ប្រជាពលរដ្ឋដែលកាន់ព្រះពុទ្ធសាសនាបានចាត់ទុកថ្ងៃបុណ្យភ្ជុំបិណ្ឌជាថ្ងៃដ៏មានសារៈសំខាន់ជាងពេលណាៗទាំងអស់។ រយៈពេល១៥ចាប់ពីថ្ងៃ១រោច ឬបិណ្ឌទី១ ប្រជាពលរដ្ឋចាប់ផ្តើមយកចង្ហាន់ និងទ័យទានទៅប្រគេនព្រះសង្ឃដែលគង់រងចាំព្រះវស្សានៅតាមទីវត្តអារាមផ្សេងៗ។ ពុទ្ធបរិស័ទខ្លះមានជំនឿថា ក្នុងរយៈពេល១៥ថ្ងៃ ចាប់ពីបិណ្ឌ១រហូតដល់បិណ្ឌ១៥យ៉ាងហោចណាស់គេត្រូវទៅដាក់បិណ្ឌឲ្យបានទៅ៧វត្ត ជាការល្អប្រសើរនិងបានកុសលផលបុណ្យច្រើន។
សម្តេចព្រះសង្ឃរាជាធិបតីប៊ូ គ្រី សម្តេចព្រះសង្ឃរាជនៃគណៈធម្មយុត្តិកនិកាយមានសង្ឃដីកាថា នេះជាជំនឿមួយដែរថា យើងទៅឲ្យបាន៧វត្ត និងជាកតញ្ញូ និងជាការសម្តែងគុណូបការៈដល់លោកអ្នកមានគុណ។
ព្រះអង្គមានសង្ឃដីកាទៀតថា តែបើយើងមិនបានដើរ៧វត្តក៏មិនថ្វីដែរ ឲ្យតែបានទៅមួយ ឬក៏២វត្តក៏មិនខុសនិងព្រះពុទ្ធសាសនាដែរ គ្រាន់តែជាការនិយមតែប៉ុណ្ណោះ៕
