អង្គការសម្ព័ន្ធសង្គ្រោះទន្លេមេគង្គ (Save the Mekong Coalition) បានអំពាវនាវឲ្យលុបចោលគម្រោងសាងសង់ទំនប់វារីអគ្គិសនីសាណាខាំ (Sanakham) របស់លាវ ដោយនិយាយថា គម្រោងនេះ«មិនចាំបាច់ ប្រកបដោយហានិភ័យនិងចំណាយលុយអស់ច្រើន»។
ក្រុមបរិស្ថាននេះលើកឡើងថា ការអភិវឌ្ឍថាមពលព្រះអាទិត្យ ដែលមានចីរភាព មានផលចំណេញខាងសេដ្ឋកិច្ច និងបរិស្ថានច្រើនជាងក្នុងរយៈពេលយូរ ដូចដែលប្រទេសវៀតណាមបានធ្វើរវាងខែមេសានិងខែកក្កដាឆ្នាំ២០១៩។
សេចក្តីថ្លែងការណ៍របស់អង្គការនេះ ដែលបានចេញផ្សាយនៅថ្ងៃទី២ ខែមិថុនា ឆ្នាំ២០២០ បានរៀបរាប់ថា គម្រោងកសាងទំនប់វារីអគ្គិសនីសាណាខាំ ដែលជាគម្រោងទំនប់ទី៦របស់លាវ នៅលើដងទន្លេមេនៃទន្លេមេគង្គនោះ នឹងបង្កផលប៉ះពាល់ឆ្លងដែនដ៏ធំធេងដល់ទន្លេដែលពលរដ្ឋរាប់លាននាក់ពឹងអាស្រ័យ។
ការអំពាវនាវនេះធ្វើឡើង ខណៈដែលក្រុមអង្គការសង្គមស៊ីវិលដែលធ្វើការផ្នែកអភិបាលកិច្ចទឹកនៅកម្ពុជា កាលពីថ្ងៃអង្គការ បានស្នើឲ្យពន្យារពេលដំណើរការពិគ្រោះយោបល់ជាមុននៃគម្រោងកសាងទំនប់វារីអគ្គិសនីមួយទៀតរបស់លាវគឺទំនប់ហ្លួងប្រាបាង្គ ដោយសារការព្រួយបារម្ភអំពីផលប៉ះពាល់ឆ្លងដែននៃគម្រោងនេះ។
ទំនប់វារីអគ្គិសនីសាណាខាំដែលគ្រោងចំណាយថវិកាអស់ជាង២ពាន់លានដុល្លារនិងផលិតថាមពល៦៨៤មេហ្គាវ៉ាត់នេះស្ថិតនៅចន្លោះខេត្តសាយ៉ាប៊ូរី និងខេត្តវៀងច័ន្ទរបស់លាវ។ ទំនប់នេះគ្រោងនឹងចាប់ផ្តើមសាង់សង់នៅឆ្នាំ២០២០នេះ ហើយនឹងបញ្ចប់នៅឆ្នាំ២០២៨ ដោយថាមពលដែលផលិតបាន ភាគច្រើននឹងត្រូវលក់ទៅឲ្យប្រទេសថៃ។ នេះបើយោងតាមគណៈកម្មការទន្លេមេគង្គ។
គណៈកម្មាធិការចម្រុះនៃគណៈកម្មការទន្លេមេគង្គគ្រោងនឹងជួបប្រជុំគ្នានៅថ្ងៃទី៤ខែមិថុនាស្អែកនេះ ដើម្បីពិភាក្សាគ្នាអំពីគម្រោងទំបន់វារីអគ្គិសនីរបស់លាវនេះ៕
