ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

តុលាការ​ខេត្ត​កំពង់​ឆ្នាំង ​​ផ្តន្ទាទោស​​ដាក់​ពន្ធនាគារ​​២០​ខែ​​លើ​​អ្នក​កាសែត ​ពី​បទ«ញុះញង់»


រូបឯកសារ៖ លោក សុខ ឧត្តម ដែល​ជា​អតីត​ម្ចាស់​ស្ថានីយ​វិទ្យុ​រិទ្ធិ​សែន ​ត្រូវ​បាន​ចោទ​ប្រកាន់​ពី​បទ​ញុះញង់ ក្នុង​សំណុំ​រឿង​ជម្លោះ​ដី​ធ្លី ដែល​ប្តឹង​ដោយ​មន្ត្រី​យោធា​ជាន់​ខ្ពស់​ម្នាក់។ (រូបថតពីហ្វេសប៊ុក)

តុលាការ​ខេត្ត​កំពង់​ឆ្នាំង នៅ​ថ្ងៃ​អង្គារ​នេះ​ បាន​សម្រេចផ្តន្ទា​ទោស​ដាក់​ពន្ធនាគារ​២០​ខែលើ​អ្នក​សារព័ត៌មាន​ម្នាក់ ឈ្មោះ សុខ ឧត្តម ដែល​ត្រូវ​បាន​ចោទ​ប្រកាន់​ពី​បទ​ញុះញង់ ក្នុង​សំណុំ​រឿង​ជម្លោះ​ដី​ធ្លី ដែល​ប្តឹង​ដោយ​មន្ត្រី​យោធា​ជាន់​ខ្ពស់​ម្នាក់។

លោក សុខ ឧត្តម ដែល​ជា​អតីត​ម្ចាស់​ស្ថានីយ​វិទ្យុ​រិទ្ធិ​សែន ជា​អ្នក​សារ​ព័ត៌មាន​ទី​៣​ហើយ ​ដែល​ត្រូវ​បាន​ចោទ​ប្រកាន់​ពី​បទ​ញុះញង់​ក្នុង​រយៈ​ពេល​ប៉ុន្មាន​ខែ​ចុង​ក្រោយ​នេះ។

ភរិយា​របស់​លោក សុខ ឧត្តម គឺ​អ្នក​ស្រី នុត សុវន្ធូរ អាយុ​៣៦​ឆ្នាំ ដែល​បាន​ចូល​រួម​សវនាការនា​ព្រឹក​ថ្ងៃ​អង្គារ ដើម្បី​ស្តាប់​សាលក្រម ប្រាប់​VOA​ថា​នេះ​ជា​ការ​សម្រេច​ទាំង«អយុត្តិធម៌ និង​ហួសហេតុ​បំផុត»។

អ្នក​ស្រី​ថា​តុលា​ការ​មិន​គួរ​ចោទ​ប្រកាន់ស្វាមី​របស់​អ្នក​ស្រី​ ពី​បទ​ញុះញង់​តាម​ក្រម​ព្រហ្មទណ្ឌ​ក្នុង​ការ​រាយការណ៍​អំពី​រឿង​ដី​ធ្លី ដែល​នាំ​ឲ្យ​ស្វាមី​របស់​អ្នក​ស្រី​ត្រូវ​ជាប់​ពន្ធនាគារ​ចំនួន​២០​ខែ​បែប​នេះ និង​ត្រូវ​ពិន័យ​ជា​ប្រាក់​ចំនួន​២០​លាន​រៀល ឬ​ស្មើ​ប្រមាណ​៥​ពាន់​ដុល្លារ​អាមេរិក។

អ្នកស្រី​ដែល​មាន​កូន​តូច​៣​នាក់ មាន​ប្រសា​សន៍​ថា​ប្រជាពលរដ្ឋ​បាន​ហៅ​ស្វាមី​អ្នកស្រី​ឲ្យ​ទៅ​ជួយ​ផ្សព្វផ្សាយ​ជម្លោះ​ដី​ធ្លី​តែ​ប៉ុណ្ណោះ ហើយ​ក៏​មាន​អ្នក​សារ​ព័ត៌មាន​ជា​ច្រើន​ផ្សេង​ទៀត ដែល​បាន​ចុះ​ទៅ​យក​ព័ត៌មាន​នៅ​ទី​នោះ​ដែរ។

អ្នកស្រី​មាន​ប្រសាសន៍​ថា៖ «ដល់​ពេល​អញ្ចឹង អយុត្តិធម៌​ណាស់។ ខ្ញុំ​អស់​ជំនឿ​លើ​ប្រព័ន្ធ​តុលាការ​កម្ពុជា»។

អ្នកស្រី​បន្ថែម​ថា៖ «ហើយ​គាត់​មាន​បាន​ទៅ​វាយ​អ្នក​ណា​មួយ​ដៃ។ ហើយ​ទៅ​ផ្សាយ​(ជា)​សាធារណៈ​តើ។ គាត់​មាន​ទៅ​បិទ​បាំង​បំផុស​បំផុល​ស្អី។ តាម​ការ​ស្នើ​សុំ​របស់​ប្រជាពលរដ្ឋ​តើ។ ហើយ​អ្នក​សារ​ព័ត៌មាន​មិន​មែន​ទៅ​តែ​ម្នាក់​គាត់​ឯណា។ គឺ​ទៅ​មួយ​ខែ ឡើង​ម្ភៃសាម​សែ​សិប​អង្គភាព​តើ»។

មេធាវីការ​ពារ​ឲ្យ​លោក សុខ ឧត្តម គឺ​លោក អ៊ុន ច័ន្ទ​ថុល ប្រាប់​VOA​នៅ​ថ្ងៃ​អង្គារ​នេះ​ថា​ការ​សម្រេច​នេះជា​ឆន្ទានុសិទ្ធិ​របស់​តុលាការ​ដែល​ប្រើ​ប្រាស់​ច្បាប់​ព្រហ្មទណ្ឌ។ តែ​លោក​ថា​ករណី​នេះ​គួរ​តែប្រើ​ប្រាស់​ច្បាប់​ស្តីពី​របប​សារព័ត៌មាន ដែល​ជា​ការ​កែ​តម្រូវ​ ប្រសិន​បើ​មាន​ការ​មិន​ពេញ​ចិត្ត​ពី​ភាគី​ម្ខាង​ទៀត។

លោក​មាន​ប្រសាសន៍​ថា៖ «អញ្ចឹង​ចំពោះ​ខ្ញុំ ខ្ញុំ​យល់​ថា​អង្គ​ហេតុ​ហ្នឹង គាត់​ជា​អ្នក​សារព័ត៌មាន គាត់​មាន​វិជ្ជាជីវៈក្នុង​ការ​និយាយ​អីៗ​អញ្ចឹង ប៉ុន្តែ​ទៅ​លើ​ខាង​តំណាង​អយ្យការ​ក៏​ដូចជា​ចៅក្រម​ គាត់​យល់​ឃើញ​ផ្ទុយ​ពី​យើង​ អាហ្នឹង​គាត់​មាន​សិទ្ធិ​ក្នុង​ការ​សម្រេច​សេចក្តី​តាម​ការ​យល់​ឃើញ​របស់​គាត់»។

មាត្រា​១០​នៃ​ច្បាប់​ស្តីពី​របប​សារព័ត៌មាន​ ចែង​ថា​បើ​តុលាការ​រក​ឃើញ​ថា​ការ​ផ្សាយ​ណា​មាន​លក្ខណៈ​ខុស​ពី​ការ​ពិត​តាម​បណ្តឹង​របស់​ដើម​បណ្តឹង​រដ្ឋប្បវេណី តុលាការ​អាច​បង្គាប់​ឲ្យ​សារព័ត៌មាន​នោះ​ចុះ​ផ្សាយ​នូវ​ការ​កែ​តម្រូវ​ ឬ​សង​ជំងឺ​ចិត្ត ឬ​ចុះ​ផ្សាយ​នូវ​ការ​កែ​តម្រូវ​ផង និង​បង់​ប្រាក់​សង​ជំងឺ​ចិត្ត​ផង។

លោក អ៊ិត សូធឿត នាយក​ផ្នែក​ប្រព័ន្ធ​ផ្សព្វ​ផ្សាយ​នៃ​មជ្ឈមណ្ឌល​កម្ពុជា ដើម្បី​ប្រព័ន្ធ​ផ្សព្វ​ផ្សាយ​ឯក​រាជ្យ មាន​ប្រសាសន៍​ថា​នេះ​ជា​សញ្ញា​នៃ​ការ​គំរាម​លើ​អ្នក​សារព័ត៌មាន​ផ្សេង​ទៀត ស្រប​ពេល​ដែល​អ្នក​កាសែត​៣​នាក់​ហើយ​ដែល​ត្រូវ​បាន​កាត់​ទោសពី​បទ​ញុះញង់​ ជា​ពិសេស​ករណី​រាយការណ៍​ពីបញ្ហា​ដី​ធ្លី ដែល​មាន​ជាប់​ពាក់ព័ន្ធ​នឹង​មន្ត្រី​យោធា​ជាន់​ខ្ពស់។

លោក​មាន​ប្រសាសន៍​ថា៖ «គាត់[អាជ្ញាធរ​]​គួរ​តែ​ស្វែង​យល់​អំពីតួនាទី​របស់​អ្នក​សារព័ត៌មាន​ក្នុង​ការ​បំពេញតួនាទី​ភារកិច្ច​របស់​គាត់ ជា​ជាង​ការ​មាន​បញ្ហា​អី​ គាត់​ប្តឹង​ដល់​តុលា​ការ»។

លោ​កបន្ថែម​ថា​ការ​កាត់​ទោស​ជា​បន្ត​បន្ទាប់​លើ​អ្នក​សារព័ត៌មាន ដោយ​ប្រើ​ប្រាស់​បទ​ញុះញង់​ដែល​ត្រូវ​បាន​រិះគន់​នេះ ​បង្ហាញ​ថា​សេរីភាព​សារ​ព័ត៌មាន​របស់​កម្ពុជា​ បន្ត​ធ្លាក់​ចុះ​បន្ថែម​ទៀត។

លោក វណ្ណ​ វិចារ អ្នក​សារព័ត៌មាន​ឯករាជ្យ​ម្នាក់ អាយុ​៣៥​ឆ្នាំ មាន​ប្រសាសន៍​ថា​បទ​ញុះញង់​ត្រូវ​បាន​ប្រើប្រាស់ ​ដើម្បី​គំរាម​ដល់​អ្នក​សារ​ព័ត៌មាន ដែល​ហ៊ាន​រាយការណ៍​បញ្ហា​នានា ពាក់ព័ន្ធ​នឹង​អ្នក​មាន​អំណាច ឬ​មន្ត្រី​ជាន់​ខ្ពស់។

អ្នក​កាសែត​ដែល​ធ្វើ​ការ​ក្នុង​វិស័យ​នេះ​ប្រមាណ​១០​ឆ្នាំ​មក​ហើយ បញ្ជាក់​ថា៖ «វា​ជា​ការ​ព្រួយ​បារម្ភ​សម្រាប់​ខ្ញុំ​ជា​អ្នក​កាសែត ព្រោះ​ថា​យើង​មិន​ដឹង​ថា​តើ​អត្ថបទ​មួយ​ណា តើ​សម្តី​មួយ​ណា​ដែល​និយាយ​ហ្នឹង អាច​នឹង​ត្រូវ​បាន​គេ​ចោទពី​បទ​ញុះញង់​ដោយ​ប្រការ​ណាមួយ​ទេ»។

លោក វណ្ណ​ វិចារ បន្ត​ថា​ករណី​លោក សុខ ឧត្តម ​គួរ​តែ​មាន​ការ​បក​ស្រាយ​ពី​អាជ្ញាធរ​ ជា​ជាង​ការ​ប្រើ​ប្រាស់​ប្រព័ន្ធ​តុលាការ ដែល​លោក​ថា​អាជ្ញាធរ​តែង​តែ​ឈ្នះ​ក្តី​លើ​ករណី​នេះ។

បើ​តាម​ភរិយា លោក សុខ ឧត្តម អាយុ​៣១​ឆ្នាំ បាន​ធ្វើ​ការ​ជា​អ្នក​សារ​ព័ត៌មាន​ក្នុង​ខេត្ត​កំពង់​ឆ្នាំង តាំងពី​ឆ្នាំ​២០១៤ ហើយ​ត្រូវ​បាន​ចាប់​ខ្លួន​ដាក់​ពន្ធនាគារ​ កាល​ពី​ខែ​ឧសភា ឆ្នាំ​២០​២០ មួយ​ថ្ងៃ​បន្ទាប់​ពី​លោក​បាន​ផ្សាយ​ព័ត៌មាន​ទាក់ទង​នឹង​ទំនាស់​ដីធ្លី​ក្នុង​ខេត្ត​កំពង់​ឆ្នាំង។

លោក សុខ ឧត្តម ដែល​មាន​ទំព័រ​ហ្វេសប៊ុក​ឈ្មោះ​«ស្ថានីយ​ព័ត៌មាន​វិទ្យុ​រិទ្ធិ​សែន» ត្រូវ​បាន​ចោទ​ប្រកាន់​ថា​រាយ​ការណ៍​បែប​ញុះ​ញង់​ឲ្យ​ប្រជា​ពលរដ្ឋ​កាន់​កាប់​ដី​រដ្ឋ​ក្នុង​ឃុំ​ជៀប ស្រុក​ទឹក​ផុស ខេត្ត​កំពង់​ឆ្នាំង។

បើ​តាម​មេធាវី កូនក្តី​របស់​លោក គឺ​លោក សុខ ឧត្តម ត្រូវ​បាន​ប្តឹង​ដោយ​ឈ្មោះ នូ សំរិទ្ធិ ដែល​គេ​ស្គាល់​ថា​ជា​មន្ត្រី​យោធា​ជាន់​ខ្ពស់​ម្នាក់​ក្នុង​ខេត្ត​កំពង់​ឆ្នាំង។ លោក​មេធាវី​មាន​ប្រសាសន៍​ថា​លោក នូ សំរិទ្ធ បាន​ចោទ​កូនក្តី​របស់​លោក​ថាបាន​ធ្វើ​សកម្មភាព​ញុះ​ញង់ បំផុសបំផុល​ឲ្យ​ប្រជាពលរដ្ឋ​តវ៉ា​យក​ដី ​ដែល​ជា​កន្លែង​បាញ់​គ្រាប់​ពិត​របស់​រដ្ឋ។

​VOA​មិន​អាច​សុំ​ការ​ឆ្លើយ​តប​ពី​លោក នូ សំរិទ្ធិ ដែល​ជា​មេ​បញ្ជាការ​រង​នៃ​បញ្ជាការ​ដ្ឋាន​សឹក​រង​ខេត្ត​កំពង់​ឆ្នាំង​បានទេ។ VOA​ក៏​មិនទាន់​អាច​សុំ​ការ​អត្ថាធិប្បាយ​ពី​លោក ឡុង ស៊ីថា អ្នក​នាំពាក្យ​របស់​តុលាការ​ខេត្ត​កំពង់​ឆ្នាំង​បាន​ដែរ​នៅ​ថ្ងៃ​អង្គារ​នេះ។

លោក ចាប សុខន អាយុ​៥២​ឆ្នាំ ជា​ប្រជាពលរដ្ឋ​ម្នាក់​រស់នៅ​ក្នុង​ភូមិ​កោះ​ខ្ទុម្ព ឃុំ​ជៀប ស្រុក​ទឹក​ផុស ដែល​មាន​ដី​ប្រមាណ​៦​ហិកតា​នៅ​ទី​នោះ​ ប៉ុន្តែ​មិន​មាន​ឯកសារ​ផ្លូវ​ច្បាប់។ លោក​មាន​ប្រសាសន៍​ថា​កាល​នោះ លោក សុខ ឧត្តម និង​អ្នក​សារព័ត៌មាន​ផ្សេង​ទៀត​បាន​ទៅ​ផ្សាយ​រឿង​ដី​ធ្លី​នៅ​ទី​នោះ ខណៈ​ប្រជា​ពល​រដ្ឋ​ប្រមូល​ផ្តុំ​គ្នា​នៅ​សាលា​ឃុំ​ជៀប។ លោក​បន្ត​ថា​លោក​ សុខ ឧត្តម មិន​បាន​ញុះញង់​ប្រជាពលរដ្ឋ​នោះ​ទេ។

លោក​មាន​ប្រសាសន៍​ថា៖ «ក្នុង​នាម​ជា​ប្រជាពលរដ្ឋ [ខ្ញុំ​យល់​ថា]ម៉េច​ដាក់​ទោស​គាត់​ដល់​ថ្នាក់​ហ្នឹង។ គាត់​មិន​មែន​ទៅ​ញុះញង់​ឲ្យ​ទៅ​ធ្វើ​បាប​ប្រជាពលរដ្ឋ ឬ​មួយ​ក៏​ធ្វើ​បាប​អ្នក​ណា ឲ្យ​បែក​ក្បាល​របួស​ស្នាម​ឯណា! អត់​ផង​ហ្នឹង»។

ភរិយា​របស់​លោក សុខ ឧត្តម មាន​ប្រសាសន៍​ថា​ការ​បិទ​ស្ថានីយ​វិទ្យុ​របស់​ស្វាមីរបស់​អ្នកស្រី ដោយ​ក្រសួង​ព័ត៌មាន ក្រោយ​មាន​ការ​ចាប់​ខ្លួន​លោក សុខ ឧត្តម ធ្វើ​ឲ្យ​ជីវភាព​របស់​គ្រួសារអ្នកស្រី ​ជួប​ការ​លំបាក ដោយ​សារ​ស្ថានីយ​វិទ្យុ​លែង​បាន​ជួល​ម៉ោង​ផ្សាយ ដែល​អ្នក​ស្រី​ថា​ក្នុង​មួយ​ថ្ងៃ កម្មវិធី​វិទ្យុ​ដំណើរ​ការ​ផ្សាយ​ចាប់​ពី​ម៉ោង​៤​ព្រឹក​ដល់​ម៉ោង​១១​យប់។

អ្នក​ស្រី នុត សុវន្ធូរ បញ្ជាក់​ថា​អ្នកស្រី​មិន​មាន​ប្រាក់​រហូត​ដល់​៥​ពាន់​ដុល្លារ​អាមេរិក​សម្រាប់​បង់​តាម​ការ​ពិន័យ​របស់​តុលាការ​នោះ​ទេ៕

ផែនទីលទ្ធផលការបោះឆ្នោតប្រធានាធិបតីអាមេរិកពីឆ្នាំ ១៩៩២-២០២០

XS
SM
MD
LG