លោកនាយករដ្ឋមន្ត្រី ហ៊ុន សែន នៅថ្ងៃព្រហស្បតិ៍នេះ បានអំពាវនាវឲ្យប្រជាពលរដ្ឋទៅទទួលយកវ៉ាក់សាំងបង្ការជំងឺកូវីដ១៩ ដូសជំរុញ ខណៈមនុស្សជិត៥លាននាក់ មិនទាន់ទទួលដូសជំរុញនេះនៅឡើយទេ។
លោក ហ៊ុន សែន បានថ្លែងបែបនេះក្នុងពិធីបិទសន្និបាតបូកសរុបការងារទេសចរណ៍ ដែលធ្វើឡើងនៅសណ្ឋាគារសុខារ៉េស៊ីដង់ ក្នុងរាជធានីភ្នំពេញ។
លោក ហ៊ុន សែន បានឲ្យដឹងថា ការចាក់វ៉ាក់សាំងជា «វិធីដែលល្អជាង» ហើយវាជា «រនាំងការពារខ្លួន» មិនឲ្យប្រជាពលរដ្ឋឈឺធ្ងន់ធ្ងរ។
លោកបញ្ជាក់ថា៖ «ប៉ុន្តែអ្វីដែលជាកង្វល់ គឺនៅបញ្ហាត្រង់ការទទួលយកនូវដូសជំរុញនៃវ៉ាក់សាំង។ ឥឡូវនេះ យើងខ្វះមនុស្សជាង ៤ លាននាក់ ជិត ៥ លាននាក់ទៀត ដែលមិនទាន់មកទទួលដូសទីបី»។
បើតាមលោក ហ៊ុន សែន ការធ្វើតេស្តរហ័ស និង PCR បង្ហាញថា មានករណីឆ្លងច្រើន«គួរឲ្យព្រួយបារម្ភ»នៃវីរុសអូមីក្រុងបំប្លែងថ្មី ដែលឆ្លងលឿន។
ក្រសួងសុខាភិបាលកម្ពុជា បានឲ្យដឹងថាអ្នកបានចាក់ដូសជំរុញឬដូសទី ៣ មានចំនួនជាង ៩ លាន ៥ សែននាក់ក្នុងចំណោមពលរដ្ឋ ១៦ លាននាក់ ហើយការឆ្លងអូមីក្រុងក្នុងសហគមន៍បានកើនដល់ ១៤.៥៩៩ ករណីហើយរួមទាំងករណីឆ្លងថ្មីចំនួន ១៧ នៅថ្ងៃព្រហស្បតិ៍នេះផង។
ទោះជាយ៉ាងណា លោក ហ៊ុន សែន បញ្ជាក់ថា រដ្ឋាភិបាល «មិនមានការចាំបាច់ណាមួយ» ដើម្បីបិទទីក្រុង សាលារៀន ឬហាងលក់ដូរទេ។ ប៉ុន្តែលោកអំពាវនាវឲ្យបង្កើននូវវិធានការការពារសុខភាពផ្ទាល់ខ្លួន។
កាលពីល្ងាចថ្ងៃពុធ លោក ហ៊ុន សែន ក៏បានផ្ញើសារជាសំឡេងមួយ ដោយអំពាវនាវឲ្យពលរដ្ឋទៅចាក់វ៉ាក់សាំងដូសជំរុញនេះឲ្យបានឆាប់រហ័ស។
លោកថ្លែងថា៖ «ជាមួយនឹងវិធានការសុខាភិបាលដែលត្រូវប្រកាន់យកនេះ ខ្ញុំនៅតែទទូចអង្វរកប្រជាពលរដ្ឋរបស់យើង ទទួលយកវ៉ាក់សាំងនូវដូសជំរុញ ព្រោះមានតែជម្រើសមួយនេះទេ ទើបយើងអាចជៀសផុតពីមហន្តរាយ ដែលអាចកើតឡើងចំពោះជីវិតមនុស្ស»៕
