បណ្តុំអង្គការសង្គមស៊ីវិល នៅថ្ងៃច័ន្ទនេះ បានទាមទារឲ្យរដ្ឋាភិបាលដោះលែងអ្នកតំណាងរាស្ត្រចំនួន៧នាក់និងសកម្មជនគណបក្សសង្គ្រោះជាតិម្នាក់ផ្សេងទៀតចេញពីពន្ធនាគារដោយគ្មានលក្ខខណ្ឌ។
អ្នកតំណាងរាស្ត្រជាប់ឆ្នោតនិងសកម្មជនគណបក្សសង្គ្រោះជាតិចំនួន៨រូបដែលក្នុងនោះមានលោកស្រី មួរ សុខហួរ សញ្ជាតិអាមេរិកកាំងដើមកំណើតខ្មែរ ត្រូវបានក្រុមសមត្ថកិច្ចចាប់ខ្លួនកាលពីសប្តាហ៍មុន រួចហើយត្រូវបានតុលាការចេញដីកាឃុំខ្លួននៅពន្ធនាគារព្រៃស ក្រោមបទចោទប្រកាន់ថា បានញុះញង់នាំឲ្យមានអំពើហិង្សា ក្រោយពីព្រឹត្តិការណ៍ប៉ះអង្គិចនៅសួនប្រជាធិបតេយ្យ។
ប្រសិនណាបើតុលាការរកឃើញថា មានទោសកំហុស អ្នកទាំងនោះអាចប្រឈមមុខក្នុងការជាប់ពន្ធនាគាររយៈពេល៣០ឆ្នាំ។
ក្រុមអង្គការសង្គមស៊ីវិលបានធ្វើសន្និសីទកាសែតមួយ ក្រោយពីមានការចាប់ខ្លួនអ្នកតំណាងរាស្ត្រជាប់ឆ្នោតជាបន្តបន្ទាប់ ដោយបានរិះគន់សកម្មភាពចាប់ខ្លួននេះថា រដ្ឋាភិបាលកំពុងគំរាមកំហែងការប្រើប្រាស់សិទ្ធិសេរីភាពក្នុងការបញ្ចេញមតិ និងការជួបប្រជុំ ដែលជាផ្នែកមួយយ៉ាងសំខាន់នៃគោលការណ៍សិទ្ធិមនុស្ស ដូចមានចែងក្នុងរដ្ឋធម្មនុញ្ញ។
សេចក្តីថ្លែងការណ៍រួមគ្នារបស់អង្គការសង្គមស៊ីវិលទាំង៣៩បានចាត់ទុកថាលំហប្រជាធិបតេយ្យកាន់តែរួមតូចចង្អៀតដែលជាការជះឥទ្ធិពលដល់សេរីភាពជាមូលដ្ឋានរបស់មនុស្ស ដូចជាសិទ្ធិសេរីភាពបញ្ចេញមតិនិងសិទ្ធិជួបប្រជុំជាដើម។
លោក នី ចរិយា ប្រធានផ្នែកស៊ើបអង្កេតសិទ្ធិមនុស្សរបស់សមាគម ADHOC មានប្រសាសន៍ក្នុងអង្គសន្និសីទកាសែតថា នៅក្នុងឆ្នាំ២០១៤នេះមានមនុស្សយ៉ាងតិចប្រមាណ៣០នាក់ត្រូវបានអាជ្ញាធររដ្ឋាភិបាលចាប់ដាក់ពន្ធនាគារដោយគ្មានកំហុស។ លោកបានហៅអ្នកដែលកំពុងជាប់ឃុំនិងអ្នកដែលត្រូវបានដោះលែងមកវិញថា ជាអ្នកទោសមនសិការ។
លោកបានបញ្ជាក់ថា តុលាការកម្ពុជានៅតែស្ថិតនៅក្រោមឥទ្ធិពលគណបក្សកាន់អំណាចដើម្បីប្រើប្រាស់ គំរាមកំហែង បំបាក់ស្មារតីអ្នកតវ៉ាដែលហ៊ានទិតៀន និងអ្នកដែលមិនគាំទ្ររដ្ឋាភិបាល។
លោកនិយាយថា៖ «យើងឃើញហើយថា ការចាប់ខ្លួនអ្នកតំណាងរាស្រ្តគណបក្សសង្គ្រោះជាតិ៧រូប និងសកម្មជនគណបក្សសង្គ្រោះជាតិមួយរូប ព្រមទាំងការចាប់ខ្លួនតំណាងកម្មករ២៣រូបនាពេលកន្លងមកគឺជាសក្ខីភាពជាក់ស្តែង ដែលបង្ហាញថា តុលាការកម្ពុជាគឺស្ថិតនៅក្រោមការគ្រប់គ្រងរបស់គណបក្សកាន់អំណាច»។
លោកកែម ឡី អ្នកវិភាគសង្គមឯករាជ្យ មានប្រសាសន៍ថា ទិដ្ឋភាពនៅកម្ពុជាប្រាកដជាមានការរំលោភសិទ្ធិមនុស្សមែន ហើយមានច្រើននិងឃោរឃៅ។ លោកបានស្តីបន្ទោសថា ការរំលោភសិទ្ធិមនុស្សនោះទាក់ទងទៅនឹងវប្បធម៌សង្គម និងនិយោបាយ ដែលអ្នកដឹកនាំកំពុងតែអនុវត្តនូវលទ្ធិកុម្មុយនីស្ត។
លោកនិយាយថា៖ «យើងសង្កេតឃើញព្រឹត្តិការណ៍នេះហាក់បីដូចជាអ្នកនិពន្ធដដែល។ ជារួមយើងធ្លាប់អានសៀវភៅ ពេលយើងអានទៅ គ្រាន់តែដឹងអត្ថន័យ យើងដឹងថា អ្នកនិពន្ធហ្នឹងមកពីណា? ហើយអ្នកនិពន្ធហ្នឹងរាងសាហាវ»។
លោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ ដែលធ្លាប់ជាប់ពន្ធនាគារដោយសារការបង្ក្រាបពីសមត្ថកិច្ចកាលពីដើមខែមករា មានប្រសាសន៍ថា រយៈពេលចុងឆ្នាំ២០១៣និងដើមឆ្នាំ២០១៤ទំហំសេរីភាពសម្រាប់អ្នកធ្វើការតស៊ូមតិនៅកម្ពុជាត្រូវបានរិតត្បិតដោយអាជ្ញាធររដ្ឋាភិបាល ជាពិសេសក្រោយពេលបោះឆ្នោត។
លោកនិយាយថា៖ «យើងឃើញថា សេរីភាពនេះត្រូវបានរិតត្បិតដោយអាជ្ញាធរមានសមត្ថកិច្ចរបស់រដ្ឋាភិបាល។ កន្លងមកយើងឃើញថា សកម្មជនមួយចំនួន ដូចជាប្រធានសហជីពដូចជាលោកជា វិជ្ជាត្រូវបាញ់សម្លាប់ ប៉ុន្តែរូបភាពថ្មីគឺគេមិនបាញ់សម្លាប់ទេ។ គេធ្វើបាបតាមរយៈការបង្ក្រាបយ៉ាងឃោរឃៅទៅលើយើងទាំងអស់គ្នា»។
លោកផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី បានច្រានចោលការរិះគន់របស់ក្រុមអង្គការក្រៅរដ្ឋាភិបាល។ លោកបានបញ្ជាក់ថា ការចាប់ខ្លួនអ្នកតំណាងរាស្ត្រគឺជាការអនុវត្តនិតិវិធីរបស់តុលាការតាមផ្លូវច្បាប់តែប៉ុណ្ណោះ៕
