ភ្ជាប់​ទៅ​គេហទំព័រ​ទាក់ទង

អ្នក​ភូមិបឹងកក់ និង​បូរីកីឡា​ទាមទារ​ប្លង់​កម្មសិទ្ធិ​ដី

  • ហេង រស្មី

អ្នកភូមិ​បឹងកក់ ​និង​បុរីកីឡា​និយាយ​ថា​ ខ្លួន​បែរ​ជា​ប្រឈម​នឹង​ប៉ូលិស​ជាជាង​ក្រុមហ៊ុន

នៅ​ពី​មុខ​អគារ​រដ្ឋ​សភា​កុមារ​តូចៗ​និង​ប្រជា​ពលរដ្ឋ​មក​ពី​សហ​គម​ន៍​ទាំង​ពីរ​បាន​មក​បន្ត​ការ​ទាម​ទារ​របស់​ខ្លួន​ក្នុង​ពេល​ដែល​សមា​ជិក​រដ្ឋ​សភា​បាន​ឈប់​សម្រាក​ក្នុង​ពេល​បុណ្យ​រដ្ឋ​ធម្ម​នុញ្ញ​នៅ​ថ្ងៃ​ចន្ទ​នេះ។​

ភ្នំពេញ៖ ខណៈ​ដែល​លោក​នាយក​រដ្ឋ​មន្ត្រី​ហ៊ុន សែន​បាន​សន្យាថា​នឹង​ចេញ​ប្លង់​កាន់​កាប់​ដី​ធ្លី​ជូន​ប្រជា​ពលរដ្ឋ ក្រុម​អ្នក​ភូមិ​បូរី​កីឡា និង​បឹងកក់​ដែល​រង​គ្រោះ​ដោយសារ​ការ​រំលោភ​យក​ដី​ធ្លី​យ៉ាង​លេច​ធ្លោ​មួយ​ក្នុង​ប្រទេស​កម្ពុជា​បាន​ទាម​ទារ​ឲ្យ​រដ្ឋាភិបាល​ផ្តល់​ប្លង់​កម្មសិទ្ឋិ​ដល់​ពួក​គេ និង​កំណត់​ព្រំ​ប្រទល់​ដី​ឲ្យ​បាន​ច្បាស់​លាស់។ បន្ទាប់​ពី​ជម្លោះ​ដ៏​រ៉ាំ​រ៉ៃ​នេះ​បាន​អូស​បន្លាយ​ជា​ច្រើន​ឆ្នាំ។​
លោក​នាយក​រដ្ឋ​មន្ត្រី ហ៊ុន សែន​កាលពី​សប្តាហ៍មុន​បាន​ធានា​អះ​អាង​ថា​ក្រុម​និសិ្សត​យុវជន​ស្ម័គ្រ​ចិត្ត​នឹង​បន្ត​ការ​ងារ​វាស់​វែង​កំណត់​ព្រំ​ដី​ជូន​ប្រជា​ពលរដ្ឋ​ហើយ​លោក​បាន​សន្យា​ថា​នឹង​មិន​ឲ្យ​ប្រជា​ពលរដ្ឋ​គ្មាន​ប្លង់​កម្ម​សិទ្ឋិ​ដី​ស្រប​ច្បាប់​នោះ​ទេ។​
ខណៈដែល​ក្រុម​និសិ្សត​ចុះ​វាស់​វែង​កំណត់​ព្រំ​ប្រទល់​ដី​ជូន​ប្រជា​ពលរដ្ឋ​នៅ​តាម​បណ្តា​ខេត្ត​ផ្សេង​ៗ​នោះ ដោយ​ឡែក​នៅ​តំបន់​បឹងកក់ និង​តំបន់​បូរី​កីឡា​ដែល​នៅ​មិន​ឆ្លាយ​ប៉ុន្មាន​ពី​ផ្ទះ​លោក​នាយក​រដ្ឋ​មន្ត្រី​ហ៊ុន សែន ក្រុម​យុ​វជន​ស្ម័គ្រ​ចិត្ត​ទាំង​នោះ​បាន​មើល​រំលង​ទៅ​វិញ​។​
ដោយសារ​តែ​គ្មាន​ព្រំប្រទល់​ដី​ចំនួន​ជាង​១២​ហិកតា​ដែល​លោក​នាយក​រដ្ឋ​មន្ត្រី​ហ៊ុន សែន​បាន​ធ្វើ​ប្រទានកម្ម​ដល់​ប្រជា​ពលរដ្ឋ​នៅ​តំបន់​បឹងកក់ និង​ពុំ​ទាន់​មាន​ប្លង់​កម្ម​សិទ្ឋិ​ត្រឹម​ត្រូវ ក្រុម​ប្រជា​ពលរដ្ឋ​នៅក្នុង​សហគម​ន៍បូរី​កីឡា និង​តំបន់​បឹងកក់​នៅ​តែ​បន្ត​ការ​ទាម​ទារ​របស់​ខ្លួន​ដើម្បី​រក​ដំណោះ​ស្រាយ។​
នៅ​ពី​មុខ​អគារ​រដ្ឋ​សភា​កុមារ​តូចៗ​និង​ប្រជា​ពលរដ្ឋ​មក​ពី​សហ​គម​ន៍​ទាំង​ពីរ​បាន​មក​បន្ត​ការ​ទាម​ទារ​របស់​ខ្លួន​ក្នុង​ពេល​ដែល​សមា​ជិក​រដ្ឋ​សភា​បាន​ឈប់​សម្រាក​ក្នុង​ពេល​បុណ្យ​រដ្ឋ​ធម្ម​នុញ្ញ​នៅ​ថ្ងៃ​ចន្ទ​នេះ។​ គោល​បំណង​នៃ​ការ​ទាម​ទារ​នេះ​គឺ​ដើម្បី​ឲ្យ​តំណាង​របស់​ពួក​គេ​ចំនួន​ពីរ​នាក់​គឺ​អ្នក​ស្រី​យោម បុប្ជា និង​អ្នក​ស្រី​ទឹម សាក់​មុន្នី​ត្រូវ​បាន​ដោះលែង​ចេញ​ពី​ពន្ឋនាគារ​និង​ទាម​ទារ​ឲ្យ​រដ្ឋា​ភិបាល​ផ្តល់​ប្លង់​កម្មសិទ្ឋិ​ដី​ធ្លី​ដល់​ពួកគេ។
អ្នក​ស្រី កង ជឺ អាយុ​៧៥​ឆ្នាំ​ ជន​រង​គ្រោះ​ដោយសារ​ការ​បាត់​បង់​ដី​ធ្លី​នៅ​តំបន់​បឹងកក់​ដែល​បាន​មក​ចូល​រួម​ត​វ៉ា​នៅ​ពី​មុខ​អគារ​រដ្ឋ​សភា​នៅ​ថ្ងៃ​ចន្ទ​នេះ​បាន​និយាយ​ថា អ្នក​ស្រី​បាន​ឮ​ប្រសាសន៍​លោក​នាយក​រដ្ឋ​មន្ត្រី​ហ៊ុន សែនដែរ ក៏ប៉ុន្តែ​ព្រំប្រទល់​ដី​របស់​អ្នក​ស្រី​និង​ប្រជា​ពលរដ្ឋ​ផ្សេង​ទៀត​មិន​ទាន់​បាន​កំណត់​ច្បាស់​លាស់​នៅ​ឡើយ​ទេ​។​
«​បើ​ប្រគល់​មក​ខ្ញុំ​លែង​មក​តវ៉ា​ហើយ លែង​រវល់​ហើយ។ មិន​មែន​ចង់​ដើរ​ទេហត់​ចង់​ងាប់​ ចាំ​ជា​រៀល​រាល់​ល្ងាច»។​
អ្នក​ស្រី កង ជឺ អាយុ​៧៥​ឆ្នាំ​
លោក​នាយក​រដ្ឋ​មន្ត្រី​ហ៊ុន សែន​បាន​ធ្វើ​ប្រទាន​កម្ម​ដីទំហំ១២​,៤៤ហិកតា​កាល​ពី​ខែ​សីហា​ឆ្នា​២០១១ដល់​ប្រជា​ពលរដ្ឋ​ដែល​នៅ​សេស​ល់​ពី​ការ​បណ្តេញ​ចេញ​ដោយ​បង្ខំ​ចំនួន​ជាង​៧០០​គ្រួសារ​នៅ​តំបន់​បឹង​កក់​ក៏​ប៉ុន្តែ​ក្នុង​ចំណោម​ប្រជា​ពលរដ្ឋ​ទាំង​នោះ​មានប្រជា​ពលរដ្ឋ​ប្រមាណ​៦៤​គ្រួសារ​មិន​ទាន់​បានប្លង់​កម្ម​សិទ្ឋិ​ស្រប​ច្បាប់​ទេ។ មិន​តែ​ប៉ុណ្ណោះ ពួកគេ​កំពុង​ប្រឈម​មុខ​នឹង​ការ​បណ្តេញ​ចេញ​ដោយ​បង្ខំ​ជា​លើក​ទី​ពីរ​ទៀត។​
ចំណែក​ឯ​នៅ​បូរី​កីឡា​វិញ ក្រោយ​ពី​ការ​បណ្តេញ​ចេញ​កាល​ពី​ថ្ងៃ​ទី​៣ ខែ​មករា ​ឆ្នាំ​២០១២​ មាន​ប្រជា​ពលរដ្ឋ​ប្រមាណ​១១២​គ្រួសារ​បាន​បាត់​បង់​ផ្ទះ​សម្បែង​ដោយសារ​តែ​ក្រុម​ហ៊ុន​ផាន​អ៊ី​ម៉ិច​របស់​អ្នក​ស្រី​ស៊ុយ​ ស៊ី​ផាន​មិន​បាន​សាង​សង់​ពីរ​អគារ​បន្តែម​តាម​កិច្ច​សន្យា។​
អ្នក​ស្រី​ឆាយ គឹមហ៊ន​អាយុ​៣៤​ឆ្នាំ​តំណាង​អ្នក​តវ៉ា​មក​ពី​សហគមន៍​បូរីកីឡា​បាន​និយាយ​ថា ក្រោយ​ពី​ប្រសាសន៍​របស់​លោក​នាយក​រដ្ឋ​មន្ត្រី​ហ៊ុន សែន​មិន​ទាន់​មាន​អាជ្ញាធរ​ណា​ម្នាក់​មក​ធ្វើ​ប្លង់​កាន់​កាប់​កម្ម​សិទ្ឋិ​ដល់​ពួកគេ​ទេ។ អ្នក​ស្រី​បាន​និយាយ​ថា​ពួកគេ​គ្មាន​ជំនឿ​ថា​នឹង​បាន​ប្លង់​កម្ម​សិទ្ឋិ​ទេ បើ​ទោះ​បី​លោក​នាយក​រដ្ឋ​មន្ត្រី​បាន​សន្យា​ក៏​ដោយ។​
«អ្វី​ដែល​ខ្ញុំ​ធ្លាប់ឮ​គឺ​បាន​ឮ​ច្រើន​ដង​ណាស់​មក​ហើយ​តែ​ដំណោះស្រាយ​នៅ​តំបន់​បឹង​កក់​និង​បូ​រី​កីឡា​មិន​ដែល​មាន​ដំណោះ​ស្រាយ​អ្វី​ពិត​ប្រាកដ​នោះ​ទេ។ ហើយ​អ្វី​ដែល​គាត់​និយាយ​ខ្ញុំ​អត់​មាន​ការ​ជឿ​ជាក់​អត់​មាន​ទំនុក​ចិត្ត​ពិត​ប្រាកដ​ទេ»។​
យ៉ាង​តិច​មាន​អ្នក​ភូមិ​បូរី​កីឡា​និង​តំបន់​បឹង​កក់​ប្រមាណ​ជិត​២០​នាក់​ត្រូវ​បាន​អាជ្ញាធរ​ចាប់​ដាក់​ពន្ឋនាគារ ​ហើយ​ចុង​ក្រោយ​នេះ​តំណាង​ពួកគេ​ពីរ​នាក់​គឺ​អ្នក​ស្រី​ទឹម សាក់​មុន្នី​ និង​អ្នក​ស្រី​យោម បុប្ជា​ កំពុង​ជាប់​ឃុំ​នៅ​ឡើយ។
ក្រុម​ប្រជា​ពលរដ្ឋ​អ្នក​រង​គ្រោះ​មក​ពី​សហគមន៏​ទាំង​ពី​រ​បាន​បន្ត​ដាក់​ញាត្តិទៅ​រដ្ឋសភា ​ ស្ថានទូត​អាឡឺម៉ង់ ស្ថាន​ទូត​ដាណឺម៉ាក​ និង ការិយា​ល័យ​ឧត្តម​ស្នង​ការ​សហ​ប្រជា​ជាតិ​ទទួល​បន្ទុក​សិទ្ឋិ​មនុស្ស​ប្រចាំ​កម្ពុជាដើម្បី​ទាមទារ​ឲ្យ​ដោះ​លែង​តំណាង​ពួកគេឲ្យ​មាន​សេរីភាព​វិញ៕​
XS
SM
MD
LG