ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

កម្ពុជា​អរគុណ​ អាមេរិក​ចំពោះ​ការ​ចូលរួម​អបអរសាទរ​ ថ្ងៃបុណ្យ​ខួប​ឯករាជ្យ​ជាតិ


សិស្សានុសិស្ស​ឈរ​កាន់ផ្កា​ដើម្បី​អបអរ​ពិធី​បុណ្យឯករាជ្យ​ជាតិ​លើក​ទី​៦៥ នៅ​វិមាន​ឯករាជ​កាលពី​ព្រឹក​ថ្ងៃទី​០៩ វិច្ឆិកា២០១៨។(ទុំ ម្លិះ/VOA)

នៅក្នុង​សេចក្តី​ប្រកាស​ព័ត៌មាន​របស់​លោក​ ឧបនាយក​រដ្ឋមន្ត្រី​ ប្រាក់ សុខុន​ រដ្ឋមន្ត្រី​ក្រសួង​ការបរទេស​កម្ពុជា ​កាលពី​ថ្ងៃទី៨ ​ខែ​វិច្ឆិកា​ បាន​បង្ហាញ​នូវ​ការអរគុណ​ដល់​សមភាគី​អាមេរិក​ គឺ​លោក​រដ្ឋមន្ត្រី​ក្រសួង​ការបរទេស​អាមេរិក​ ម៉ៃខល ប៉ុមភីអូ​ (Michael Pompeo)។

ប្រទេស​កម្ពុជា​បាន​អរគុណ​ដល់​សហរដ្ឋ​អាមេរិក​ចំពោះ​ការ​ចូលរួម​អបអរសាទរ ជាមួយ​ប្រជាជន​កម្ពុជា​ ក្នុង​ពេល​កម្ពុជា​ប្រារព្ធ​ខួប​លើក​ទី​៦៥ ​នៃ​ទិវា​ឯករាជ្យ​ជាតិ ដោយ​ឆ្លៀត​ឱកាស​ទទូច​ដល់​អាមេរិក​ឲ្យ​ជួយ​ប្រជាជន​កម្ពុជា​ទទួល​បាន​ភាព​ប្រសើរ ថែម​ទៀត​ តាម​ស្មារតី​នៃ​ឯករាជ្យ​ភាព​ និង​អធិបតេយ្យភាព​កម្ពុជា។

នៅក្នុង​សេចក្តី​ប្រកាស​ព័ត៌មាន​របស់​លោក​ ឧបនាយក​រដ្ឋមន្ត្រី​ ប្រាក់ សុខុន​ រដ្ឋមន្ត្រី​ក្រសួង​ការបរទេស​កម្ពុជា ​កាលពី​ថ្ងៃទី៨ ​ខែ​វិច្ឆិកា​ បាន​បង្ហាញ​នូវ​ការអរគុណ​ដល់​សមភាគី​អាមេរិក​ គឺ​លោក​រដ្ឋមន្ត្រី​ក្រសួង​ការបរទេស​អាមេរិក​ ម៉ៃខល ប៉ុមភីអូ​ (Michael Pompeo)។ លោក​បាន​បញ្ជាក់​តាម​ខ្លឹមសារ​ដើម​ថា៖

«សារលិខិត​របស់​ ឯកឧត្តម​ ប៉ុមភីអូ ​ផ្តល់​ឲ្យ​យើង​ទាំងអស់​គ្នា​នូវក្តី​សង្ឃឹម​សារជាថ្មី​ថា​សហរដ្ឋ​អាមេរិក​ នឹង​ជួយ​ប្រជាជន​កម្ពុជា​ក្នុង​ការបោះ​ជំហាន​ទៅ​មុខ​ទៀត​ដោយ​គិត គូរ​ទៅ​ដល់​ និង​គោរព​ចំពោះ​ស្មារតី​នៃ​ឯករាជ្យ​ភាព ​និង​អធិបតេយ្យភាព​របស់ កម្ពុជា‍»។

លោក​ ប្រាក់ សុខុន​ ក៏បាន​បន្ថែម​ទៀត​ថា៖

«ក្នុង​ពេល​ជាច្រើន​ឆ្នាំទៀត​ តទៅ​អនាគត​ ប្រជាជន​កម្ពុជា​មាន​បំណង​ប្រាថ្នា​នឹង​ផ្តល់​នូវ​អាទិភាព​ខ្ពស់​បំផុត​ក្នុង​ការពង្រឹង​បន្តិច​ម្តងៗ​នូវ​មូលដ្ឋានគ្រឹះ​នៃ​លទ្ធិ​ប្រជាធិបតេយ្យ​របស់​ខ្លួន​ សំដៅ​ធានា​ឲ្យ​បាន​នូវ​សង្គម​មួយ​ដែល​មាន​សន្តិភាព ​ស្ថិរភាព​ វិបុលភាព ពហុភាគី ​និង​យុត្តិធម៌‍»។

ការឆ្លើយ​តប​របស់​រដ្ឋមន្ត្រី​ការបរទេស​កម្ពុជា ​គឺ​ក្រោយ​ភ្លាមៗ ​ដែល​លោក​រដ្ឋមន្ត្រី ក្រសួង​ការបរទេស​អាមេរិក​ ម៉ៃខល ប៉ុមភីអូ​ (Michael Pompeo) ​បាន​ថ្លែង​ក្នុង​សេចក្តី​ប្រកាស​ព័ត៌មាន​ ក្នុង​នាម​រដ្ឋាភិបាល​សហរដ្ឋ​អាមេរិក ​អបអរសាទរ​ជាមួយ​ពលរដ្ឋ​កម្ពុជា​នៅ​ថ្ងៃបុណ្យ​ខួបលើក​ទី៦៥ ​នៃទិវា​ឯករាជ្យ​ជាតិ​ថ្ងៃទី៩ ​វិច្ឆិកា‍ ​និង​ចូលរួម​ជាមួយ ពលរដ្ឋ​កម្ពុជា​ក្នុងក្តី​សង្ឃឹម​ចំពោះ​ការ​អភិវឌ្ឍន៍​សង្គម​កម្ពុជា​ដែល​មាន​សេរីភាព​ ការរីក​ចម្រើន ​មាន​ប្រជាធិបតេយ្យ ​និង​យុត្តិធម៌‍»។

សហរដ្ឋ​អាមេរិក ​មាន​ទំនាក់​ទំនង​ល្អ ​និង​ល្អក់កករ​នៅ​ពេល​ខ្លះ ដោយសារ​តែ​បញ្ហា​ប្រជាធិបតេយ្យ ​និង​សិទ្ធិ​មនុស្ស​កម្ពុជា​ជាពិសេស​ចុងក្រោយ​នេះ ​ដែល​គណបក្ស​ជំទាស់​ត្រូវ​តុលាការ​រំលាយ​ ហើយ​មិន​បាន​ចូលរួម​ការ​បោះឆ្នោត​ដែល​ផ្តល់​ជ័យ​ជម្នះ​ទាំងស្រុង ​ទៅ​ដល់​គណបក្ស​ប្រជាជន​កម្ពុជា​របស់​លោក​នាយក​រដ្ឋមន្ត្រី ហ៊ុន សែន។

ថ្លែង​ជា​សាធារណៈ​កាលពី​ថ្ងៃពុធ ​លោក​នាយក​រដ្ឋមន្ត្រី ​ហ៊ុន សែន ​នៃ​ប្រទេស​កម្ពុជា បាន​ប្រាប់ពី​ការ​ប្រុងប្រៀប​ធ្វើ​ពិធីបុណ្យ​ឯករាជ្យ​ជាតិ​នៅ​ថ្ងៃ​ទី៩​ វិច្ឆិកា ​និង​ការអរគុណ​ដល់​សម្តេចឳ​ដែល​បាន​ដឹកនាំ​ចលនា​ដណ្តើម​ឯករាជ្យ​កាលពី​ឆ្នាំ១៩៥៣​ ពី​បារាំង។​

លោក​នាយក​រដ្ឋមន្ត្រី​ក៏បាន​បង្ហាញ​ឲ្យដឹង​អំពី​ការបំផ្លាញ​ឯករាជ្យ និង​សន្តិភាព​របស់​កម្ពុជា​កាលពី​ឆ្នាំ១៩៧០​ ដែល​មាន​រដ្ឋប្រហារ​ទម្លាក់​សម្តេចឳ ​ហើយនឹង​ការណ៍​ដែល​កម្ពុជា​ត្រៀម​រៀបចំ​បុណ្យ​ខួប​២០ឆ្នាំ ​ក្រោយ​ពេល​ដែល​កម្ពុជា​ទទួល​បាន​សន្តិភាព និង​បញ្ចប់​សង្គ្រាម​ពេញលេញ​សម្រាប់​ការអភិវឌ្ឍន៍​ប្រទេស ​នៅ​ចុង​ឆ្នាំ​នេះ៕

XS
SM
MD
LG