ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ប្រជាពលរដ្ឋ​កម្ពុជា​ត្រៀម​រៀបចំ​ពិធី​ចូលឆ្នាំ​ថ្មី


​ពិធី​បុណ្យ​ចូល​ឆ្នាំ​ខ្មែរ​ឆ្នាំ្ម​មមី​ នឹង​ចូល​មក​ដល់​នៅ​ថ្ងៃ​ចន្ទ​សប្តាហ៍​ក្រោយនេះ។
​ពិធី​បុណ្យ​ចូល​ឆ្នាំ​ខ្មែរ​ឆ្នាំ្ម​មមី​ នឹង​ចូល​មក​ដល់​នៅ​ថ្ងៃ​ចន្ទ​សប្តាហ៍​ក្រោយនេះ។
ខណៈ​ដែល​ពិធី​បុណ្យ​ចូល​ឆ្នាំ​ខ្មែរ​ឆ្នាំ្ម​មមី​នឹង​ចូល​មក​ដល់​នៅ​ថ្ងៃ​ចន្ទ​សប្តាហ៍​ក្រោយ ​គេ​ឃើញ​មាន​សកម្ម​ភាព​លក់​ដូរ​និង​ការ​ធ្វើ​ដំណើរ​រប​ស់​ប្រជាពលរដ្ឋ​ក្នុង​ទី​ក្រុង​ភ្នំពេញ​មាន​ភាព​កាន់​តែ​មមា​ញឹក។

នៅ​ទី​ប្រជុំជន​និង​តាម​ដង​ផ្លូវសំខាន់ៗក្នុង​ទី​ក្រុង​ភ្នំពេញ​ដូច​ជា​នៅផ្សារ​អូរ​ឫស្សី​ តាម​ផ្លូវ​មហាវិថី​សហព័ន្ធ​រុស្ស៊ី ម៉ៅសេទុង​និង​មហាវិថី​ព្រះមុន្នីវង្ស​ជាដើម ហាង​លក់​ទំនិញ​ខ្លះ​បានចាប់​ផ្តើម​បន្ថយ​សកម្មភាព​លក់​ដូរ​ជា​បណ្តើរៗ​ខ្លះ​ហើយ។ ក៏​ប៉ុន្តែ​សម្រាប់​អាជីវករ​លក់​គ្រឿង​តុបតែង​ទទួល​ទេវតា​ឆ្នាំ​ថ្មី​វិញ​មាន​ភាព​មមាញឹក​យ៉ាង​ខ្លាំង។

លោក អ៊ឹម​ បុរិន្ទ នាយក​នៃ​គណៈ​កម្មការ​ស្រាវជ្រាវ​វិជ្ជា​ហោរា​សាស្រ្ត​ និង​ប្រពៃ​ណី​ទំនៀម​ទម្លាប់​ខ្មែរ​នៃ​ក្រសួង​ធម្មការ​និង​សាសនា​ថ្លែង​ថា ទេវតា​ឆ្នាំ​ថ្មី ឆ្នាំ​មមី​នឹង​សោយ​ប្រេង។ លោក​បាន​ផ្តល់​យោបល់​ពី​របៀប​រៀបចំ​មួយ​ចំនួន​សម្រាប់​ទទួល​ទេវតា​ឆ្នាំថ្មី។

«បាទ​សម្រាប់​ឆ្នាំ​ថ្មី ឆ្នាំ​មមី​នេះ យើង​គួរ​រៀប​រាន​ទេវតា​តាម​ផ្ទះ។ សម្រាប់​រណ្តាប់ យើង​រៀប​ទៅ​តាម​លទ្ធភាព​រៀងៗ​ខ្លួន។ អ្នក​ខ្លះ​គ្រាន់​តែ​រៀប​គ្រឿង​បូជា​ទៅ​បាន​ហើយ។​យើង​មាន​ក្រាល​ក្រណាត់​ពណ៌​លឿង។ ក្រៅ​ពីនោះយើង​មាន​ប្រេងគឺ​ប្រេង​ល្ងរ​ ប្រេង​សណ្តែក​ ឬ​ប្រេងឆា​ដែល​យើង​ប្រើ»។

ពិធី​ចូល​ឆ្នាំ​ថ្មី​ប្រពៃណី​ខ្មែរ​នឹង​ចាប់​ផ្តើមនៅ​ថ្ងៃ​ទី ១៤ ខែ មេសា វេលា​ម៉ោង​៨​និង​៧​នាទី​ព្រឹក។

ស្ទើរ​គ្រប់​ចំណត​រថយន្ត​ក្រុង​និង​តាក់ស៊ី​ក្នុង​រាជធានី​ភ្នំពេញ ពោរ​ពេញ​ដោយ​មនុស្សម្នា​ ក្មេង​ចាស់​ប្រុស​ស្រី ​រង់​ចាំ​ធ្វើ​ដំណើរ​ទៅ​ស្រុក​កំណើត​រៀងៗ​ខ្លួន។

លោក ហ៊ុន​ សំបូរ កំពុង​អង្គុយ​រង់ចាំ​ការ​ចេញ​ដំណើរ​ទៅ​ស្រុក​កំណើត​នៅ​ស្រុក​ឈូក​ខេត្ត​កំពត​នៅ​ចំណត​រថយន្ត​ឈ្នួល​នៅផ្សារ​ដើមគ។

ជា​កម្មករ​សំណង់​ក្នុង​ក្រុង​ភ្នំពេញ អាយុ​៥៤ឆ្នាំ​ ​លោក សំបូរ បាន​រអ៊ូ​ពី​ការ​តម្លើង​ថ្លៃ​ទ្វេ​ដង​របស់​ក្រុម​អ្នក​រត់​រថយន្ត​ឈ្នួល។ ជាមួយ​នឹង​ឥវ៉ាន់​សំពីង​សំពោង​ដាក់​នៅ​ក្បែរ​ខ្លួន លោក​មាន​គម្រោង​នាំ​គ្រួ​សារ​ដើរ​កំសាន្ត​និង​ទៅវត្ត​ក្នុងឱ​កាស​បុណ្យ​ចូល​ឆ្នាំថ្មី។

«មាន​គម្រោង​នាំ​គ្រួ​សារ​ទៅ​ដើរ​លេង​នៅ​ទឹក​ឈូរ និង​ទៅ​វត្ត​ខ្លះ​ចឹងទៅ។ បង​ប្អូន​ដើរ​លេង​ដូច​តែគ្នា​ដែរ»។

កម្មករ​សំណង់​ម្នាក់​ទៀត​ លោក ចេង​ ទិត្យ កំពុង​អង្គុយក្នុង​រថយន្ត​ក្រុង​កាពីតូល ​ផ្សារ​អូស្សី​វិញ​និយាយ​ថា លោក​ស៊ាំ​ទៅ​ហើយ​នឹង​ការ​តម្លើង​ថ្លែ​សេវាកម្ម​រថយន្ត​ក្រុង​ ពេល​ពិធីបុណ្យ​សំខាន់ៗ។ កម្មករ​វ័យ​២៤​ឆ្នាំ​រូបនេះ​មាន​ស្រុក​ដំណើត​នៅ​ស្រុក​គីរីវង្ស ខេត្ត​តាកែវ។

«ចូល​ឆ្នាំ​ហ្នឹង ខ្ញុំ​មាន​គម្រោង​ដើរ​លេង​ជិតៗ​ហ្នឹង​ តាម​វត្ត​ ជិត​ផ្ទះ​។ អត់​មាន​គម្រោង​ដើរ​លេង​ផ្លូវ​ឆ្ងាយ​ផង។ យើង​ខ្លះ​ថវិកា​ ហើយ​ណាមួយ​អត់​ចង់​ដើរ​លេង​ផ្លូវ​ឆ្ងាយ​ផង​មនុស្ស​ច្រើន​ចរាចរ​ណែន​ណាន់​តាន់​តាប់ពេក។ គ្រោះ​ថ្នាក់​ចរាចរណ៍​ហ្នឹង​ក៏​ច្រើន»។

ម្តុំ​គល់​ស្ពាន​ជ្រោយ​ចង្វា ​ចង្ងាយ​ប្រមាណ​ជាង​បី​គីឡូម៉ែត្រ​ពី​ផ្សារ​អូ​ឫស្សី សកម្មភាព​មនុស្ស​មា្ន​ធ្វើ​ដំណើរ​ត្រឡប់​ទៅ​ស្រុក​កំណើត​ ចាប់​ផ្តើម​មមាញឹក​តាំង​តែ​ពីព្រលឹម​ស្រាងៗ។ ប្រជាពលរដ្ឋ ​កម្មករ​រោងចក្រ​ អាជីវករ​ និង​កម្ម​ការ​សំណង់ អ្នក​ខ្លះ​អង្គុយ​ អ្នកខ្លះ​ឈរ​រង់ចាំ​រថយន្ត​ឈ្មួល។

វ៉ាន់ ពៅ អាយុ ២៩ ឆ្នាំ​ជា​កម្ម​ករ​ធ្វើ​ការ​ក្នុង​ហាង​លក់​ដូរ​នៅ​ផ្សារ​អូឡាំពិកដែល​កំពុង​ឈរ​រង់ចាំ​ជើង​រថយន្ត​ឈ្នួល​ទៅស្រុក​ណើត​នៅ​ខេត្ត​ស្វាយរៀង។ លោក​បាន​ទិញ​ទំនិញ​និង​របស់​របរ​ប្រើ​ប្រាស់​ខ្លះ​សម្រាប់​ជូន​ឪពុក​ម្តាយ និង​សាច់​ញាតិ​របស់​លោក។ បើទោះ​បី​ជា​ទំនិញ​ខ្លះ​បាន​ឡើង​ថ្លៃ​ជាង​ពាក់​កណ្តាល​លើស​ពេល​ធម្មតា​ក៏ដោយ​សម្រាប់​រូប​លោក ការ​ជួប​ជុំ​សាច់​ញាតិជា​រឿង​សំខាន់​ក្នុង​ឱកាស​បុណ្យ​ចូល​ឆ្នាំ។

«យើង​មក​រក​ស៊ី​ចឹង​មួយ​ខែ​ពីរ​ខែ​ទើប​បាន​ទៅ​ផ្ទះ​ម្តង។ ដល់​ពេល​ចឹង ខែ​ចូល​ឆ្នាំ យើង​បាន​មក​ជួយ​ជុំ​គ្នា​ទាំង​អស់មាន​អារម្មណ៍សប្បាយ​ដែរ។ ថ្ងៃ​ទី​១៤​ ១៥​ ១៦​ ខ្ញុំ​ប្រហែល​ដល់​១៨​ទើប​បាន​ត្រឡប់​មកវិញ។ ឲ្យ​គេ​មក​ស្រលះ​បន្តិច​សិន។ យើង​រកស៊ី​ខ្លួន​ឯង​ចឹង​វា​ម្យ៉ាង​ដែរ។ ចង់​មក​វិញ​ពេល​ណា​ក៏​បាន»។

ទោះ​បីជា​ប្រជាពលរដ្ឋ​ភាគច្រើន​សុទ្ធ​តែ​បាន​ត្រៀម​ចេញ​ដំណើរ​ទៅ​តាម​ស្រុក​កំណើត ​ឬ​ទី​កន្លែង​កំសាន្ត​យ៉ាង​ណា​ក្តី​ ស​ម្រាប់​លោក លី​ ឡុង អាយុ​៤៩​ឆ្នាំ ម្ចាស់​ហាង​លក់​គុយទាយ​និង​កាហ្វេ​នៅ​ម្តុំ​គល់​ស្ពាន់​ស្ទឹង​មានជ័យ​វិញ ការ​ឈប់​សម្រាក​នៅ​ផ្ទះ​ថ្ងៃ​បុណ្យ​ចូល​ឆ្នាំថ្មី​ជា​អ្វី​ដែល​លោក​ចង់​បាន​។​

«ថ្ងៃ​១៤​ដល់​ថ្ងៃ​១៧ យើង​នៅ​ផ្ទះ។ យើង​ឲ្យ​ក្មេងៗ​កម្មករ​គេ​ដើរ​លេង​ពីព្រោះ​ពេល​ហ្នឹង​អត់​មាន​ការ​ងារ​អ្វីទេ»។​

​បុណ្យចូល​ឆ្នាំដែល​មាន​រយៈ​ពេល​បី​ថ្ងៃ​ចាប់​ពី​ថ្ងៃទី​១៤​ដល់​ថ្ងៃទី​១៦​ខែ មេសា គឺ​ជាពិធី​បុណ្យប្រពៃណី​ខ្មែរយ៉ាង​សំខាន់ដែល​មាន​ប្រជា​ពលរដ្ឋ​រាប់​លាន​នាក់​បម្លាស់​ទី​ក្នុង​ស្រុក​និង​ដើរ​កំសាន្ត​ក្រៅ​ប្រទេស៕
XS
SM
MD
LG