយឆ្នាំ ២០២៣ សេដ្ឋកិច្ចកម្ពុជាគឺមិនមានការថយចុះ ឬសំយុងចុះឡើយ ហើយស្ថានភាពពាណិជ្ជកម្មក្រៅប្រទេសរបស់កម្ពុជាក៏នៅតែដំណើរការជាធម្មតាផងដែរ បើទោះបីជាក្នុងពិភពលោកកំពុងជួបប្រទះបញ្ហាជម្លោះសង្គ្រាមផ្សេងៗ។ នេះបើតាមលោក ហុង វណ្ណៈ។
លោក ហុង វណ្ណៈ បានកត់សម្គាល់វិស័យទេសចរណ៍នៅកម្ពុជាចាប់ផ្តើមកម្រើកឡើងវិញបន្តិចម្តងៗផងដែរ ព្រោះទេសចរអន្តរជាតិបានងាកត្រឡប់ទស្សនាតំបន់ទេសចរសំខាន់របស់ប្រទេសកម្ពុជា ដូចជាខេត្តសៀមរាប ខេត្តព្រះសីហនុ និងរាជធានីភ្នំពេញ។ លោកថា ព្រលានយន្តហោះស្តង់ដារអន្តរជាតិថ្មីៗនៅកម្ពុជាដែលទើបនឹងសាងសង់រួចរាល់ នឹងរួមចំណែកដល់ការទាក់ទាញទេសចរបរទេស និងក្រុមធុរកិច្ចផ្សេងទៀតមកកម្ពុជា។
ទាក់ទិនកំណើនសេដ្ឋកិច្ចកម្ពុជាដែលរដ្ឋាភិបាលរំពឹងថា នឹងកើនដល់ ៧ ភាគរយនៅឆ្នាំ ២០២៨ អ្នកជំនាញសេដ្ឋកិច្ចរូបនេះយល់ថា កម្ពុជាអាចសម្រេចបានកំណើននេះ ប្រសិនបើមិនមានបញ្ហាអ្វីមួយកើតឡើងនៅក្នុងពិភពលោក។
គួរបញ្ជាក់ថា កិច្ចប្រជុំកំពូលធុរកិច្ចអាស៊ាន-កម្ពុជា (Cambodia-ASEAN Business Summit) ឆ្នាំ២០២៤ ធ្វើឡើងក្រោមមូលបទ «បញ្ចេញសក្តានុពលអាស៊ាន៖ ការតភ្ជាប់បច្ចេកវិទ្យា និងកំណើនប្រកបដោយបរិយាប័ន្ន (Unleashing ASEAN's Potential: Connectivity, Technology, and Inclusive Growth)»។ កិច្ចប្រជុំកំពូលធុរកិច្ចអាស៊ាន-កម្ពុជា មានគោលបំណងជំរុញសក្តានុពលអាស៊ាន ដែលកម្ពុជាគឺជាចំណុចស្នូល និងលើកយកប្រធានបទសំខាន់ៗមកជជែកពិភាក្សារួមមាន តំណភ្ជាប់ខ្សែបញ្ជូនថាមពលអាស៊ានប្រកបដោយចីរភាព និងថាមពលកកើតឡើងវិញរបស់អាស៊ាន ហើយកម្ពុជាគឺជាច្រកទ្វារទៅកាន់អាស៊ាន និងការប្រើប្រាស់បច្ចេកវិទ្យាដើម្បីកំណើនប្រកបដោយបរិយាប័ន្ន។
កិច្ចប្រជុំកំពូលធុរកិច្ចអាស៊ាន-កម្ពុជាកើតឡើង ក្រោយពេលក្រុមប្រឹក្សាធុរកិច្ចអាមេរិក-អាស៊ាន បានមកបំពេញទស្សនកិច្ចផ្លូវការនៅកម្ពុជា ដែលតំណាងឱ្យក្រុមហ៊ុនអាមេរិកធំៗប្រមាណ ១៧ ក្នុងនោះមានប្រតិបត្តិការអាជីវកម្មលើវិស័យបច្ចេកវិទ្យាទំនើប បណ្ដាញផ្សព្វផ្សាយសង្គម ទេសចរណ៍ ហិរញ្ញវត្ថុ ថាមពល ផ្សារលក់រាយ កម្មន្តសាល និងធានារ៉ាប់រងជាដើម។
ក្រុមប្រឹក្សាធុរកិច្ចអាមេរិក-អាស៊ាន ក៏បានស្នើឱ្យកម្ពុជាមានកំណែទម្រង់លើបរិយាកាសវិនិយោគ ការគោរពសិទ្ធិមនុស្ស និងលទ្ធិប្រជាធិបតេយ្យ ដើម្បីទាក់ទាញក្រុមហ៊ុនអាមេរិកកាន់តែច្រើនមកបណ្តាក់ទុនវិនិយោគនៅក្នុងប្រទេសកម្ពុជា៕
វេទិកាបញ្ចេញមតិ