ភ្ជាប់​ទៅ​គេហទំព័រ​ទាក់ទង

ការ​បោះឆ្នោត​ជ្រើសតាំង​តំណាង​រាស្ត្រ​ខាងមុខ​មាន​ផល​វិបាក​​ជាច្រើន​

  • គង់ សុឋានរិទ្ធ

​នាយក​មជ្ឈ​មណ្ឌល​សិទ្ធិ​មនុស្ស​កម្ពុជា​ លោក​អ៊ូ វីរៈ
​ភ្នំពេញ​៖ នៅក្នុង​របាយ​ការណ៍​សង្ខេប​មួយ​ដែល​ចេញផ្សាយ​នៅ​ថ្ងៃ​ច័ន្ទ​នេះ មជ្ឈមណ្ឌល​សិទ្ធិ​មនុស្ស​កម្ពុជា​បាន​រក​ឃើញ​ថា​ គណបក្ស​ប្រជាជន​កម្ពុជា​របស់​លោក​នាយក​រដ្ឋមន្ត្រី​ហ៊ុន សែន ​ដែល​កំពុង​គ្រប់គ្រង​អំណាច​បាន​គ្រប​ដណ្តប់​លើ​បណ្តា​ស្ថាប័ន​របស់​រដ្ឋ​ដែល​នាំ​ឲ្យ​ចុះ​ខ្សោយ​ដល់​ការ​អនុវត្ត​ច្បាប់ ​ដល់​ដំណើរការ​ប្រជា​ធិបតេយ្យ​និង​សិទ្ធិ​មនុស្ស។​

ជាមួយ​គ្នា​នេះដែរ​ ​មជ្ឈមណ្ឌល​សិទ្ធិ​មនុស្ស​កម្ពុជា​ក៏​បាន​លើក​ពី​កង្វះ​ឯក​រាជ្យ​ភាព​របស់​គណៈកម្មាធិការ​ជាតិ​រៀបចំ​ការ​បោះឆ្នោត​ ការ​ចូលរួម​របស់​ស្ត្រី​ក្នុង​នយោបាយ​នៅ​មាន​កម្រិតទាប​ដែល​គួរតែ​មាន​យ៉ាង​តិច​បំផុត​៣០​ភាគ​រយ ​រីឯ​ក្រុម​យុវជន​ក៏​នៅ​មិន​ទាន់បាន​ចូលរួម​សកម្ម​ក្នុង​វិស័យ​នយោបាយ​ និង​មិន​ទាន់​បាន​ត្រៀមខ្លួន​ជា​អ្នក​ដឹកនាំ​ និង​ជា​អ្នក​នយោបាយ​នោះ​ដែរ។​

លោក​អ៊ូ វីរៈ ​នាយក​មជ្ឈ​មណ្ឌល​សិទ្ធិ​មនុស្ស​កម្ពុជា​ មាន​ប្រសាសន៍​ថា​របាយ​ការណ៍​នេះ​មាន​បំណង​ទាក់​ទាញ​ការ​យក​ចិត្ត​ទុក​ដាក់​របស់​អ្នក​នយោបាយ​ និង​ប្រជា​ពលរដ្ឋ​ដែល​ជា​ម្ចាស់​ឆ្នោត។​

«ការ​បោះឆ្នោត​បន្ត​បន្ទាប់​មក​នេះ​គឺមាន​ការ​ធ្លាក់​ចុះ​ច្រើន​ តាំងពី​ជិត​៩០​ភាគ​រយ​រហូត​ដល់​ជាង​៦០​ភាគរយ​ ដោយសារ​គាត់​យល់​ថា ​ការ​បោះឆ្នោត​របស់​គាត់​មិន​សំខាន់។ ដូច្នេះ​វា​នឹង​ប៉ះពាល់​ដល់​ឆន្ទៈ​របស់​គាត់​ក្នុង​ការ​ចូលរួម​សម្រេច​នូវ​ជោគ​វាសនា​របស់​ប្រទេស​ជាតិ​ ហើយ​ក៏​វា​អាច​ឆ្លុះ​បញ្ចាំង​ពី​មតិ​របស់​ប្រជា​ពលរដ្ឋ​មួយ​ចំនួន​ដែល​យល់​ថា​ ការ​បោះឆ្នោត​ហ្នឹង​មិន​សំខាន់​ដោយសារ​លទ្ធផល​មិន​អព្យា​ក្រិត​ ឬ​មិនមាន​ទំនុក​ចិត្ត»។​

លោក​ទេព នីថា ​អគ្គលេខាធិការ​គណៈកម្មាធិការ​ជាតិ​រៀបចំ​ការ​បោះ​ឆ្នោត​(គ.ជ.ប.)​ មាន​ប្រសាសន៍​ថា ​របាយ​ការណ៍​នេះ​មិន​មាន​អ្វី​ថ្មី​នោះ​ទេ។​ ហើយ​គ.ជ.ប.​បាន​កែ​សម្រួល​ជាច្រើន​មក​ហើយ​ដែរ។​

«ចំណុច​ខ្លះ​ទៀត​មិន​ស្ថិត​ក្នុង​សមត្ថកិច្ច​របស់​គ.ជ.ប. ​ដែល​កំណត់​ដោយ​ច្បាប់​នោះ​ទេ។ ​ដូចជា​ចំនួន​ស្ត្រី​ដែល​ចូលរួម​ជា​បេក្ខជន​ គ.ជ.ប.​បាន​លើក​ទឹកចិត្ត​ដល់​គណបក្ស​នយោបាយ​ឲ្យ​ខិតខំ​ដាក់​បេក្ខ​នារី​ក្នុង​បញ្ជី​ឈ្មោះ​បេក្ខ​ជន»។​

ជាមួយ​គ្នានេះ​ដែរ ​លោក​ជាម យៀប ​តំណាង​រាស្ដ្រ​ប្រចាំ​មណ្ឌល​ព្រៃវែង​និង​ជា​មន្ដ្រីជាន់ខ្ពស់​ក្នុង​គណបក្ស​ប្រជាជន​កម្ពុជា​កំពុងកាន់​អំណាច​ បាន​បក​ស្រាយ​ថា ​គណបក្ស​របស់​លោក​មិន​បាន​បំពាន​ការ​អនុវត្ត​ច្បាប់​នោះ​ទេ។​

«គណបក្ស​ប្រជាជន​កម្ពុជា​កំពុង​ដឹកនាំ​អំណាច​មែន ​ប៉ុន្តែ​គណបក្ស​នេះ​យក​ច្បាប់​ធ្វើ​ជា​មូលដ្ឋាន​ក្នុង​ការ​អនុវត្ត​ការងារ​ទាំងអស់។ ​របាយ​ការណ៍​ដែល​គេ​លើក​ឡើង​ហ្នឹង​ ខ្ញុំ​ដឹង​ហើយ​ថា​ គេ​ចង់​បាន​អ្វី​ ឬ​គំនិត​របស់​គេ​យ៉ាងណា។​ ប៉ុន្តែ​សូម​ជម្រាប​ថា​ អ្វីៗ​ក៏ដោយ​ យើង​មានច្បាប់​ធ្វើជា​មូលដ្ឋាន​សម្រាប់​អនុវត្ត​រាល់​ការងារ​ទាំងអស់»។​
ប្រទេស​កម្ពុជា​នឹង​ធ្វើ​ការ​បោះឆ្នោត​ជ្រើស​តាំង​តំណាង​រាស្ដ្រ​នៅ​ថ្ងៃទី​២៨​ខែ​កក្កដា​ឆ្នាំ​នេះ។ ​អ្នក​មាន​សិទ្ធិ​បោះឆ្នោត​ទាំងអស់​សរុប​ជាង​៩​លាន​នាក់៕​
XS
SM
MD
LG