ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ទូតខ្មែរ​នៅ​ឥណ្ឌូណេស៊ី​ស្នើ​ឱ្យ​ពលរដ្ឋ​មាន​ការប្រុង​ប្រយ័ត្ន​ខ្ពស់​ ក្រោយ​ករណី​បំផ្ទុះ​គ្រាប់​បែក​អត្តឃាត


រូបឯកសារ៖ ប៉ូលិសបង្ក្រាបភេរវកម្មឈរយាមកាមនៅក្នុងអំឡុងពេលចូលឆែកឆេរផ្ទះជនសង្ស័យក្នុងករណីបំផ្ទុះគ្រាប់បែកអត្តឃាត នៅទីក្រុង Surabaya ប្រទេសឥណ្ឌូនេស៊ី កាលពីថ្ងៃទី១៥ ខែឧសភា ឆ្នាំ២០១៨។

បន្ទាប់​ពី​មាន​ការ​បំផ្ទុះ​គ្រាប់​បែក​ផ្ទួនៗ​គ្នា​ជា​ច្រើន​ដង​កាលពី​សប្តាហ៍​មុន នៅ​ដើម​សប្តាហ៍​នេះ ស្ថានទូត​កម្ពុជា​នៅ​ប្រទេស​ឥណ្ឌូណេ​ស៊ី បាន​ស្នើ​ប្រជា​ពលរដ្ឋ​កម្ពុជា​ទាំង​អស់ ដែល​កំពុង​សិក្សា​និង​ស្នាក់​អាស្រ័យ​ក្នុង​ប្រទេស​ឥណ្ឌូណេ​ស៊ី ឲ្យ​មាន​ការ​ប្រុង​ប្រយ័ត្ន​ខ្ពស់​ និង​ជៀសវាង​ការ​ធ្វើ​ដំណើរ​ទៅ​កាន់​តំបន់​ទីប្រជុំជន​មួយ​ចំនួន។

ស្ថាន​ឯកអគ្គ​រាជទូត​កម្ពុជា​ប្រចាំ​ទី​ក្រុង​ហ្សាការតា នៅ​សប្តាហ៍​នេះ ​បាន​អំពាវនាវ​ពលរដ្ឋ​ខ្មែរ​ដែល​កំពុង​សិក្សានិង​ស្នាក់​នៅ​ក្នុង​ប្រទេស​ឥណ្ឌូណេ​ស៊ី​ ឲ្យ​មាន​ការប្រុង​ប្រយ័ត្ន​ខ្ពស់​ ក្រោយ​ករណី​បំផ្ទុះ​គ្រាប់​បែក​អត្តឃាត​ជា​ច្រើន​គ្រាប់​កើត​ឡើង​នា​ពេល​ថ្មីៗ។

ក្នុង​សេចក្តី​ជូន​ដំណឹង​របស់​ស្ថាន​ឯកអគ្គរាជទូត​កម្ពុជា​ប្រចាំ​ទី​ក្រុង​ហ្សាការតា​ចេញ​កាលពី​ថ្ងៃ​ទី១៥​ ខែ​ឧសភា​នេះ​ បញ្ជា​ក់​ថា​ យោង​លើឧប្បត្តិ​ហេតុ​នៃ​ការ​បំផ្ទុះ​គ្រាប់​បែក​អត្តឃាត​ក្នុង​ទី​ក្រុង​ Surabaya​ នៃ​ខេត្ត​ Java​ ខាង​កើត​ និង​ស្ថានភាព​សន្តិសុខ​នា​ពេល​ថ្មីៗ​នេះ​ ស្ថានទូត​ស្នើ​ប្រជា​ពលរដ្ឋ​កម្ពុជា​ទាំង​អស់​ដែល​កំពុង​សិក្សា​និង​ស្នាក់​អាស្រ័យ​ក្នុង​ប្រទេស​ឥណ្ឌូណេស៊ី​ឲ្យ​មាន​ការប្រុង​ប្រយ័ត្ន​ខ្ពស់​ក្នុង​ការ​ធ្វើ​ដំណើរ។​

សេចក្តី​ជូន​ដំណឹង​នោះ​ត្រូវ​បាន​សរសេរ​ក្នុង​ន័យ​ដើម​ថា៖​

«បើពុំ​មាន​ការ​ចាំបាច់​សូម​ជៀសវាង​តំបន់​មួយ​ចំនួន​ដូចជា​ ស្ថានីយ​រថភ្លើង​ តំបន់​ក្បែរ​ស្នាក់​ការប៉ូលីស​ ព្រះ​វិហារ Catholic និង​ទីប្រជុំជន​នានា ដែល​អាច​ជាទី​តាំង​មិន​មាន​សុវត្ថិភាព។​ ក្នុង​ករណី​មាន​អាសន្ន​សូម​ទាក់​ទងមក​ស្ថានទូត​តាម​អាសយដ្ឋាន No.​ ​41 Pajaten Barat, Jakarta Selatan និង​ទូរស័ព្ទ​លេខ +៦២ ២១ ៧៨១ ២៥២៣, ០៨២១ ១២៣ ៦៨៦៣៩, ០៨១២ ៨២៥ ៦៦៦៥៨ និង ០៨១៣ ១៧៥ ៦៥ ៤៨៦»។

VOA​ បាន​ព្យាយម​សុំការ​អធិប្បាយ​ពីស្ថាន​ឯកអគ្គរាជទូត​កម្ពុជា​ប្រចាំ​ទី​ក្រុង​ហ្សាការតា ​ប្រទេស​ឥណ្ឌូណេស៊ី​ តែ​មិន​ទាន់​មាន​ការ​ឆ្លើយតប​ណា​មួយនៅ​ឡើយនោះទេ​ រហូត​មក​ដល់​ល្ងាច​ថ្ងៃ​ព្រហស្បតិ៍​នេះ។​ ចំណែក​មន្ត្រី​នៃ​ក្រសួង​ការ​បរទេស​កម្ពុជា​ រួមទាំង​ ​អ្នក​នាំពាក្យ​លោក​ ជុំ សុន្ទរី​ ក៏មិន​អាច​សុំ​ការអធិប្បាយ​បន្ថែម​បាន​ដែរ។

កាលពី​ថ្ងៃ​អាទិត្យ មាន​ការ​បំផ្ទុះ​គ្រាប់​បែក​អត្តឃាត​នៅ​ព្រះ​វិហារ​សាសនា​គ្រិស្ត​ចំនួន​បី​កន្លែង​ដោយ​បាន​សម្លាប់​មនុស្ស​អស់​យ៉ាង​ហោច​ណាស់​១៣​នាក់​ និង​របួស​៤១​នាក់​ផ្សេង​ទៀត​ក្នុង​ទី​ក្រុង​ Surabaya ​ខេត្ត​ Java​ ខាង​កើត​នៃ​ប្រទេស​ឥណ្ឌូណេ​ស៊ី។​

ក្រុម​រដ្ឋឥស្លាម​អះអាង​ថា​ ​ការ​បំផ្ទុះ​គ្រាប់​បែក​នេះ​គឺជា​ស្នា​ដៃ​របស់​ពួក​គេ។​ប្រធានាធិបតី​ឥណ្ឌូណេ​ស៊ី​បាន​ហៅ​ហេតុ​ការណ៍​នេះ​ថា​ «កំណាចឃោរឃៅ»​ នៅ​ក្នុង​ទី​ក្រុងធំ​បន្ទាប់​ទី​ពីរ​របស់​ឥណ្ឌូណេ​ស៊ី៕

XS
SM
MD
LG