ភ្ជាប់​ទៅ​គេហទំព័រ​ទាក់ទង

មេធាវី​បរទេស​របស់​នួន ជា​មួយ​ចំនួន​លាឈប់​ពី​ការងារ

  • គង់ សុឋានរិទ្ធ

អតីត​បងធំ​ទី២​នួន ជា
ភ្នំពេញ៖ សហ​មេធាវី​ការពារ​ក្តី​ឲ្យ​អតីត​បងធំ​ទី២​នួន ជា ម្នាក់​និង​មេធាវី​ប្រឹក្សា​ពីរ​នាក់​ទៀត​បាន​លាឈប់​ពី​ការងារ​ដោយ​អះអាង​ថា​សាលាក្តី​ខ្មែរក្រហម​មិនអាច​ផ្តល់​យុត្តិធម៌​ដល់​កូនក្តី​របស់ខ្លួន​នោះទេ។
លោក​សហ​មេធាវី ម៉ា​យ​ឃើ​ល ផេស​ម៉េ​ន (Michiel Pestman)​និង​មេធាវី​ប្រឹក្សា​ច្បាប់​លោក​អេនឌ្រូ អៀន​នូ​ហ្ស៊ី (Adrew Iannuzi)និង​លោក ចាស​ភើ ផូ​វ៍(Jasper Pauw)នឹង​ត្រូវ​ឈប់​ពី​ការការពារ​ក្តី​ឲ្យ​ជនជាប់ចោទ​នួន ជា ​ជា​ផ្លូវការ​នៅ​ដំណាច់​ខែធ្នូ​នេះ។ ក៏ប៉ុន្តែ​លោក​ម៉ា​យ​ឃើ​ល ផេស​ម៉េ​ន បាន​ចាក​ចេញពី​ប្រទេស​កម្ពុជា​នៅ​ល្ងាច​ថ្ងៃ​ពុធ​នេះ​នៅពេល​ដែល​ការកាត់ទោស​កូនក្តី​របស់ខ្លួន​កំពុង​ដំណើរការ​នៅឡើយ។

លោក​អេ​ន​ឌ្រូ អៀន​នូ​ហ្ស៊ី មាន​ប្រសាសន៍​ថា​ការចាកចេញ​របស់​លោក​រួមជាមួយ​សហសេវិក​ដោយសារ​គ្មាន​ជំនឿ​លើ​សាលាក្តី​ខ្មែរក្រហម។

«យើង​គ្មានអ្វី​ធ្វើ​នៅក្នុង​តុលាការ​ដើម្បី​ជួយ​កូនក្តី​របស់​យើង​ទៀត​ទេ។ ដូច្នេះ​យើង​សម្រេចចិត្ត​ចាកចេញ។ យើង​មិន​ជឿ​អង្គជំនុំ​ជម្រះ​សាលាដំបូង ​យើង​មិន​ជឿ​លើ​ដំណើរការ​ក្តី​ដែល​នឹង​ក្លាយជា​ដំណើរការ​ត្រឹមត្រូវ​តាមច្បាប់​នោះ​ទេ»។

លោក​អៀន​នូ​ហ្ស៊ី ​ដែល​នឹង​ចូលរួម​សវនាការ​នៅ​ថ្ងៃ​ចុងក្រោយ​ថ្ងៃ​សុក្រ​សប្តាហ៍​នេះ​សង្កត់​លើ​ការកាត់ក្តី​មួយ​មិន​តាម«និយាម​អន្តរជាតិ​និង​ការកាត់ក្តី​ដោយ​មិន​យុត្តិធម៌»។

ក្រុម​មេធាវី​អន្តរជាតិ​របស់​នួន ជា ​អតីត​ប្រធាន​សភា​ខ្មែរក្រហម​បានធ្វើ​ការតវ៉ា​ជា​ច្រើន​ដង​ប្រឆាំង​ទៅនឹង​អ្វីដែល​ក្រុម​ខ្លួន​ចោទប្រកាន់​ពី​ការជ្រៀតជ្រែក​ផ្នែក​នយោបាយ​ពី​សំណាក់​រដ្ឋាភិបាល​ខ្មែរ​លើ​សាលាក្តី​ខ្មែរក្រហម។ ប៉ុន្តែ​មិនបាន​សម្រេច​នោះទេ។

កាលពី​ថ្ងៃទី១៣​ខែធ្នូ​នេះ​ប្រធាន​អង្គជំនុំ​ជម្រះ​សាលាដំបូង​លោក​ចៅក្រម​និល ណុន បាន​បណ្តេញ​លោក​អេនឌ្រូ អៀន​នូ​ហ្ស៊ី ​ចេញពី​បន្ទប់​សវនាការ​បន្ទាប់​ពី​សហ​មេធាវី​អន្តរជាតិ​របស់​នួន ជា​រូបនេះ​បាន​ចោទ​សំណួរ​ដេញដោល​យ៉ាងខ្លាំង​ពី​នយោបាយ​កាប់​ព្រៃឈើ​ដែល​គេ​ស្គាល់​ថា​ យុទ្ធនាការ​«ក៥»​ដែល​នាំ​ឲ្យ​មាន​មនុស្ស​ស្លាប់​យ៉ាងច្រើន​ក្នុង​អំឡុង​ទសវត្សរ៍​១៩៨០​ដោយ​ភ្ជាប់​ការទាក់ទង​ជាមួយ​មន្ដ្រីជាន់ខ្ពស់​រដ្ឋា​ភិ​បាល។

សូមបញ្ជាក់​ថា​មាន​សហ​ចៅក្រម​ស៊ើបអង្កេត​បរទេស​ចំនួន​ពីររូប​ហើយ​បាន​លាឈប់​ពី​ការងារ​ក្នុង​បរិបទ​ដ៏​ចម្រូងចម្រាស់​ក្នុង​សំណុំរឿង​បន្ថែម​០០៣​និង០០៤​ដែល​មតិ​នានា​ចោទថា​ដោយ​សារ​តែ​មាន​សម្ពាធ​ពី​រដ្ឋាភិបាល​កម្ពុជា។

លោក​នេត្រ ភក្ត្រា ​អ្នកនាំពាក្យ​សាលាក្តី​ខ្មែរក្រហម​មានប្រសាសន៍​ថា​ការលាលែង​របស់​ក្រុម​មេធាវី​បរទេស​របស់​នួន ជា​គឺជា​សិទ្ធិ​ស្របច្បាប់​ប៉ុន្តែ​ជនជាប់ចោទ​នៅមាន​មេធាវី​ការពារ​ក្តី​បន្តទៀត​នៅឡើយ។

«ទោះបីជា​មានការ​លាលែង​របស់​មេធាវី​ទាំងបី​រូបនេះ​ក៏ប៉ុន្តែ​លោក​នួន ជា​នៅមាន​មេធាវី​អន្តរជាតិ​ដែល​តំណាង​ផ្លូវច្បាប់​របស់គាត់​គឺ​លោក​វិចទ័រ កូ​ប៉េ ដែល​គាត់​ដែល​បាន​ការពារ​ក្តី​លោក​នួន ជា​ចាប់តាំងពី​ឆ្នាំ២០០៧មក​ជាមួយនឹង​សហ​មេធាវី​ជាតិ​របស់គាត់​គឺ​លោក​សុន អា​រុណ»។

លោក​សហ​មេធាវី​កម្ពុជា​ សុន អរុណ ​មាន​ប្រសាសន៍​ថា​លោក​ម៉ា​យ​ឃើ​ល ផេស​ម៉េ​ន ត្រូវ​ផ្លាស់ប្តូរ​វេន​ការពារ​ក្តី​ឲ្យ​ជនជាប់ចោទ​នួន ជា​ មួយ​ឆ្នាំ​ម្នាក់​ជាមួយ​ដៃគូ​បរទេស​របស់លោក​បច្ចុប្បន្ន។ ដូច្នេះ​គាត់​ត្រូវ​ចាកចេញ​ជា​រឿង​ធម្មតា។ ដោយឡែក​មេធាវី​ប្រឹក្សា​ពីរ​នាក់​ទៀត​មិន​ជាប់​កុងត្រា​ជា​មេធាវី​នោះ​ទេ។
លោក​សុន អារុណ​បញ្ជាក់​បន្ថែម​ថា៖

«អត់​មាន​អ្វី​គួរ​ឲ្យ​ព្រួយបារម្ភ​ទេ»។
ថ្វីបើ​ដូច្នេះ​ក្តី​លោក​អេ​ន​ឌ្រូ អៀន​នូ​ហ្ស៊ី មាន​ប្រសាសន៍​ថា​កុងត្រា​របស់លោក​អាច​បន្តទៀត​បាន​ប៉ុន្តែ​លោក​សុខចិត្ត​ជ្រើសរើស​យក​ការលាឈប់៕
XS
SM
MD
LG