ក្រសួងសុខាភិបាលបានប្រកាសថា រកឃើញករណីឆ្លងវីរុសកូរ៉ូណា១នាក់ទៀត ដែលជាជនបរទេស នាំឲ្យករណីឆ្លងទូទាំងប្រទេសកើនឡើងដល់ទៅ១១៥។ នេះបើយោងតាមសេចក្តីប្រកាសព័ត៌មានរបស់ក្រសួងសុខាភិបាលដែលចេញផ្សាយនៅព្រឹកថ្ងៃអង្គារនេះ។
ក្រសួងបញ្ជាក់ថា ជនបរទេសនោះ គឺជាស្រ្តីទេសចរជនជាតិវៀតណាម អាយុ២៧ឆ្នាំ មកពីប្រទេសវៀតណាម។ ស្រ្តីម្នាក់នោះកំពុងសម្រាកព្យាបាលនៅមន្ទីរពេទ្យមិត្តភាពខ្មែរសូវៀត។ បើតាមក្រសួងសុខាភិបាល ស្រ្តីរូបនោះបានចេញពីក្រុងបាវិត ខេត្តស្វាយរៀង ទៅវៀតណាម កាលពីថ្ងៃទី២ ខែមីនា ហើយត្រឡប់មកកម្ពុជាវិញនៅថ្ងៃទី១០ ខែមីនា។ ស្រ្តីនោះមានមិត្តប្រុសជនជាតិចិន ដែលបានចេញពីកម្ពុជា នៅថ្ងៃទី៣ ខែមេសា។ ក្រសួងមិនបានបញ្ជាក់ថាតើបុរសជាជនជាតិចិននោះ ចេញទៅប្រទេសណានោះទេ។
បើតាមសេចក្តីប្រកាសព័ត៌មានដដែល មនុស្ស៥នាក់ទៀតបានជាសះស្បើយពីជំងឺ។ គិតត្រឹមថ្ងៃអង្គារនេះ សរុបអ្នកជាសះស្បើយ មានទៅដល់៥៨នាក់៕
