ប្រទេសកម្ពុជា និងចិននឹងចុះហតុ្ថលេខាលើកិច្ចព្រមព្រៀងថ្មីមួយស្តីពី«មូលនិធិពិសេស»សម្រាប់គម្រោងកិច្ចសហប្រតិបត្តិការមេគង្គ-ឡានឆាងឆ្នាំ២០២០នៅថ្ងៃអង្គារ ទី២៣ ខែមិថុនានេះ ប៉ុន្តែមិនបានបង្ហាញលម្អិតអំពីមូលនិធិពិសេសនោះទេ។
សេចក្តីប្រកាសព័ត៌មានរបស់ក្រសួងការបរទេសនិងសហប្រតិបត្តិការអន្តរជាតិចុះផ្សាយនៅថ្ងៃច័ន្ទនេះ បានបញ្ជាក់ថា លោក ប្រាក់ សុខុន រដ្ឋមន្ត្រីការបរទេសកម្ពុជានិងលោកវ៉ាង វិនធាន (Wang Wentian) ឯកអគ្គរដ្ឋទូតចិនប្រចាំកម្ពុជា នឹងចុះហត្ថលេខាលើកិច្ចព្រមព្រៀងស្តីពីមូលនិធិដែលមានទឹកប្រាក់ជាង ៧ លានដុល្លារអាមេរិកនេះ។
កិច្ចព្រមព្រៀងនេះធ្វើឡើង ក្រោយពីមានរបាយការណ៍រិះគន់នៅពេលថ្មីៗនេះថា ប្រទេសចិនកាលពីឆ្នាំមុនបានទប់ទំនប់ដែលខ្លួនបានសង់លើទន្លេមេគង្គដែលចិនហៅថា ឡានឆាងនោះ ដែលធ្វើឲ្យកម្រិតទឹកចុះទាបខុសធម្មតា និងមានភាពរាំងស្ងួតក្នុងបណ្តាប្រទេសជាប់ទន្លេមេគង្គនៅខ្សែទឹកខាងក្រោមដូចជាថៃ ឡាវ កម្ពុជានិងវៀតណាម។
ក្រសួងការបរទេសកម្ពុជាលើកឡើងថា គម្រោងកម្ពុជាចំនួន២០ត្រូវបានគាំទ្រដោយមូលនិធិពិសេសនេះ ភាគច្រើនផ្តោតទៅលើសកម្មភាពពាក់ព័ន្ធនឹងវិស័យអភិវឌ្ឍន៍សេដ្ឋកិច្ចសង្គម អភិវឌ្ឍន៍ធនធានមនុស្ស សន្តិសុខតាមប្រព័ន្ធអ៊ឺនធើណិត និងវិស័យមួយចំនួនទៀត តែមិនបានបញ្ជាក់លម្អិតអំពីសកម្មភាពទៅលើវិស័យទាំងនោះទេ៕
