គណៈកម្មការដែលទើបបង្កើតថ្មីរបស់ក្រសួងយុត្តិធម៌បានចាប់ផ្តើមបំពេញការងារដំបូងរបស់ខ្លួននៅថ្ងៃអង្គារទី១២ខែឧសភានេះ ជាផ្នែកមួយនៃយុទ្ធនាការរបស់រដ្ឋាភិបាលក្នុងការព្យាយាមដោះស្រាយបញ្ហាកកស្ទះសំណុំរឿងក្តីក្នុងសាលាជំនុំជម្រះនៅតាមរាជធានីនិងបណ្តាខេត្តនានាក្នុងប្រទេសកម្ពុជា។
ការចាប់ផ្តើមកិច្ចប្រជុំនៅថ្ងៃនេះដែលដឹកនាំដោយលោកគឹម សន្តិភាព រដ្ឋលេខាធិការម្នាក់នៃក្រសួងយុត្តិធម៌ និងជាប្រធានក្រុមទី១នៃគណៈកម្មការថ្មីនេះ ធ្វើឡើងក្រោយពីក្រសួងយុត្តិធម៌ កាលពីថ្ងៃច័ន្ទ បានសម្រេចបង្កើតគណៈកម្មការថ្មីនេះ។
គណៈកម្មការដឹកនាំយុទ្ធនាការដោះស្រាយការកកស្ទះសំណុំរឿងនៅតាមសាលាដំបូងរាជធានី-ខេត្ត នេះ មានលោករដ្ឋមន្ត្រីក្រសួងយុត្តិធម៌ កើត រិទ្ធ ជាប្រធាន និងអនុប្រធាន២រូប សមាជិក៥រូបព្រមទាំងក្រុមការងារចំនួន៤ក្រុម។
ការបង្កើតគណៈកម្មការថ្មីនេះកើតឡើង បន្ទាប់ពីមានរបាយការណ៍ជាច្រើនអំពីបញ្ហាកកស្ទះសំណុំរឿងក្តីនៅតាមតុលាការ និងភាពចង្អៀតណែនណាន់តាន់តាប់នៅក្នុងពន្ធនាគារនៅទូទាំងប្រទេស។
រដ្ឋមន្ត្រីក្រសួងយុត្តិធម៌បានបញ្ជាក់ក្នុងសេចក្តីសម្រេចរបស់ខ្លួនថាគណៈកម្មការថ្មីនេះមានគោលដៅបម្រើសេវាយុត្តិធម៌ឲ្យបានល្អប្រសើរនិងរួមចំណែកកាត់បន្ថយភាពចង្អៀតណែនក្នុងពន្ធនាគារ៕
