មួយសប្តាហ៍បន្ទាប់ពីគណៈកម្មការអឺរ៉ុបបានសម្រេចព្យួរផ្នែកខ្លះនៃឋានៈអនុគ្រោះពន្ធ «គ្រប់មុខទំនិញលើកលែងសព្វាវុធ» ឬហៅថា “Everything But Arms” (EBA) សមាគមរោងចក្រកាត់ដេរនៅកម្ពុជា (GMAC) បានស្នើសុំឲ្យសមាជិកសភាអឺរ៉ុប «ផ្តល់អត្ថប្រយោជន៍ EBA ដូចដើមវិញ» ដល់កម្ពុជា។ នេះបើយោងតាមសេចក្តីប្រកាសព័ត៌មានរបស់សមាគម GMAC ដែលវីអូអេទទួលបាននៅថ្ងៃពុធ។
នៅក្នុងសេចក្តីប្រកាសព័ត៌មានចុះថ្ងៃទី ១៧ ខែកុម្ភៈ សមាគមរោងចក្រកាត់ដេរនៅកម្ពុជា ដែលតំណាងឲ្យរោងចក្រសម្លៀកបំពាក់ ស្បែកជើង និងផលិតផលធ្វើដំណើរជាង ៥៨០ រោងចក្រ បានលើកឡើងថា៖ «សមាគមសូមជំរុញសហភាពអឺរ៉ុបផ្តល់អត្ថប្រយោជន៍ EBA ដូចដើមវិញ សម្រាប់វិស័យរបស់យើងដើម្បីបុព្វហេតុនៃការអភិវឌ្ឍប្រកបដោយចីរភាព និងប្រជាជនកម្ពុជារាប់សែននាក់ ដែលបានទទួលអត្ថប្រយោជន៍ពីកម្មវិធី EBA ដើម្បីចាកចេញពីភាពក្រីក្រ លើកកម្ពស់សិទ្ធិរបស់ពួកគេនៅកន្លែងការងារ និងផ្គត់ផ្គង់គ្រួសាររបស់ពួកគេ»។
ការសម្រេចព្យួរបណ្តោះអាសន្នកើតឡើង បន្ទាប់ពីមានការរំលោភសិទ្ធិមនុស្សធ្ងន់ធ្ងរ និងជាប្រព័ន្ធនៅកម្ពុជា។
សមាគមរោងចក្រកាត់ដេរនៅកម្ពុជា បានសង្កត់ធ្ងន់ថា ការដកផ្នែកខ្លះនៃឋានៈអនុគ្រោះពន្ធ EBA នេះ នឹង«ធ្វើឲ្យបាត់បង់ការងារ និងនាំឲ្យមានភាពក្រីក្រ»។ វិស័យកាត់ដេរនៅកម្ពុជា បានផ្តល់ឱកាសការងារដល់ពលរដ្ឋកម្ពុជាជិត ១លាននាក់ ដែលភាគច្រើនជាស្ត្រី។
សមាគមនេះក៏បានបញ្ជាក់គោលជំហរគាំទ្ររបស់ខ្លួនលើសហភាពអឺរ៉ុប ក្នុងការកែលម្អគោលនយោបាយសិទ្ធិមនុស្សនៅកម្ពុជា ក៏ប៉ុន្តែបានសង្កត់ធ្ងន់ថា ការព្យួរផ្នែកខ្លះនៃឋានៈអនុគ្រោះពន្ធ EBA ដល់កម្ពុជា «មិនមែនជាវិធីដែលត្រូវបន្តទៅមុខនោះទេ»។
ការព្យួរនេះនឹងប៉ះពាល់ផលិតផលស្បែកជើង និងសម្លៀកបំពាក់មួយចំនួន។ ហើយទំនិញសម្រាប់ធ្វើដំណើរ និងស្ករត្រូវបានសម្រេចព្យួរទាំងស្រុង ក្នុងទំហំទឹកប្រាក់ប្រមាណ ១១០០លានដុល្លារជារៀងរាល់ឆ្នាំ។ ប្រសិនបើគ្មានការជំទាស់ពីសភាអឺរ៉ុប និងក្រុមប្រឹក្សានៅពេលខាងមុខ ការព្យួរនេះនឹងចូលជាធរមាននៅថ្ងៃទី១២ ខែសីហា ឆ្នាំ២០២០៕
