ភ្នំពេញ៖ កម្មកររោងចក្រចំនួនពីរដែលមានគ្នាសរុបប្រមាណជាង១.០០០នាក់នៅក្នុងសង្កាត់ជ្រោយអំពិល ខណ្ឌមានជ័យ រាជធានីភ្នំពេញ បានផ្ទុះកំហឹងយ៉ាងខ្លាំងនៅព្រឹកថ្ងៃច័ន្ទនេះ បន្ទាប់ពីស្ត្រីមេកាជនជាតិចិនម្នាក់បានចាប់ហែករូបព្រះឆាយាល័ក្ខណ៍សម្តេចឪនរោត្តមសីហនុ។
កម្មករបាននិយាយថានៅវេលាម៉ោងប្រមាណ៧ព្រឹកនៅពេលដែលកម្មករចាប់ផ្តើមធ្វើការ មានកម្មការីនីម្នាក់បានយករូបព្រះឆាយាល័ក្ខណ៍របស់អតីតព្រះមហាក្សត្រមកមើលហើយបានយកលាក់ទុកវិញនៅពេលដែលឃើញស្ត្រីមេការទទួលបន្ទុកផ្នែកដេរនៃរោងចក្រថបវើលហ្គាម៉ែន (Top World Garment) បានមកដល់។
ស្ត្រីប្រធានផ្នែករូបនេះឈ្មោះ វ៉ាង ស៊ាជូ អាយុ៤៩ឆ្នាំ បានទាររូបថតពីកម្មការីនីរូបនោះ រួចក៏យកទៅកាត់ហែកចោលដោយប្រើកន្ត្រៃ។ រំពេចនោះកម្មករទាំងមូលបាននាំគ្នាបះបោរ ហើយធ្វើការតវ៉ាភ្លាមៗ។
វ៉ន រ៉ានី គឺជាកម្មការីនីម្នាក់ដែលនៅក្បែរការហែករូបថតនោះ។
«ខ្ញុំឃើញផ្ទាល់។ ខ្ញុំមិននិយាយពាក្យមិនពិតទេ! ដល់ពេលហើយខ្ញុំមិនសុខចិត្ត។ ស្តេចផែនដីមួយទាំងមូល ខ្ញុំគោរព។ ពូឯងក៏គោរព ខ្ញុំនិយាយជាមួយរដ្ឋបាលអញ្ចឹង។ ខ្ញុំត្រូវតែតស៊ូដើម្បីស្តេចខ្ញុំ ខ្ញុំគោរពររាល់ថ្ងៃ។ ខ្ញុំមិនអាចលើកទោសឲ្យបានទេ។ គ្មាននរណាធ្វើការទេយំគ្រប់គ្នា»។
កម្មករបានធ្វើការតវ៉ាយ៉ាងពុះកញ្ជ្រោលទាមទារឲ្យអាជ្ញាធរចាប់ខ្លួនស្ត្រីជនជាតិចិនយកទៅផ្តន្ទាទោសហើយបន្ទាប់មកកម្មករបានអនុញ្ញាតឲ្យអាជ្ញាធរនាំខ្លួនស្ត្រីរូបនេះចេញពីរោងចក្រ បន្ទាប់ពីស្ត្រីដដែលនេះបានធ្វើការសុំទោសនៅចំពោះមុខកម្មករ។ បន្ទាប់ពីពួកគេបានបះបោរអស់រយៈពេលជាច្រើនម៉ោងកម្មករមកពីរោងចក្រមួយទៀតគឺរោងចក្រក្បាលកោះGarment និងអ្នកភូមិមួយចំនួនបាននាំគ្នាធ្វើដំណើរមកតវ៉ា នៅមុខស្នងការប៉ូលិសរាជធានីភ្នំពេញ និងបានចូលទៅគោរពវិញ្ញាណក្ខន្ធសម្តេចឪនរោត្តមសីហនុ។ ពួកគេបានធ្វើដំណើរដោយរថយន្តចំនួនប្រាំបួន ហើយកម្មករនៅសេសសល់ប្រមាណជាង១០០នាក់ បានធ្វើដំណើរដោយថ្មើរជើងដោយលើកកម្រងផ្កាមានព្រះឆាយាល័ក្ខណ៍របស់អតីតព្រះមហាក្សត្រឆ្ពោះមកកាន់ព្រះបរមរាជវាំង។
ការធ្វើដំណើរដែលមានចម្ងាយផ្លូវប្រមាណជាង១០គីឡូម៉ែត្រ។
លោកឧត្តមសេនីយ៍ ជួន សុវណ្ណ ស្នងការនគរបាលរាជធានីភ្នំពេញមានប្រសាសន៍ថាប៉ូលិសបានសម្រេចឃាត់ខ្លួនស្ត្រីមេការ ហើយនឹងបញ្ជូនទៅកាន់តុលាការនៅព្រឹកថ្ងៃស្អែកនេះ។
«ជនជាតិចិននេះ យើងកំពុងតែកសាងសំណុំរឿងទៅតាមនីតិវិធី ដើម្បីបញ្ជូនទៅព្រះរាជអាជ្ញាអមសាលាដំបូងរាជធានីភ្នំពេញ ដើម្បីឲ្យលោកមាននីតិវិធីធ្វើការចោទប្រកាន់តាមផ្លូវច្បាប់»។
លោកឧត្តមសេនីយ៍ ជួន សុវណ្ណ មានប្រសាសន៍ថាស្ត្រីរូបនេះបានប្រព្រឹត្តខុសទៅនឹងរដ្ឋធម្មនុញ្ញព្រះរាជាណាចក្រកម្ពុជានៅត្រង់មាត្រាទី៧ ដែលចែងថាព្រះមហាក្សត្រមិនអាចប៉ះពាល់បាន និងខុសទៅនឹងក្រមព្រហ្មទណ្ឌនៅត្រង់មាត្រាទី៤៩៤ និងមាត្រាទី៤៩៥ ដែលចែងពីបទញុះញង់បង្កចលាចលដែលនាំឲ្យប៉ះពាល់ដល់សន្តិសុខសង្គម។
«ព្រោះយើងឃើញថាកំហឹងរបស់កម្មកររោងចក្ររាប់រយ ជិតពាន់នាក់ពីព្រឹកម៉ិញហ្នឹង គឺមានកំហឹងខ្លាំងណាស់ អាចឈានទៅបង្កើតអំពើហិង្សា។ ប៉ុន្តែដោយសារការទប់ស្កាត់ របស់អាជ្ញាធរមានសមត្ថកិច្ចទាន់ពេលវេលា ជាពិសេសបើសិនជាមិនមានការអប់រំ កម្មករហ្នឹងទាំងអស់មិនមានការយល់ដឹងខ្ពស់ទេ គឺវាយបំផ្លាញរោងចក្រហ្នឹងខ្ទេចហើយ»។
កម្មករបានទាមទារឲ្យអាជ្ញាធរផ្តន្ទាទោស ឬក៏ត្រូវបណ្តេញស្ត្រី វ៉ាង ស៊ាជូ ចេញពីប្រទេសកម្ពុជា។
លោក គុច ឧសភា ប្រធានផ្នែករដ្ឋបាលនៃរោងចក្រថបវើលហ្គាម៉ែន ដែលមានបញ្ហានោះបានបញ្ជាក់ថាស្ត្រីជនជាតិចិននោះត្រូវបានបណ្តេញចេញពីរោងចក្រហើយនៅថ្ងៃដដែលនេះ។
រោងចក្រថបវើលហ្គាម៉ែនមានទីផ្សារសំខាន់នៅសហរដ្ឋអាមេរិក និងនៅទ្វីបអឺរ៉ុប៕
