ភ្នំពេញ៖ ស្ថានភាពជំងឺរបស់អៀង សារី នៅតែធ្ងន់ធ្ងរនៅឡើយបន្ទាប់ពីស្ថិតក្នុងស្ថានភាពសង្គ្រោះបន្ទាន់អស់រយៈពេលជិតមួយខែមកនេះ។ នេះបើតាមការបញ្ជាក់របស់មន្ដ្រីសាលាក្ដីខ្មែរក្រហម និងសហមេធាវីរបស់ជនជាប់ចោទនៅថ្ងៃព្រហស្បតិ៍នេះ។
អតីតឧបនាយករដ្ឋមន្ដ្រី និងជារដ្ឋមន្ដ្រីការបរទេសខ្មែរក្រហម អៀង សារី បានចូលមន្ទីរពេទ្យមិត្តភាពខ្មែរសូវៀតចាប់តាំងពីថ្ងៃទី៧ ខែកញ្ញាមកម្លេះ ដោយសារការហេវហត់និងថមថយកម្លាំងកាន់តែខ្លាំងហើយគាត់ត្រូវដាក់ឲ្យស្ថិតនៅក្នុងបន្ទប់សង្គ្រោះបន្ទាន់។
លោក អាង ឧត្តម សហមេធាវីកម្ពុជារបស់អៀង សារី មានប្រសាសន៍ថា ជំងឺរបស់ជនជាប់ចោទមិនបានប្រសើរនោះទេ។
«ដំណាក់កាលគាត់ក្រោកខ្លួនឯងលែងរួចទៅហើយហ្នឹង។ ហើយបើគាត់ចង់ក្រោកទាល់តែមានអ្នកគ្រា។ គេបញ្ចុកបាយ គេគ្រាឲ្យក្រោក។ បត់ជើងអីគឺនៅលើគ្រែ អញ្ចឹងមិនមែនស្ថានភាពប្រសើរទេ»។
អៀង សារី អាយុពិតប្រាកដ៨៨ ឆ្នាំ ក៏ប៉ុន្តែអាយុតាមឯកសារផ្លូវការ គាត់នឹងឈានចូលអាយុ៨៧ ឆ្នាំនៅថ្ងៃទី២៤ ខែតុលានេះ។ គាត់ត្រូវចាប់ខ្លួនកាលពីខែវិច្ឆិកា ឆ្នាំ២០០៧ ជាមួយប្រពន្ធរបស់គាត់អៀង ធីរិទ្ធ ដោយត្រូវបានចោទប្រកាន់ថាទាក់ទងនឹងការទទួលខុសត្រូវរបស់គាត់ក្នុងការស្លាប់និងការសម្លាប់ប្រជាពលរដ្ឋកម្ពុជាយ៉ាងតិច១,៧លាននាក់ចន្លោះពីឆ្នាំ១៩៧៥ ដល់ឆ្នាំ១៧៧៩។
លោកអាង ឧត្តម ដែលបានទៅមើលកូនក្តីរបស់ខ្លួនជាប្រចាំបញ្ជាក់បន្ថែមថា អៀង សារី អាចនិយាយបានក៏ប៉ុន្តែស្តាប់មិនសូវឮ។
កាលពីថ្ងៃទី២១ ខែកញ្ញាអង្គជំនុំជម្រះសាលាដំបូងរបស់សាលាក្ដីខ្មែរក្រហមបានបើកសវនាការពិសេសមួយដើម្បីស្តាប់សក្ខីកម្មរបស់វេជ្ជបណ្ឌិតចំនួនពីររូបអំពីស្ថានភាពជំងឺរបស់ជនជាប់ចោទ។
លោកនេត្រ ភក្ត្រា អ្នកនាំពាក្យសាលាក្ដីខ្មែរក្រហមមានប្រសាសន៍ថា នៅមិនទាន់មានការសម្រេចនៅឡើយក្រោយពីសវនាការនោះ។ មន្ដ្រីអ្នកនាំពាក្យដដែលឲ្យដឹងថា ក្រុមគ្រូពេទ្យត្រូវការតាមដានជំងឺរបស់អៀង សារី បន្ថែមទៀតដោយមិនមានរបាយការណ៍ពីការអនុគ្រោះឲ្យគាត់ចេញពីមន្ទីរពេទ្យនៅពេលណានោះទេ។
«ស្ថានភាពជំងឺរបស់គាត់គឺនៅស្ថេរធម្មតា។ ហើយគាត់កំពុងនៅក្នុងបន្ទប់សង្គ្រោះបន្ទាន់នៅមន្ទីរពេទ្យខ្មែរសូវៀតដើម្បីអនុញ្ញាតឲ្យក្រុមគ្រូពេទ្យបន្តតាមដាននិងត្រួតពិនិត្យមើលស្ថានភាពជំងឺរបស់គាត់តទៅទៀត»។
នៅក្នុងសវនាការស្តីពីស្ថានភាពសុខភាពរបស់អៀង សារីគ្រូពេទ្យកម្ពុជាបញ្ជាក់ថា ជនជាប់ចោទរូបនេះមានបញ្ហាឆ្អឹងកងកដែលត្អៀតចរន្តឈាមទៅចិញ្ចឹមខួរក្បាលនិងបណ្តាលឲ្យជនជាប់ចោទមានអាការៈវិលមុខនិងស្ពឹកជាប្រចាំ។ គ្រូពេទ្យបញ្ជាក់ថា គាត់នឹងប្រឈមគ្រោះថ្នាក់ខ្លាំងប្រសិនបើគាត់ត្រូវយកទៅវះកាត់ដើម្បីបន្ធូរលំហូរឈាមទៅកាន់ខួរក្បាលនោះ។
ដោយសារតែបញ្ហាសុខភាពនេះអៀង សារី បានស្នើសុំលះបង់សិទ្ធិស្តាប់សក្ខីកម្មរបស់សាក្សីចំនួនសរុប២៦នាក់។ ដូច្នេះធ្វើឲ្យការកាត់ក្តីណុំរឿង០០២ ដែលទើបចាប់ផ្តើមឡើងវិញរយៈពេលពីរថ្ងៃមកនេះមានជនជាប់ចោទតែពីរនាក់ប៉ុណ្ណោះចូលរួមក្នុងសវនាការគឺនួន ជា អតីតប្រធានសភា និងខៀវ សំផន អតីតប្រមុខរដ្ឋខ្មែរក្រហម។ ដោយឡែកអៀង ធីរិទ្ធ ប្រពន្ធរបស់អៀង សារី ត្រូវបានដោះលែងចេញពីការឃុំឃាំងដោយសារជំងឺវង្វេងវង្វាន់ធ្ងន់ធ្ងរ៕
