ភ្នំពេញ៖ ក្រុមមេធាវីរបស់ជនជាប់សង្ស័យម្នាក់ក្នុង០០៤ដែលមិនត្រូវបានបង្ហើបឈ្មោះជាផ្លូវការបាននិយាយនៅថ្ងៃព្រហស្បត្តិ៍នេះថា សាលាក្តីខ្មែរក្រហមខកខានក្នុងការផ្តល់ឱកាសដល់កូនក្តីរបស់ពួកខ្លួនឲ្យទទួលបានសិទ្ធិកាត់ក្តី «ដោយយុត្តិធម៌»។
លោកហ្គោរ៉ែន ស៊្លូតធើ (Goran Sluiter) លោករីឆាដ រ៉ូជើស៍(Richard Rogers)និងលោកម៉ុម លុជ្ស សហមេធាវីរបស់ជនសង្ស័យម្នាក់ក្នុងចំណោមជនសង្ស័យសរុបចំនួនបីនាក់លើកឡើងក្នុងសេចក្តីប្រកាសព័ត៌មានរបស់ខ្លួនដោយចោទត្រង់ៗថា រដ្ឋបាលខាងអង្គការសហប្រជាជាតិក្នុងសាលាក្តីខ្មែរក្រហម«ដកហូតសិទ្ធិ»កូនក្តីរបស់ខ្លួនក្នុងការទទួលជំនួយផ្នែកច្បាប់សម្រាប់ការកាត់ក្តីមួយ«ដោយយុត្តិធម៌»។
ក្រុមមេធាវីបានរៀបរាប់ដោយសំដៅទៅរកផ្នែកគាំពារការការពារក្តីដែលកាន់កាប់ដោយមន្ដ្រីក្នុងកូតាអង្គការសហប្រជាជាតិថា រដ្ឋបាលនេះបង្កការរាំងស្ទះដោយមិនព្រមទទួលស្គាល់មេធាវីបរទេសមួយរូបកាលពីដំបូងទីរួមទាំងការបដិសេធផ្តល់ចំណាយចំបាច់ដល់ការធ្វើដំណើររបស់ក្រុមមេធាវីទៅជួបជនសង្ស័យ។
សហមេធាវីការពារជនសង្ស័យលោកហ្គោរ៉ែន ស៊្លូតធើ លោករីឆាដ រ៉ូជើស៍ សហមេធាវីអន្តរជាតិ និងលោកម៉ុម លុជ្ស សហមេធាវីជនជាប់ចោទ លើកឡើងថា ការធ្វើបែបនេះពួកខ្លួនមិនបានចូលរួមសកម្មក្នុងការស៊ើបអង្កេត ឬការពារសិទ្ធិកូនក្តីនោះទេ។ សិទ្ធិដែលត្រូវទទួលបានការកាត់ក្តីដោយយុត្តិធម៌។
ក្រុមមេធាវីសង្កត់ធ្ងន់ថា កូនក្តីរបស់ពួកខ្លួន «នឹងមិនទទួលបានការកាត់ក្តីដោយយុត្តិធម៌ទៀតទេប្រសិនបើអាជ្ញាធររដ្ឋបាលអង្គការសហប្រជាជាតិដកហូតសិទ្ធិកូនក្តីក្នុងការទទួលសិទ្ធិបានជំនួយផ្នែកច្បាប់មានប្រសិទ្ធិភាព»នោះ។
លោកឡាស អលសិន (Lars Olsen) មន្ត្រីផ្នែកទំនាក់ទំនងកិច្ចការច្បាប់របស់សាលាក្តីខ្មែរក្រហមពន្យល់ថា ការសម្រេចមិនផ្តល់ថវិកាគាំទ្រដល់ដំណើរទៅជួបកូនក្តីដល់ក្រុមមេធាវីដោយហេតុថាផ្នែកគាំពារការការពារក្តីដោយឈរលើមូលដ្ឋាននៃស្ថានភាពបច្ចុប្បន្ននេះនៃសំណុំរឿង០០៤ គឺមិនទាក់ទងទៅនឹងការខ្វះការចំណាយនោះទេ។
«ផ្នែកគាំពារការការពារក្តីជឿថា សិទ្ធិដើម្បីទទួលបានការកាត់ទោសដោយត្រឹមត្រូវត្រូវបានការពារពីព្រោះថា ជនជាប់សង្ស័យមានមេធាវីការពាររួចទៅហើយនៅប្រទេសកម្ពុជា។ ហើយក្រុមមេធាវីនេះក៏មានបុគ្គលិកបរទេសផងដែរ»។
សហមេធាវីកម្ពុជាលោកមុំ លុជ្ស បដិសេផ្តល់សេចក្តីអត្ថាធិប្បាយបន្ថែម។
អង្គការសហប្រជាជាតិ និងភាគីកម្ពុជាក្នុងសាលាក្តីខ្មែរក្រហមបានខ្វែងគំនិតគ្នាយ៉ាងខ្លាំងក្លាលើសំណុំរឿងបន្ថែម០០៣ និង០០៤។ រដ្ឋាភិបាលកម្ពុជា និងភាគីកម្ពុជាក្នុងសាលាក្តីខ្មែរក្រហមបានប្រឆាំងជាចំហរការស៊ើបអង្កេត និងចាត់ការលើសំណុំរឿងទាំងពីរនេះដែលមានជនជាប់សង្ស័យសរុបចំនួនប្រាំនាក់។
គេដឹងក្រៅផ្លូវការថា ជនសង្ស័យទាំងនោះគឺមាស មុត និងស៊ូ ម៉េត ដែលជាអតីតមេទ័ពរបស់ខ្មែរក្រហម ក្នុងសំណុំរឿង០០៣ និងសំណុំរឿង០០៤មានអ្នកស្រីអ៊ឹម ចែម តា ទិត ឬ យឹម ទិត និងតា អាន ឬអោម អាន អតីតអ្នកទទួលខុសត្រូវ និងទទួលខុសត្រូវរងនៃការដ្ឋានទំនប់នៅស្រុកព្រះនេត្រព្រះ ខេត្តឧត្តរមានជ័យ។ ប្រជាពលរដ្ឋខ្មែរជាច្រើនពាន់នាក់បានស្លាប់ និងត្រូវសម្លាប់នៅទីនោះ។
តាមប្រភពស្និទ្ធនឹងសំណុំរឿងក្តីចុងក្រោយឲ្យដឹងថា សហមេធាវីការពារក្តីឲ្យជនសង្ស័យដែលមានឈ្មោះថា តា អាន ឬអោម អាន៕
