ក្រសួងសេដ្ឋកិច្ចនិងហិរញ្ញវត្ថុបានចេញតារាងតម្លៃមួយ ដោយគិតថ្លៃសេវាពីអ្នកដំណើរបរទេសដែលចូលមកប្រទេសកម្ពុជា សម្រាប់ការធ្វើតេស្តរកជំងឺកូវីដ១៩ ខណៈអ្នកដំណើរបរទេសក៏តម្រូវឲ្យតម្កល់ប្រាក់ ៣ពាន់ដុល្លារផងដែរ ដើម្បីទុកក្នុងករណីមានជំងឺកូវីដ។
កាលពីថ្ងៃទី៥ ខែមិថុនា ក្រសួងការបរទេសកម្ពុជាបានណែនាំថា រាល់ការធ្វើដំណើរចូលប្រទេសកម្ពុជា អ្នកធ្វើដំណើរទាំងអស់ រួមមានទាំងបរទេសនិងជនជាតិខ្មែរ ត្រូវធ្វើតេស្តរកជំងឺកូវីដ១៩។ ពួកគេត្រូវរង់ចាំ ២៤ ម៉ោង ដើម្បីធ្វើតេស្តសំណាករបស់ពួកគេ។
យោងតាមតារាងតម្លៃ ចុះថ្ងៃទី៨ ខែមិថុនា របស់ក្រសួងសេដ្ឋកិច្ច និងហិរញ្ញវត្ថុ ការយកសំណាករបស់ជនបរទេសទៅធ្វើតេស្តរកជំងឺកូវីដ មានតម្លៃ ១០០ ដុល្លារ សម្រាប់មនុស្សម្នាក់ និងការធ្វើតេស្តម្តង។ នេះបញ្ចូលទាំងថ្លៃមកយកសំណាក និងលទ្ធផលបញ្ជាក់។ ប្រសិនបើជនបរទេសត្រូវការបណ្ណបញ្ជាក់ថាគ្មានជំងឺកូវីដ១៩ ត្រូវចំណាយ ៣០ ដុល្លារទៀត។
ការដាក់ឲ្យនៅដាច់ដោយឡែក ក្នុងរយៈពេល ១៤ ថ្ងៃ ក៏ត្រូវចំណាយថវិកាផងដែរ សម្រាប់អ្នកធ្វើដំណើរបរទេស។ ប្រសិនបើអ្នកធ្វើដំណើរណាមួយមានជំងឺកូវីដ អ្នកធ្វើដំណើរទាំងអស់តម្រូវឲ្យស្នាក់នៅ ១៤ ថ្ងៃ នៅកន្លែងដែលរដ្ឋាភិបាលកម្ពុជារៀបចំឲ្យ។ បើតាមតារាងតម្លៃ កន្លែងស្នាក់នៅសម្រាប់ជនបរទេសមានតម្លៃ ៣០ ដុល្លារ ក្នុងមួយថ្ងៃ អាហារបីពេល ៣០ ដុល្លារ។ បន្ថែមពីនេះ ថ្លៃដឹកជញ្ជូនពីព្រលានយន្តហោះទៅដល់មណ្ឌលសំចតរង់ចាំធ្វើតេស្តសំណាក មានតម្លៃ ៥ ដុល្លារ ក្នុងមួយជើង។
ក្រសួងសេដ្ឋកិច្ច និងហិរញ្ញវត្ថុក៏បានកំណត់ថ្លៃបោកគក់ និងអនាម័យចំនួន ១៥ ដុល្លារ ក្នុងមួយថ្ងៃសម្រាប់មនុស្សម្នាក់ សេវាគ្រូពេទ្យប្រចាំការពេលដាក់ឲ្យនៅដាច់ដោយឡែក ចំនួន ៦ ដុល្លារ ក្នុងមួយថ្ងៃ និងសេវាសន្តិសុខ ៣ ដុល្លារ សម្រាប់មនុស្សម្នាក់។ ក្នុងករណីអ្នកជំងឺស្លាប់ដោយសារជំងឺកូវីដ ការបូជាសពមានតម្លៃ ១៥០០ ដុល្លារ។
ប្រសិនបើជនបរទេសធ្វើតេស្តមានជំងឺកូវីដ១៩ ការធ្វើតេស្តសំណាកបន្តទៀតអាចមានយ៉ាងតិច ៤ ដងទៀត ដូច្នេះការចំណាយគិតទៅតាមការធ្វើតេស្តម្តងៗ ដែលមួយលើកមានតម្លៃ ១០០ ដុល្លារ។
ក្រសួងសុខាភិបាលតម្រូវឲ្យអ្នកដំណើរបរទេសទាំងអស់ដែលចូលមកប្រទេសកម្ពុជា ត្រូវតែមានបណ្ណបញ្ជាក់សុខភាពថា គ្មានជំងឺកូវីដ១៩ ចេញដោយអាជ្ញាធរសុខាភិបាលដែលទទួលស្គាល់ដោយរដ្ឋាភិបាលនៃប្រទេសទាំងនោះ ក្នុងរយៈពេល ៧២ ម៉ោង។ ប៉ុន្តែពេលមកដល់ ក៏តម្រូវឲ្យធ្វើតេស្តសំណាកម្តងទៀត ដើម្បីបញ្ជាក់ឲ្យច្បាស់។
លោក មាស សុខសេនសាន អ្នកនាំពាក្យនៃក្រសួងសេដ្ឋកិច្ចនិងហិរញ្ញវត្ថុ មានប្រសាសន៍ថា ក្រសួងបានថ្លឹងថ្លែងអស់ហើយមុននឹងសម្រេចយកតម្លៃ និងកំណត់តម្លៃនេះ ដោយលោកថា អាចទទួលយកបាន។ លោកបន្តថា ការព្យាបាលជនបរទេសត្រូវយកតម្លៃ មិនអាចមិនយកនោះទេ។
លោកបានថ្លែងប្រាប់ VOA ថា៖ «ឥឡូវខ្ញុំសួរអ៊ីចេះវិញថា វីអូអេមានព័ត៌មានថា តើប្រទេសណាដែលគាត់ព្យាបាលជំងឺទេសចរដែលឥតគិតថ្លៃ? អាហ្នឹងសុំប្រាប់ខ្ញុំទីមួយ។ ទីពីរ ជាយន្តការមុននឹងចេញ គឺយើងបានពិគ្រោះយោបល់គ្នាទៅវិញទៅមកអស់ហើយ»។
លោក សៅ វឌ្ឍនា នាយកអាកាសយានដ្ឋានអន្តរជាតិភ្នំពេញ មានប្រសាសន៍ថា អ្នកដំណើរបរទេសតម្រូវឲ្យធ្វើតេស្តរកវីរុសកូរ៉ូណា បើទោះពួកគេមានបណ្ណបញ្ជាក់សុខភាពក៏ដោយ។ លោកបន្តថា ពួកគេក៏ត្រូវត្រៀមតម្កល់ប្រាក់ ៣ពាន់ដុល្លារផងដែរ ជាប្រាក់ទុកក្នុងករណីពួកគេមានជំងឺកូវីដ។ លោកថា នេះជាការណែនាំរបស់ក្រសួងសុខាភិបាល ហើយនីតិវិធីយ៉ាងណា ក្រសួងជាអ្នករៀបចំ។
លោកថ្លែងនៅថ្ងៃព្រហស្បតិ៍នេះថា៖ «គឺគេតម្រូវឲ្យបង់ ៣ពាន់ ចាប់ពីថ្ងៃហ្នឹង ឬក៏ថ្ងៃស្អែក។ ខាងក្រសួង[សុខាភិបាល]គេតម្រូវឲ្យតម្កល់ទុកជាមួយនឹងធនាគារ ដែលគេបានកំណត់។ គ្រាន់តែជាលុយតម្កល់ គ្រាន់តែគាត់មានជំងឺ យកលុយនឹងទៅព្យាបាល (ចំណាយ) ស្នាក់នៅហូបចុកអីហ្នឹង»។
នៅពេលសួរថា តើការតម្រូវឲ្យតម្កល់ប្រាក់នេះនឹងធ្វើឲ្យប៉ះពាល់ដល់វិស័យទេសចរណ៍បន្តទៀតឬយ៉ាងណា លោកមានប្រសាសន៍ថា៖ «អាហ្នឹងចាំមើលអនុវត្តនីតិវិធីហ្នឹងជាក់ស្តែង។ យើងអត់ទាន់អាចថាបានទេ ព្រោះយើងអត់ទាន់បានអនុវត្ត»។
បើតាមលោក សៅ វឌ្ឍនា កាលពីថ្ងៃពុធ មានជើងយន្តហោះចំនួន ៥ ធ្វើដំណើរមកកម្ពុជាដែលភាគច្រើនជាជនជាតិចិន។
VOA មិនអាចសុំការអត្ថាធិប្បាយពីរដ្ឋមន្រ្តីសុខាភិបាលលោក ម៉ម ប៊ុនហេង និងអ្នកនាំពាក្យក្រសួងសុខាភិបាល លោកស្រី ឱ វណ្ណឌីន និងលោក លី សូវ៉ាន់ បាននៅឡើយទេ។
លោក ខែក នរិន្ទដា នាយកផ្នែកទំនាក់ទំនងសាធារណៈនៃអាកាសយានដ្ឋានអន្តរជាតិភ្នំពេញ មានប្រសាសន៍ថា កាលពីថ្ងៃពុធ ការធ្វើដំណើរមកដល់កម្ពុជា និងចេញពីកម្ពុជា មានអ្នកធ្វើដំណើរប្រមាណ ១៧០០ នាក់តែប៉ុណ្ណោះ ក្នុងនោះមានជនជាតិខ្មែរនិងបរទេសផងដែរ។ លោកបន្តថា តាមគម្រោងនៅថ្ងៃព្រហស្បតិ៍នេះ មានជើងយន្តហោះចំនួន ៣ ដែលចូលមកកម្ពុជា និងមានជើងយន្តហោះចំនួន ៥ ចេញពីកម្ពុជា។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា គាំទ្រការពិនិត្យសុខភាពរកជំងឺកូវីដ១៩ ក្នុងចំណោមជនបរទេសដែលចូលមកកម្ពុជា។ ប៉ុន្តែលោកស្រីបារម្ភថា វាអាចប៉ះពាល់ដល់វិស័យទេសចរណ៍បន្ថែមទៀត ខណៈប្រជាពលរដ្ឋកម្ពុជាប្រមាណ ៦៣ ម៉ឺននាក់ ដែលទទួលផលប្រយោជន៍ពីវិស័យទេសចរណ៍ បានបាត់បង់ការងារ និងប្រាក់ចំណូលរបស់ពួកគេ។
លោកស្រីបន្តថា តម្លៃ១ ០០ ដុល្លារសម្រាប់ធ្វើតេស្តរកជំងឺកូវីដក្នុងមួយដង គឺថ្លៃសម្រាប់បរទេស។ លោកស្រីថា តម្លៃគួរតែតិចជាងនេះគឺ ៥០ ដុល្លារបានហើយ។
លោកស្រីមានប្រសាសន៍ថា៖ «ទស្សនៈរបស់ខ្ញុំ គួរតែមានតម្លៃណាមួយឲ្យល្អជាងហ្នឹងបន្តិច កុំឲ្យថ្លៃពេកដើម្បីឲ្យភ្ញៀវគាត់អាចសុំចូលបាន»។
លោកស្រីក៏ជំរុញឲ្យមានការអនុវត្តតាមតារាងតម្លៃឲ្យបានត្រឹមត្រូវ ព្រោះកន្លងមក លោកស្រីថា មានការត្អូញត្អែរពីជនបរទេសថា ការយកតម្លៃកន្លែងស្នាក់នៅ មានទៅដល់ ២០០ ឬ ៣០០ ដុល្លារក្នុងមួយថ្ងៃ ក្នុងពេលដាក់ឲ្យនៅដាច់ដោយឡែក។
លោកស្រីមានប្រសាសន៍ថា៖ «ដោយសារកន្លងមកគឺភ្ញៀវ complain (ត្អូញត្អែរ)ច្រើន ដោយសារបង់លើសហ្នឹង មួយយប់ ២០០ ទៅ ៣០០ ដុល្លារ។ អ៊ីចឹងទៅ ធ្វើឲ្យភ្ញៀវអាក់អន់ស្រពន់ចិត្តអ៊ីចឹងទៅ។ ភ្ញៀវអាក់អន់ស្រពន់ចិត្ត។ អ៊ីចឹងបើមានតារាងតម្លៃអស់ហ្នឹងហើយ យើងគួរតែធ្វើម៉េចឲ្យមានការអនុវត្ត ឲ្យទៅតាមអ្វីដែលបានដាក់ជូន»។
ក្នុងកិច្ចប្រជុំមួយជាមួយអ្នកសារព័ត៌មាន កាលពីថ្ងៃទី៤ ខែមិថុនា លោក ដួង វាសនា អនុប្រធានផ្នែកវីរុសសាស្រ្តនៃវិទ្យាស្ថានប៉ាស្ទ័រកម្ពុជា មានប្រសាសន៍ថា លោកព្រួយបារម្ភអំពីកំណើននៃការធ្វើតេស្តបន្តទៀត ដោយសារអ្នកធ្វើដំណើរទាំងអស់តម្រូវឲ្យធ្វើតេស្តរកជំងឺកូវីដ១៩។ លោកបារម្ភខ្វះសារធាតុ Reagent សម្រាប់ធ្វើតេស្តរកវីរុសកូរ៉ូណា។ សារធាតុនេះវិទ្យាស្ថានប៉ាស្ទ័រទិញពីក្រៅប្រទេស។
លោកមានប្រសាសន៍ថា៖ «យើងបានកម្ម៉ង់ទិញច្រើន ដើម្បីត្រៀមនៅពេលមានបញ្ហា»។
លោកបន្តថា វិទ្យាស្ថានប៉ាស្ទ័រក៏នឹងរៀបចំឲ្យមានការពិនិត្យរកជំងឺកូវីដដល់អ្នកដែលត្រូវការចេញទៅក្រៅប្រទេសចាំបាច់ផងដែរ។ លោកបញ្ជាក់ថា ការសម្រេចបន្តទៀត ស្ថិតនៅលើក្រសួងសុខាភិបាល៕
