ប្រជាជនកម្ពុជាហាក់មានការគាំទ្រសេវាកម្មរថយន្តក្រុងនាពេលសព្វថ្ងៃនេះ នៅពេលចរាចរណ៍ ហាក់មានភាពកកស្ទះយ៉ាងខ្លាំងដោយសារមានឡាន និងម៉ូតូជាច្រើនដែលកំពុងធ្វើចរាចរណ៍លើដងផ្លូវនានា ហេតុនេះការទទួលយកសេវាកម្មរថយន្តក្រុងគឺជាជម្រើសដ៏ល្អ។
សេវាកម្មឡានក្រុងដែលរត់ក្នុងទីក្រុងភ្នំពេញសព្វថ្ងៃនេះត្រូវបានបើកឲ្យធ្វើចរាចរណ៍ចាប់តាំងពីឆ្នាំ២០១៤មកម្ល៉េះ។ កន្លងមកនេះ ចំនួនប្រជាពលរដ្ឋដែលធ្លាប់ប្រើសេវាកម្មឡានក្រុងនេះហាក់មានការធ្លាក់ចុះ ដោយសារកំឡុងពេលរង់ចាំឡានក្រុងមានរយៈពេលយូរ។ ក្រៅពីនេះចំណតឡានក្រុងខ្លះមានសភាពចង្អៀត ហើយពេលខ្លះអ្នករង់ចាំឡានក្រុងត្រូវចំណាយច្រើនប្រមាណជាងកន្លះម៉ោង ទើបឡានក្រុងមកដល់។
មន្ត្រីសាលាក្រុងនិយាយថា ពួកគេកំពុងស្វែងរកដំណោះស្រាយសម្រាប់បញ្ហានេះ ហើយក៏ដោះស្រាយបញ្ហាចរាចរណ៍ផងដែរ ព្រោះថា រថយន្តក្រុងក៏កំពុងតែ ដើរតួនាទីសំខាន់ក្នុងការកាត់បន្ថយការកកស្ទះចរាចរណ៍យ៉ាងខ្លាំងដែលផងដែរ។
នាងហ្វារីដាស អាយុ១៣ឆ្នាំ ដែលតែងតែជិះឡានក្រុងទៅរៀនរាល់ថ្ងៃ បានឲ្យដឹងថា ឡានក្រុងភាគច្រើនតែងតែមកយឺតនៅពេលព្រឹក។ នាងបន្តថា៖ «ភាគច្រើន ឡានក្រុងមកទៀងទាត់នៅពេលថ្ងៃត្រង់»។
នាងហ្វារីដាសប្រើសេវាកម្មឡានក្រុងនេះដោយមិនចាំបាច់បង់អ្វីទាំងអស់ ហើយនាងអាចសន្សំលុយបានទៀតផង។ ជាទូទៅនាងចាំឡានក្រុងពី១០ទៅ ១៥នាទី ប៉ុន្តែនាងថា ចំណតឡានក្រុងនីមួយៗត្រូវការកន្លែងអង្គុយបន្ថែមទៀត។ នាងនិយាយថា៖ «បើមានកន្លែងអង្គុយ វាងាយស្រួលដល់យើងអង្គុយចាំ»។
លោក ឡុង ឌីម៉ង់ អ្នកនាំពាក្យសាលាក្រុងភ្នំពេញ បានឲ្យដឹងថា៖«អ្វីៗមិនទាន់ល្អគ្រប់គ្រាន់នៅឡើយទេ។ យើងត្រូវការពង្រឹងបន្ថែមជាច្រើនទៀតលើសេវាកម្មនេះ»។
លោកឡុង ឌីម៉ង់ពន្យល់ថា បញ្ហាទីមួយគឺឡានក្រុងមិនទាន់មានគ្រប់គ្រាន់នៅឡើយទេ។ លោកបន្តថា ប៉ុន្តែបញ្ហាមួយទៀតគឺដោយសារប្រជាជននៅក្នុងប្រទេសកម្ពុជាមិនមានទម្លាប់ប្រើប្រាស់សេវាការដឹកជញ្ជូនសាធារណៈ ព្រោះនេះគឺជាជំហានដំបូង។ លោកបន្ថែមទៀតថា៖ «លើសពីនេះទៀតវាគឺដោយសារ ការកកស្ទះ ចរាចរណ៍»។
លោកនិយាយទៀតថា សាលារាជធានីភ្នំពេញកំពុងតែធ្វើកិច្ចការនេះហើយនិងក៏កំពុងតែរកវិធីដោះស្រាយផងដែរ។
រថយន្តក្រុងចំនួន៣ខែ្សត្រូវបានបើកដំណើរការកាលពីចុងឆ្នាំ២០១៤ ហើយរត់ចាប់ពីម៉ោង៥:៣០ព្រឹកដល់ម៉ោង៨:៣០យប់ជារៀងរាល់ថ្ងៃ។ សំបុត្រមួយតម្លៃ១៥០០រៀលមួយសន្លឹកស្មើនិង០,៣០ដុល្លារ។ តម្លៃសំបុត្រនេះគឺសមរម្យដែលអាចទទួលយកបាន។ ចំណែកឯសិស្សនិង មនុស្សចាស់គឺជិះដោយមិនថ្លៃ។
លោក ឡុង់ ឌីម៉ង់ បានឲ្យដឹងទៀតថា មនុស្សប្រមាណ៥.០០០ទៅ៦.០០០នាក់ទទួលយកសេវាកម្មរថយន្តក្រុងនេះជារៀងរាល់ថ្ងៃ ដែលនេះគឺជាការចូលរួមចំណែកមួយក្នុងការកាត់បន្ថយបញ្ហាគ្រោះថ្នាក់ចរាចរណ៍និងការកកស្ទះចរាចរ។ លោកបន្តថា នៅថ្ងៃអនាគត សាលាក្រុងក៏មានគម្រោងពង្រីកសេវានេះដោយបង្កើនចំនួនឡានក្រុងច្រើនថែមទៀត។
លោកថែ្លងដោយមានសុទិដ្ឋិនិយមថា៖ «បញ្ហាទាំងអស់នោះនឹងត្រូវដោះស្រាយក្នុងពេលឆាប់ៗ»៕
