ភ្ជាប់​ទៅ​គេហទំព័រ​ទាក់ទង

ភ្នំពេញ៖ គណ​បក្ស​សង្គ្រោះ​ជាតិ​ដែល​បាន​បង្កើត​ឡើង​ដោយ​គណ​បក្ស​ប្រឆាំង​ចំនួន​ពីរ​គឺ​គណ​បក្ស​សិទ្ធិ​មនុស្ស​និង គណ​បក្ស​សម រង្ស៊ី​ នៅ​ថ្ងៃ​ច័ន្ទ​នេះ​បាន​ដាក់​ពាក្យ​ដើម្បី​ស្នើ​សុំ​ចុះ​បញ្ជី​គណ​បក្ស​នយោ​បាយ​នៅ​ក្រសួង​មហា​ផ្ទៃជា​ផ្លូវ​ការ​សម្រាប់​ការ​ចូល​រួម​ប្រកួត​ប្រជែង​បោះ​ឆ្នោត​ឆ្នាំ​២០១៣​ខាង​មុខ​នេះ។​

គណ​បក្ស​សង្រ្គោះ​ជាតិ​មាន​រូប​សញ្ញា​ព្រះ​អាទិត្យ​រះ​និង​មាន​ពន្លឺ​ចំនួន​២៤​ដែល​តំណាង​ឱ្យ​ទូទាំង​២៤​ខេត្ត​ក្រុង​នៅ​ទូទាំង​ប្រទេស​នៅ​លើ​ផ្ទៃ​បួន​ជ្រុង​ស្មើ​ នៃ​ផ្ទៃ​មេឃ​ពណ៌​ខៀវ​ និង​មាន​បាវ​ចនា​ សង្គ្រោះ​ បម្រើ និង​ការពារ។​

លោក​ប៉ុល ហំម​ អនុ​ប្រធាន​គណៈ​កម្មការ​បណ្តោះ​អាសន្ន​នៃ​គណ​បក្ស​សង្គ្រោះ​ជាតិ​បាន​ប្រាប់​អង្គ​សន្និសីទ​ការ​សែត​ថា​ការ​ស្នើ​សុំ​ចុះ​បញ្ជី​គណ​បក្ស​នយោ​បាយ​របស់​គណ​បក្ស​សង្គ្រោះ​ជាតិ​មិន​មាន​ការ​រាំង​ស្ទះ​ណា​មួយ​ពី​ក្រសួង​មហា​ផ្ទៃ​ទេ។​លោក​បាន​បញ្ជាក់​ថាយោង​ទៅ​តាម​ច្បាប់​ស្តី​ពី​គណ​បក្ស​នយោ​បាយ​បានឱ្យ​ដឹង​ថាក្នុង​រយៈ​ពេល​១៥​ថ្ងៃ​ប្រសិន​បើ​ក្រសួង​មហា​ផ្ទៃ​មិន​មាន​ការ​ឆ្លើយ​តប​ទេមាន​ន័យ​ថា​ក្រសួង​បាន​យល់​ព្រម​ទទួលសេចក្តីជូន​ដំណឹង​ជា​ផ្លួវ​ការ​ហើយ​។​

«បើ​ហួស​រយៈ​ពេល​១៥​ថ្ងៃ​គេ​មិន​ឆ្លើយ​ទេ​យើងមាន​សិទ្ធិ​ក្នុង​ការ​រៀប​ចំ​ឯក​សារ​មួយ​ដំណាក់​ទៀត​ដើម្បី​ទៅ​ចុះ​បញ្ជី​គណ​បក្ស​នយោ​បាយ​ស្រប​តាម​ជំពូក​ទី​៥​នៃ​ច្បាប់​ស្តី​ពី​គណ​បក្ស​នយោ​បាយ​»។​

គណ​បក្ស​សង្គ្រោះ​ជាតិ​មាន​សមាស​ភាព​គណៈ​កម្មការ​បណ្តោះ​អាសន្ន​ចំនួន​៧​រូប​។​បួន​រូប​មក​ពី​គណ​បក្ស​សម រង្ស៊ី និង​បី​រូប​មក​ពី​គណ​បក្ស​សិទ្ធិ​មនុស្ស​ដែល​បាន​មក​ពី​ការ​បង្កើត​ដោយ​សមាជិក​ស្ថាបនិក​ចំនួន​៨៥រូប​ក្រោយ​ពីបាន​ជួប​ប្រជុំ​គ្នា​កាល​ពី​ថ្ងៃ​ទី​១៦​កន្លង​ទៅ​នេះ​នៅ​ទី​ស្នាក់​ការ​គណ​បក្ស​។​

លោក​សម រង្ស៊ី​ត្រូវ​បាន​តែង​តាំង​ជា​ប្រធាន​គណ​បក្ស​សង្គ្រោះ​ជាតិ​ចំណែក​លោក​កឹម សុខា​មិន​ទាន់​ត្រូវ​បាន​គណ​បក្ស​ដាក់​ឈ្មោះ​នៅ​ឡើយ​ទេ​ហើយ​លោក​ប៉ុល ហំម​ត្រូវ​ជំនួស​មុខ​តំណែង​បណ្តោះ​អាសន្ន​ពី​លោក​កឹម សុខា។​

លោក​ប៉ុល ហំម​បាន​មាន​ប្រសាសន៍​ថាយោង​តាម​សេច​ក្តី​ថ្លែង​ការណ៍​រួម​នៅ​ក្នុងទី​ក្រុង​ម៉ានីល​លោក​កឹម សុខា​ត្រូ​វ​បាន​តែង​តាំង​ជា​អនុ​ប្រធាន​ក៏​ប៉ុន្តែ​ពេល​វេលា​មិន​ទាន់​បាន​អនុញ្ញាត​ឱ្យ​លោក​កឹម សុខា​ទទួល​មុខ​នាទី​នេះ​ទេ​ហើយ​នៅ​ពេល​ដែល​គណ​បក្ស​នេះ​លេច​រូប​រាង​ជា​ផ្លួវ​ការណ៍​និង​មាន​ឈ្មោះ​លោក​សម រង្ស៊ី ​ជា​ប្រធាន​ហើយ​លោក​កឹម សុខា​ជា​អនុ​ប្រធាន​គណ​បក្ស។​

លោក​ឧត្តម​សេនីយ៍​ឯក ខៀវ​ សុភ័គ អ្នក​នាំ​ពាក្យ​ក្រសួង​មហា​ផ្ទៃ​មិន​អាច​ស្នើ​សុំ​ដើម្បី​សេចក្តី​អត្ថាធិប្បាយ​បាន​ទេ។​ចំណែក​លោក​ឌី សុក​ផាន​ ប្រធាន​នាយក​ដ្នាន​កិច្ច​ការ​នយោ​បាយ​នៃ​ក្រសួង​មហាផ្ទៃ​បាន​និយាយ​ថា​កំពុង​ជាប់​រវល់​ប្រជុំ​។​

ការ​សម្រេច​បង្កើត​គណ​បក្ស​សង្គ្រោះ​ជាតិ​បាន​ធ្វើ​ឡើង​បន្ទាប់​ពី​កិច្ច​ប្រជុំ​បិទ​ទ្វារ​រយៈ​ពេល​ចំនួន​ពីរ​ថ្ងៃ​នៅ​ទី​ក្រុង​ម៉ានីល​ប្រទេស​ហ្វី​លីពីន​កាល​ពី​ថ្ងៃ​ទី​១៦​និង​ថ្ងៃ​ទី​១៧​កន្លង​ទៅ។​
គណ​បក្ស​សង្គ្រោះ​ជាតិ​បន្ទាប់​ពី​បាន​ចុះ​បញ្ជី​នៅ​ក្រសួង​មហា​ផ្ទៃ​បាន​ប្រកាស​ទាម​ទារ​ឱ្យ​មាន​កំណែ​ទម្រង់​រចនា​សម្ព័ន្ធ​របស់​គណ​កម្មាធិការ​ជាតិ​រៀប​ចំ​ការ​បោះ​ឆ្នោត​និង​ទាម​ទារ​ឱ្យ​ការ​បោះ​ឆ្នោត​នេះ​ត្រូវ​តែមាន​វត្តមាន​របស់​មេដឹក​នាំ​ទាំង​ពី​រ​គឺ​លោក​កឹម សុខា ​និង​លោក​សម រង្ស៊ី​ចូល​រួម​ទើប​មាន​យុត្តិ​ធម៌។​

លោក​យឹម សុវណ្ណ​ អ្នក​នាំ​ពាក្យ​ចលនា​ប្រជា​ធិ​បតេយ្យ​សង្គ្រោះ​ជាតិ​បាន​និយាយ​ថា​គណ​បក្ស​គ្រប់​គ្រង​អំណាចចង់​ជាប់​ឆ្នោត​ដោយ​កិត្តិយស​និង​យុត្តិធម៌​មិន​មែន​ចង់​ជាប់​ឆ្នោត​ទុក​គូ​ប្រជែង​ឱ្យ​នៅ​ក្រៅ​សង្វៀន​ហើយ​ឡើង​ទៅ​ប្រដាល់​ម្នាក់​ឯង​ អាជ្ញា​កណ្តាល​ក៏​ជា​របស់​ខ្លួន​ឯង​នោះ​ទេ។​
លោក​បាន​បញ្ជាក់​ថា​អ្នក​ណា​ក៏​ដោយឱ្យ​តែចង់​ជាប់​ឆ្នោត​ដោយរបៀប​នេះ​គឺ​ជា​អ្នក​ឈ្នះ​ឆ្នោត​ដោយ​ពុំ​មាន​កិត្តិយស៕​
XS
SM
MD
LG