ភ្ជាប់​ទៅ​គេហទំព័រ​ទាក់ទង

តុលាការ​ខេត្ត​កំពង់ស្ពឺ​នឹង​កោះហៅ​ជន​សង្ស័យ​ម្នាក់​ទៀត​​​

  • ហេង រស្មី

សាកសព​របស់​លោក​ Laurant Vallier​ និង​កូនតូច​បួន​នាក់​ត្រូវ​បាន​ទាញចេញ​ពីក្នុង​រថយន្ត​ដែល​លិច​ក្នុងស្រះ​នៅ​ខាង​ក្រោយ​ផ្ទះ​។​
ភ្នំពេញ​៖ ចៅក្រម​ស៊ើបសួរ​នៃ​តុលាការ​ខេត្ត​កំពង់ស្ពឺ​នៅ​ថ្ងៃច័ន្ទ​នេះ​បាន​អះ​អាង​ថា ​លោក​គ្រោង​នឹង​កោះ​ហៅ​ជន​សង្ស័យ​ម្នាក់​ទៀត​មក​សាកសួរ​ពី​បទ​សង្ស័យ​ថា​ ជាប់ពាក់​ព័ន្ធ​នឹង​ការ​សម្លាប់​ជន​ជាតិ​បារាំង​ម្នាក់​ ព្រម​ទាំង​កូន​ជនរង​គ្រោះ​ចំនួន​៤​នាក់​ផ្សេង​ទៀត​កាល​ពី​ឆ្នាំ​២០១០។​

គម្រោង​កោះហៅ​ជន​សង្ស័យ​ម្នាក់​ចុង​ក្រោយ​ពាក់ព័ន្ធ​នឹង​ករណី​ឃាដកម្ម​នេះ​បាន​កើត​មាន​ឡើង​បន្ទាប់​ពី​របាយ​ការណ៍​ស៊ើប​អង្កេត​រួម​គ្នា​រវាង​ចៅក្រម​កម្ពុជា​និង​ចៅក្រម​មក​ពី​ប្រទេស​បារាំង​បាន​ធ្វើការ​សន្និដ្ឋាន​ថា ​ក្រុម​គ្រួសារ​ជន​ជាតិ​បារាំង​ដែល​ស្លាប់​នៅ​ក្នុង​ខេត្ត​កំពង់​ស្ពឺ​ជា​ករណី​ឃាដកម្ម​ មិន​មែន​ជា​ការធ្វើ​អត្តឃាត​ទេ។​

លោក​ឆឹម ឫទ្ធី​ ចៅក្រម​ស៊ើប​អង្កេត​នៃ​តុលាការ​ខេត្ត​កំពង់​ស្ពឺ​ដែល​បាន​ចូល​រួម​ស៊ើប​អង្កេត​ជាមួយ​ចៅ​ក្រម​មក​ពី​ប្រទេស​បារាំង ​បាន​និយាយ​ថា​ ក្នុង​ពេល​ឆាប់ៗ​ដ៏ខ្លី​ខាងមុខនេះ​លោក​នឹង​ចេញ​ដិការ​កោះហៅ​ជន​សង្ស័យ​ម្នាក់​ទៀត​ដែល​ជា​ជន​សង្ស័យ​ចុង​ក្រោយ​មក​ធ្វើ​ការ​សាក​សួរ​លើ​ករណី​ឃាដកម្ម​ទៅ​លើ​ជន​ជាតិ​បារាំង​និង​ក្រុម​គ្រួសារ។ ​ក៏​ប៉ុន្តែ​លោក​ចៅក្រម​មិន​បាន​បញ្ជាក់អត្ត​សញ្ញាណ​ជន​សង្ស័យ​ថា​ ជា​អ្នកណា​ទេ​ ដោយសារ​តែ​លោក​ចាត់​ទុក​ថា​ នេះ​ជា​សមត្ថកិច្ច​ស៊ើប​អង្កេត​របស់​តុលាការ។​

«តាម​តុលាការ​គឺ​យើង​អត់​បញ្ចប់​ទេ​គឺយើង​នៅបន្ត​ស៊ើប​អង្កេត​ត​ទៅ​ទៀត​ដើម្បី​ស្វែង​រក​ឧក្រិដ្ឋជន​ពិត​ប្រាកដ​និង​រក​យុត្តិធម៌​ឲ្យ​ជន​រងគ្រោះ​ឡូរង់​ វីរីយ៉េ​ និង​កូនៗ​ទាំង​បួន​នាក់»។​

ស្ថាន​ទូត​បារាំង​ប្រចាំ​ប្រទេស​កម្ពុជា​ កាលពី​ថ្ងៃអាទិត្យ​ម្សិល​ម៉ិញ​នេះ​ បាន​ចេញ​សេចក្តី​ប្រកាស​ព័ត៌មានរបស់ខ្លួន​មួយ​ដោយ​បាន​ចាត់​ទុក​ថា​ ករណី​ស្លាប់​ជន​ជាតិបារាំង​និង​កូនៗ​ទាំង​បួន​នាក់​គឺ​ជា​ករណី​ឃាដកម្ម​ មិន​មែនជា​អត្ត​ឃាដ​ទេ។​

នៅ​ក្នុង​សេចក្តី​ប្រកាស​ព័ត៌មាន​របស់​លោក​ស្រី​ក្លូឌីន អង់ហ៊្វូ​ ចៅក្រម​ស៊ើប​សួរ​មក​ពី​ប្រទេស​បារាំង​ទទួល​បន្ទុក​ស្រាវជ្រាវ​ករណី​នេះ​ បាន​និយាយ​ថា​ ដោយ​ផ្អែក​លើការ​ផ្លាស់​ប្តូរ​វត្ថុតាង​ និង​នីតិវិធី​ ការ​ស្រាជ្រាវ​ដ៏​ស្រួច​ស្រាល់​របស់​នគរ​បាល​បច្ចេកទេស​ និង​ការ​សាកសួរ​ជា​ច្រើន​ធ្វើ​ឲ្យ​ការ​ស្រាវជ្រាវ​មាន​ការ​វិវត្តិន៍ខ្លាំង​ ដែល​លទ្ធផល​បង្ហាញ​ថា​ ករណី​នេះ​មិនមែន​ជា​ការ​ធ្វើ​អត្តឃាត​ទេ»។​

ក្រុម​បច្ចេក​ទេស​បារាំង​មកពី​ក្រុង​ប៉ារីស ​ដែលមាន​កងរាជ​អាវុធហត្ថ ​នគរបាល​ ចៅក្រម​ បាន​មក​ដល់កម្ពុជា​កាលពី​ដើម​ខែមិនា​ និង​បាន​ចុះមក​ត្រួត​ពិនិត្យ​ផ្ទាល់​ក្នុង​លំនៅដ្ឋាន​របស់​លោក​ Laurant ​Vallier​ ព្រម​ទាំង​ធ្វើ​ការ​ស្រាវជ្រាវ​ ​រយៈ​ពេល​២​សប្តាហ៍។​

លោក​ឆឹម ឫទ្ឋី​ ចៅក្រម​ស៊ើប​អង្កេត​ខេត្ត​កំពង់ស្ពឺ​ បាន​និយាយ​ប្រាប់​វីអូអេ​តាម​ទូរស័ព្ទ​ថា​ ​ការ​ស្រាវ​ជ្រាវ​បាន​រក​ឃើញ​មាន​ករណី​សង្ស័យ​ជា​ច្រើន​ដែល​រួម​គ្មាន​រលាដ៍​ក្បាល​របស់​ជន​រងគ្រោះ​មិន​អាច​អណ្តែត​ចូល​ក្នុង​វ៉ាលី​ក្នុង​ខណៈ​ពេល​ដែល​ក្នុង​ទឹក​ស្រះ​គ្មាន​ចរន្ត​ទឹក​នោះ​ទេ។​

លោក​បាន​និយាយ​ថា​ ជនរងគ្រោះ​អង្គុយ​កៅអី​ខាង​មុខ​ផ្នែកខាង​ស្តាំ​នៃ​រថយន្ត​ដែល​មាន​ចង្កូត​ឆ្វេង​ក្នុង​ ខណៈ​ពេល​ដែល​គ្រោង​ឆ្អឹង​ត្រូវ​បាន​រក​ឃើញ​នៅ​កៅអីមុខ​ផ្នែក​ខាង​ធ្វេង​ ហើយ​ស្បែក​ជើង​តូច​ជាង​ជន​រងគ្រោះ។​

លោក​បាន​បញ្ជាក់​ថា​ ម្យ៉ាង​វិញទៀត​ទ្វា​រថយន្ត​បើក​ចំហរ​មិន​បាន​បិទ​ជិត​ទេ​ចំណែក​ឯ​រថយន្ត​មិន​បាន​បញ្ឆេះ​ទេ។​ ជន​រងគ្រោះ​ទំនង​ជា​មាន​ឃាដករ​ពី​៣​ទៅ​៥​នាក់​ ដែល​មាន​ជំនាញ​កម្រិត​ខ្ពស់​សម្លាប់​ជន​រងគ្រោះ​ជា​មុនរួច​យក​សាកសព​ដាក់​ក្នុង​រថយន្ត​រួច​ហើយ​ទើប​រុញ​រថយន្ត​ទម្លាក់​ក្នុង​ស្រះ​ទឹក។​

លោក​ទិត្យ ឈួន​ ឪពុកក្មេក​ជន​រងគ្រោះ​ បាន​ស្វាគមន៍​ចំពោះ​លទ្ធផល​នៃ​ការ​ស៊ើប​អង្កេត​នេះ។ ​លោក​បាន​មាន​ជំនឿ​ថា​ ជនជាតិ​បារាំង​និង​ចៅៗ​របស់​លោក​ទាំង​បួន​នាក់​ត្រូវ​បាន​គេ​សម្លាប់​ដោយ​សារ​គំនុំ។

«ខ្ញុំក៏​សន្និដ្ឋាន​តាំង​ពី​ដំបូង​មក​ថា​ កូន​ខ្ញុំ​ប្រាកដ​ជា​មាន​គេ​សម្លាប់ឬ​ក៏​ជា​ឃាដករ​សម្លាប់ហើយ បាន​មក​ដល់ពេល​នេះ​ខ្ញុំ​ក៏សុខចិត្ត​ទទួល​យក​តាំង​ពី​យូរ​មក​គឺ​ខ្ញុំ​ប្រកាន់​ជំហរ​ថា ​ខ្ញុំមិន​អាច​ទទួល​យក​ថា ​កូន​ខ្ញុំធ្វើ​ឃាដ​ដោយ​ខ្លួន​ឯង​ទេ»។​

កាលពី​ដើម​ខែ​មករា​ឆ្នាំ​២០១២​សាកសព​របស់​លោក​ Laurant Vallier​ និង​កូនតូច​បួន​នាក់​ត្រូវ​បាន​ទាញចេញ​ពីក្នុង​រថយន្ត​ដែល​លិច​ក្នុងស្រះ​នៅ​ខាង​ក្រោយ​ផ្ទះ​របស់​លោក​គឺ​រយៈ​ពេល​បួន​ខែ​ បន្ទាប់​ពី​លោក​ត្រូវ​បាន​អះអាង​ថា​បាន​បាត់​ខ្លួន។​

ការ​ស៊ើប​អង្កេត​បឋម​របស់​អាជ្ញាធរ​រដ្ឋាភិបាល​កម្ពុជា​បង្ហាញ​ថា​ លោក​ Vallier​ បាន​ស្លាប់​ដោយ​សារ​ការធ្វើ​អត្តឃាត ប៉ុន្តែ​ប្រទេស​បារាំង​សុំ​ឲ្យមាន​ការ​ស៊ើប​អង្កេត​បន្ថែម។​
ភរិយា​របស់​លោក ​Vallier​ បានស្លាប់​នៅក្នុង​ខែ​តុលា​ ឆ្នាំ​២០១០​ ក្នុង​ខណៈ​ពេលដែលសម្រាល​កូនចុង​ក្រោយ៕
XS
SM
MD
LG