មន្រ្តីជាន់ខ្ពស់កម្ពុជាបានច្រានចោលការអះអាងរបស់ក្រុមអ្នករាយការណ៍ពិសេសអ.ស.ប. ដោយចាត់ទុកការលើកឡើងរបស់ពួកគេមានភាពលម្អៀង។ នេះបើតាមសេចក្តីថ្លែងការណ៍មួយរបស់លោក អ៊ិន តារា ឯកអគ្គរាជទូតនិងតំណាងអចិន្ត្រៃយ៍កម្ពុជាប្រចាំការិយាល័យអ.ស.ប.និងអង្គការអន្តរជាតិនៅទីក្រុងហ្សឺណែវ ដែលវីអូអេទទួលបាននៅថ្ងៃពុធនេះ។
សេចក្តីថ្លែងការណ៍បញ្ជាក់ថា រដ្ឋាភិបាលកម្ពុជាគាំពារសារព័ត៌មានដែលប្រកបដោយវិជ្ជាជីវៈត្រឹមត្រូវ មិនរំលោភសិទ្ធិរបស់អ្នកដទៃ និងមិនបំភ្លៃការពិត។
តំណាងអចិន្ត្រៃយ៍កម្ពុជាបានអះអាងថា អ្នករាយការណ៍ពិសេសអង្គការសហប្រជាជាតិ«ធ្វើសេចក្ដីអត្ថាធិប្បាយដោយលម្អៀង និងមានការរើសអើង» ទៅលើការបិទសារព័ត៌មានវីអូឌី។
តំណាងអចិន្ត្រៃយ៍កម្ពុជាបញ្ជាក់ថា អ្វីដែលគួរឱ្យព្រួយបារម្ភនោះ«គឺការផ្សាយព័ត៌មានមិនពិត និងការបង្កាច់បង្ខូចដោយចេតនា ដែលគ្រប់ប្រទេសទាំងអស់តែងតែថ្កោលទោស»។
តំណាងអចិន្ត្រៃយ៍បន្ថែមថា៖ «កម្ពុជាគាំពារសារព័ត៌មានដែលប្រកបដោយវិជ្ជាជីវៈត្រឹមត្រូវ មិនរំលោភសិទ្ធិរបស់អ្នកដទៃ និងមិនបំភ្លៃការពិត ហើយកម្ពុជាប្ដេជ្ញារៀបចំការបោះឆ្នោតជាតិខាងមុខនេះឱ្យប្រព្រឹត្តទៅដោយសេរី យុត្តិធម៌ និងត្រឹមត្រូវ ដែលឆ្លុះបញ្ចាំងយ៉ាងពេញលេញនូវឆន្ទៈរបស់ប្រជាពលរដ្ឋ»។
កាលពីថ្ងៃអង្គារ អ្នកជំនាញអង្គការសហប្រជាជាតិ (អ.ស.ប) ៣រូប បានជំរុញឱ្យរដ្ឋាភិបាលកម្ពុជាអនុញ្ញាតឱ្យស្ថាប័នសារព័ត៌មានវីអូឌី (VOD ឬ Voice of Democracy) ដំណើរការឡើងវិញ ដោយលើកឡើងថា ពិភពលោកកំពុងតែមើលកម្ពុជានាពេលនេះ ខណៈនឹងមានការបោះឆ្នោតនាពេលខាងមុខ។
អ្នកជំនាញទាំងនោះ មានដូចជា លោក Vitit Muntarbhorn អ្នករាយការណ៍ពិសេសទទួលបន្ទុកសិទ្ធិមនុស្សក្នុងប្រទេសកម្ពុជា អ្នកស្រី Mary Lawlor អ្នករាយការណ៍ពិសេសទទួលបន្ទុកផ្នែកការពារអ្នកតស៊ូមតិ និងអ្នកស្រី Irene Khan អ្នករាយការណ៍ពិសេសទទួលបន្ទុកការលើកកម្ពស់ និងការពារសិទ្ធិសេរីភាពនៃការបញ្ចេញមតិ។
ពួកគេបញ្ជាក់ក្នុងសេចក្តីថ្លែងការណ៍របស់ពួកគេថា៖ «យើងមានការព្រួយបារម្ភអំពីការលុបចោលអាជ្ញាបណ្ណសារព័ត៌មានវីអូឌី ដោយមិនមាននីតិវិធីត្រឹមត្រូវ ដែលវាប៉ះពាល់ភ្លាមៗនៅមុនការបោះឆ្នោតនាខែកក្កដា ឆ្នាំនេះ ដែលមានសារៈសំខាន់»។
ពួកគេអះអាងថា វាស្ទើរតែលែងមានសារព័ត៌មានឯករាជ្យនៅក្នុងប្រទេសកម្ពុជាទៀតហើយ ក្រោយបិទសារព័ត៌មានវីអូឌី ដែលហ៊ានរាយការណ៍បញ្ហាសិទ្ធិមនុស្ស បទល្មើសបរិស្ថាន និងអំពើពុករលួយ។
អ្នករាយការណ៍ពិសេសបញ្ជាក់ថា៖ «ពិភពលោកកំពុងតែមើលមកកម្ពុជា នៅមុនការបោះឆ្នោតនាខែកក្កដាខាងមុខនេះ»។
នាយកគ្រប់គ្រងកិច្ចការទូទៅនៃអង្គការសិទ្ធិមនុស្សលីកាដូ លោក អំ សំអាត ថ្លែងថា វាមិនមានអ្វីចម្លែកទេ ដែលរបាយការណ៍របស់អ្នកជំនាញសិទ្ធិមនុស្សអង្គការសហប្រជាជាតិតែងតែត្រូវបានច្រានចោលដោយរដ្ឋាភិបាលកម្ពុជា។
លោកប្រាប់វីអូអេថា៖ «ប៉ុន្តែទោះជាយ៉ាងណាក៏ដោយ ខ្ញុំជឿជាក់ថាអ្នកជំនាញផ្នែកសិទ្ធិមនុស្ស គឺគេមានសម្អាងរបស់គេ មុននឹងគេធ្វើការលើកឡើងទាំងអស់ហ្នឹង។ អញ្ចឹងខ្ញុំគិតថា អ្វីដែលជាអនុសាសន៍ អ្វីដែលជាការលើកឡើង យើងគួរតែពិចារណាផងដែរ អ្វីដែលយើងអាចកែប្រែបាន កែលម្អបាន យើងធ្វើការកែលម្អ អាហ្នឹងគឺជារឿងមួយល្អ ហើយជាផលចំណេញសម្រាប់កម្ពុជាផងដែរ»។
ការដកអាជ្ញាបណ្ណវីអូឌីត្រូវបានមន្រ្តីជាន់ខ្ពស់ទទួលបន្ទុកផ្នែកសិទ្ធិមនុស្សនៃអង្គការសហប្រជាជាតិ និងអង្គការក្នុងស្រុកមួយចំនួនចាត់ទុកថា មិនបានអនុលោមទៅតាមច្បាប់ស្តីពីរបបសារព័ត៌មានទេ។ អង្គការសង្គមស៊ីវិលលើកយកមាត្រា១០នៃច្បាប់ស្តីពីរបបសារព័ត៌មាននៅកម្ពុជា ដែលចែងថា មនុស្សមានសិទ្ធិទាមទារឱ្យមានការកែតម្រូវ និងការឆ្លើយតបពីអ្នកផ្សាយព័ត៌មាននៅពេលដែលពួកគេយល់ថា សេចក្តីថ្លែងការណ៍មួយមិនត្រឹមត្រូវ ហើយអ្នកផ្សាយព័ត៌មានត្រូវឆ្លើយតបក្នុងរយៈពេល៧ថ្ងៃ។
ទោះជាយ៉ាងណា កាលពីថ្ងៃចន្ទ លោកនាយករដ្ឋមន្ត្រី ហ៊ុន សែន បានអះអាងថា រដ្ឋាភិបាលរបស់លោកមិនអនុញ្ញាតឱ្យសារព័ត៌មានវីអូឌីអាចដំណើរការឡើងវិញឡើយ ក្រោមហេតុផលថា ការផ្សាយកន្លងទៅពាក់ព័ន្ធថា លោក ហ៊ុន ម៉ាណែត ចុះហត្ថលេខាផ្តល់ជំនួយឱ្យរដ្ឋាភិបាលប្រទេសតួកគី គឺជាការធ្វើឱ្យបែកបាក់ផ្ទៃក្នុងរបស់រដ្ឋាភិបាល។
លោក ណុប វី នាយកប្រតិបត្តិសមាគមសម្ព័ន្ធអ្នកសារព័ត៌មានកម្ពុជា ហៅកាត់ថាខេមបូចា (CamboJA) ថ្លែងថា លោកមានការព្រួយបារម្ភថា បញ្ហាសង្គម និងភាពមិនប្រក្រតីនានាមិនត្រូវបានផ្សព្វផ្សាយដល់អាជ្ញាធរពាក់ព័ន្ធ ក្រោយបាត់បង់សារព័ត៌មានឯករាជ្យក្នុងប្រទេសកម្ពុជា៕
