ក្រសួងសុខាភិបាលកម្ពុជាបានឲ្យដឹងនៅថ្ងៃពុធនេះថា មនុស្ស ៦៤ នាក់ទៀត បានឆ្លងជំងឺកូវីដ១៩ ក្នុងព្រឹត្តិការណ៍ឆ្លងសហគមន៍ ដែលក្នុងនោះមានជនជាតិខ្មែរប្រមាណ ៤០ នាក់ ហើយការឆ្លងនេះបានរាលដាលទៅដល់ខេត្តសៀមរាបផងដែរ។
សេចក្តីប្រកាសព័ត៌មានរបស់ក្រសួងសុខាភិបាល ឲ្យដឹងថា មនុស្ស ៦៤ នាក់បន្ថែមទៀត បានឆ្លងជំងឺកូវីដ១៩ ដែលនាំឲ្យករណីឆ្លងសរុបក្នុងព្រឹត្តិការណ៍ «២០ កុម្ភៈ» កើនទៅដល់ ៦១៣ នាក់ ដែលក្នុងនោះមានខ្មែរប្រមាណ ៤០ នាក់ និងជនជាតិចិនជាង ២០ នាក់។
ករណីឆ្លងភាគច្រើនកើតមាននៅរាជធានីភ្នំពេញ និងខេត្តកណ្តាល។ នៅខេត្តសៀមរាប ក៏មានករណីឆ្លងម្នាក់ដែរលើជនជាតិខ្មែរ ដែលរស់នៅក្នុងស្រុកពួក។ នេះបើតាមសេចក្តីប្រកាសដដែល។
ក្រៅពីរាជធានីភ្នំពេញដែលឆ្លងច្រើនជាងគេ ករណីឆ្លងកូវីដ១៩ ចាប់តាំងពីថ្ងៃទី ២០ ខែកុម្ភៈ បានរាលដាលទៅខេត្តមួយចំនួន ដូចជាព្រះសីហនុ កណ្តាល ព្រៃវែង ស្វាយរៀង កំពង់ធំ កំពង់ចាម សៀមរាប និងខេត្តកោះកុងជាដើម។
កាលពីថ្ងៃអង្គារ លោកនាយករដ្ឋមន្ត្រី ហ៊ុន សែន បានបញ្ជាឲ្យរៀបចំកន្លែងដុតសព សម្រាប់បូជាសពក្នុងករណីមានអ្នកស្លាប់ដោយសារជំងឺកូវីដ១៩ ដែលលោកថា ការសម្រេចនេះអាចប៉ះពាល់ខ្លះដល់អ្នកគោរពសាសនាផ្សេងៗ។
គួរបញ្ជាក់ថា ករណីឆ្លងសរុបក្នុងប្រទេសកម្ពុជា មានចំនួន ១១២៤ នាក់ គិតចាប់ពីថ្ងៃឆ្លងជំងឺកូវីដ១៩ លើកដំបូងក្នុងប្រទេស រហូតមកដល់ថ្ងៃទី ១០ ខែមីនា ឆ្នាំ ២០២១ នេះ៕
