ដោយសារសម្ពាធនៃការយកពន្ធលើការនាំចូលអង្ករពីប្រទេសកម្ពុជាទៅកាន់សហភាពអឺរ៉ុប បានធ្វើឲ្យកម្ពុជាព្យាយាមស្វែងរកទីផ្សារលក់អង្ករទៅកាន់ប្រទេសចិនវិញ។
កាលពីដើមឆ្នាំ២០១៩នេះ សហភាពអឺរ៉ុបបានសម្រេចយកពន្ធអង្ករកម្ពុជាចំនួន១៧០អឺរ៉ូ ឬស្មើនឹងប្រមាណ១៨៥ដុល្លារអាមេរិកក្នុងមួយតោន ដើម្បីការពារផលប្រយោជន៍ទីផ្សារអង្ករនៅអឺរ៉ុបរបស់ប្រទេសអ៊ីតាលី។
សម្រាប់កម្ពុជា តម្លៃពន្ធនេះថ្លៃ និងបានធ្វើឲ្យការនាំអង្ករពីកម្ពុជាទៅកាន់សហភាពអឺរ៉ុបធ្លាក់ចុះប្រមាណជា៣២ភាគរយក្នុងរយៈពេល៨ខែ នៅដើមឆ្នាំ២០១៩នេះ។
លោក សុង សារ៉ន ប្រធានសហព័ន្ធស្រូវអង្ករកម្ពុជា បានប្រាប់វីអូអេតាមទូរសព្ទនៅដើមសប្តាហ៍នេះថា សហព័ន្ធស្រូវអង្ករកម្ពុជាមានផែនការពង្រីកទីផ្សារនាំអង្ករចេញទៅកាន់ប្រទេសចិនដើម្បីបង្ការវិបត្តិស្រូវអង្ករនៅក្នុងប្រទេស។
លោកបានថ្លែងថា៖ «អ៊ីចឹងយើងបានពង្រីកទីផ្សារចិនបន្ថែម សង្ឃឹមថាទីផ្សារថ្មីហ្នឹងនឹងបង្កើនឲ្យមានការទិញពីកម្ពុជាយើង ចៀសវាងពីបញ្ហាវិបត្តិទីផ្សារ»។
យោងតាមសហព័ន្ធស្រូវអង្ករកម្ពុជា សហភាពអឺរ៉ុបដែលធ្លាប់ជាទីផ្សារស្រូបយកអង្ករកម្ពុជាច្រើនជាងគេលំដាប់ទីមួយ បានធ្លាក់មកជាទីផ្សារលក់អង្ករធំជាងគេលំដាប់ទី២ បន្ទាប់ពីប្រទេសចិនវិញ។
នៅពេលដែលអង្ករកម្ពុជាទៅកាន់អឺរ៉ុបបានធ្លាក់ចុះពី១៧ម៉ឺនតោនមកត្រឹម១២ម៉ឺនតោនក្នុងរយៈពេលប្រាំបីខែនៃឆ្នាំ២០១៩ បើធៀបនឹងរយៈពេលដូចគ្នាកាលពីឆ្នាំមុន។ ការនាំអង្ករពីកម្ពុជាទៅកាន់ប្រទេសចិនបានកើនពី៨ម៉ឺនតោនទៅដល់១៣ម៉ឺនតោនក្នុងរយៈពេលប្រាំបីខែនៅក្នុងឆ្នាំនេះ។ ការនាំអង្ករពីកម្ពុជាទៅកាន់ប្រទេសចិនបានកើនឡើងរហូតដល់៥៤ភាគរយ។
លោក សុង សារ៉ន លើកឡើងថា ការយកពន្ធលើអង្ករកម្ពុជារបស់សហភាពអឺរ៉ុប ជារឿងមិនសមហេតុផល។
លោកបាននិយាយថា៖ «ការពិតយើងមិនចង់ឲ្យអង្ករយើងជាប់ពន្ធដោយមិនសមហេតុសមផលអ៊ីចឹងណា ហ្នឹងហើយអ៊ីចឹងហើយបានខាងសហព័ន្ធព្យាយាមរកទីផ្សារថ្មី ហើយនិងរក្សាទីផ្សារចាស់»។
ទោះយ៉ាងណា សហព័ន្ធស្រូវអង្ករកម្ពុជាគ្រោងនឹងជំរុញការនាំអង្ករចេញទៅកាន់ប្រទេសចិនឲ្យកើនដល់៤០ម៉ឺនតោនសម្រាប់ឆ្នាំ២០២០។
លោក សុង សារ៉ន ប្រធានសហព័ន្ធស្រូវអង្ករកម្ពុជា បានឲ្យដឹងទៀតថាប្រតិភូសហព័ន្ធស្រូវអង្ករកម្ពុជាមានគម្រោងចេញទៅចរចាជាមួយសហភាពអឺរ៉ុបអំពីការទារពន្ធលើអង្ករកម្ពុជា។ ប៉ុន្តែលោកមិនទាន់កំណត់ពេលចេញដំណើរនៅឡើយ។
សហព័ន្ធស្រូវអង្ករកម្ពុជា ធ្លាប់បានលើកឡើងកាលពីចុងខែសីហាថា ដោយសារការកំណត់ពន្ធលើអង្ករកម្ពុជារបស់សហភាពអឺរ៉ុបនេះ ប្រជាកសិករកម្ពុជាជាង៥០០.០០០គ្រួសារទទួលរង«ផលប៉ះពាល់យ៉ាងធ្ងន់ធ្ងរ»។ ហើយបញ្ហាទាំងនេះ«ធ្វើឲ្យពួកគេឈឺចាប់» ស្របពេលដែលសហគមន៍អឺរ៉ុបកំពុងពិចារណាដកនូវប្រព័ន្ធកម្មវិធីអនុគ្រោះពន្ធអ្វីៗទាំងអស់លើកលែងតែអាវុធ(EBA)នោះ។
ក្រសួងពាណិជ្ជកម្មកាលពីខែមិថុនាធ្លាប់ពិចារណាដាក់ពាក្យបណ្តឹងទៅកាន់អង្គការពាណិជ្ជកម្មពិភពលោកលើករណីអឺរ៉ុបដាក់ពន្ធអង្ករមកលើកម្ពុជានេះដែរ។ ប៉ុន្តែវីអូអេទាក់ទង អ្នកនាំពាក្យក្រសួងពាណិជ្ជកម្មលោក ស៊ាង ថៃ មិនបាននោះទេរហូតមកដល់រសៀលថ្ងៃព្រហស្បតិ៍នេះ។
អង្ករកម្ពុជាដែលពេញនិយមខ្លាំងនៅលើទីផ្សារអន្តរជាតិដូចជា ចិននិងអឺរ៉ុប គឺអង្ករសែនក្រអូប ដែលអាចលក់ក្នុងតម្លៃ៧០០ដុល្លារទៅ៧៥០ដុល្លារអាមេរិកក្នុងមួយតោន។
ការនាំចេញអង្ករសរុបរបស់កម្ពុជាទៅកាន់ទីផ្សារអន្តរជាតិកាលពីឆ្នាំ២០១៨គឺប្រមាណ៦០ម៉ឺនតោន ដែលគិតជាទឹកប្រាក់ប្រមាណជា៤៧៥លានដុល្លារអាមេរិក។ គិតមកត្រឹមខែកញ្ញាឆ្នាំ២០១៩នេះ ការនាំចេញអង្កររបស់កម្ពុជាមានតែ៣៤ម៉ឺនតោនប៉ុណ្ណោះ ដែលគិតជាទឹកប្រាក់ប្រមាណជា២៧៥លានដុល្លារអាមេរិក៕
